සචින් එංගලන්තයේ ඇලෙක්ස් පරදවයි බුවනෙක සහ ෂුස්මිතා චීනයට එරෙහිව තරග වටයක් ජය ගනිති

ජපානයේ පැවත්වෙන ජගත් කණිෂ්ඨ බැඩ්මින්ටන් කණ්ඩායම් තරගාවලියේ ශ්‍රී ලංකාව සිය දෙවන තරගයේදී හමුවන එංගලන්තයට එරෙහිව හොද සටනක් ලබා දිය හැකි මට්ටමකට ප්‍රවේශ වෙමින් සිටින බව ජපානයෙන් වාර්තා වන අතර ශ්‍රී ලංකාව වෙනුවෙන් පිරිමි කේවල තරග සදහා ඉදිරිපත් වන සචින් ඩයස් එංගලන්තයේ අලෙක්ස් ලේන් පරදවා ලකුණු 22 - 20 සහ 21 - 17 ක් ලෙස ජය ගැනීමට සමත් විය.   චීනය අතර පැවති තරගාවලියේදී මිශ්‍ර යුගල අංශයෙන් තරග වැදි බුවනෙක ගුණතිලක සහ ෂුස්මිතා ඉලංගකෝන් චීනයේ ටියැන්යේ පෙයි සහ ඩොන්ග්පින්ග් හුවැන්ග් ඉදිරියේ තරග වටයක් ජය ගනිමින් දස්කම් දැක්වීමට සමත් විය.එම තරගයේදී වට 2 - 1 ක් ලෙස චීන කණ්ඩායම ජය ගත් අතර තරගයේ දෙවන වටය ලකුණු 21 - 19 ක් ලෙස ශ්‍රී ලංකා යුගලට ජය ගැනීමට සමත් විය.තරග 5 - 0 ක් ලෙස චීනය ජය ගත් එම තරග අතරින් තරග වටයක් ජය ගැනීමට සමත් වූයේ ෂුස්මිතා සහ බුවනෙක පමණක් වූ අතර එම දෙදෙනා එංගලන්තයේ ටොම් වොල්ෆෙන්ඩන් සහ හොලී ස්මිත් සමග ද තියුණු තරගයක නියැලෙමින් අනතුරුව ලකුණු 17 - 21 සහ 15 - 21 ලෙස පරාජයට පත් වූහ.
 චීනය සමග පැවති තරගයේදී ශ්‍රී ලංකාවේ අංක එකේ ක්‍රීඩිකා තිළිණි ප්‍රමොදිකා හෙන්දහේවා ලකුණු 21 - 11 සහ 21 - 11 ලෙස චීනයේ යූ ෂෙන්ග් අතින් පරාජය වුව ද අද ඇයගේ ප්‍රතිවාදිය වන එංගලන්තයේ ක්ලෝ බ්ර්ච් ට වඩා ඉදිරියෙන් සිටින බැවින් තිළිණිට අද තරගය ජය ගැනීමට වැඩි අවස්ථාවක් ඇති බව සිතිය හැකිය.එසේම තරගාවලියට සහභාගි වන විශාලතම ප්‍රමාණයෙන් යුත් කණ්ඩායමක් සහභාගි කරවීමේ නිශ්පල වෑයමෙන් වැළකී සාර්ථක කණ්ඩායමක් සහභාගි කර වූයේ නම් පිරිමි යුගල තරගය වෙනුවෙන් සචින් ඩයස් සහ බුවනෙක යොදවා ජය ගැනීමේ අවස්ථාව ශ්‍රී  ලංකාවට පැහැදිළිව පෙනෙන්නට ඇති අතර එවැනි ඉදිරියට පැමිණීමේ උවමනාවක් තිබුණේ නම් කාන්තා යුගල තරග සදහා ෂුස්මිතා සහ තිළිණි යෙදවීමේ අවස්ථාවක් ද ශ්‍රී ලංකා කණ්ඩායමට තිබිණ.
නමුත් ජපානය බලා  යන්නට මුදල් ඇති ක්‍රීඩක ක්‍රීඩිකාවන් ගොන්නක් පිටත් කර හැරියේ නියම දක්ෂයන් පිරිසක් ලංකාවේ ඉතිරි කර තබා වන අතර කණිෂ්ඨ බාලිකා යුගල තරගාවලියේදී තිළිණි සමග යුගල තරගය ජය ගනිමින් සහ එම වයස් කාණ්ඩයේ  අනු සූරිය ද වූ ඉල්මි වරංගනා ද ඒ කපා දැමූ ලේඛණයේ උන්නාය.
www.supirikrida.com