හැට වන ජාතික බැඩ්මින්ටන් සූරතාවලිය අවසන් වූයේ නිලූක කරුනාරත්න 11 වන වරටත් ජාතික සූරයා බවට පත් කරමින්.නිලූක මෙවරත් සිය දක්ෂතාවය කේවල සූරතාව‍යෙන් නොනවත්වා ත්‍රිත්ව සූරතා දක්වා ගෙන යමින් සිය සොහොයුරු දිනූක කරුණාරත්න සමග යුගල සූරතාවයත් තිළිණි හෙන්දහේවා සමග එක්ව මිශ්‍ර යුගල සූරතාවයත් දිනා ගැනීම කැපී පෙණුනා.ඒ අතරින් නිලූක සමග එක්ව මිශ්‍ර යුගල සූරතාවයට හිමි කම් කියූ තිලිණි,නව ජාතික සූරියද වෙමින් වර්ථමානයේ ශ්‍රේණිගත කිරීම්වල තම නමට හිමි අංක එකේ තත්ත්වයට ජාතික සූරිය වීමේ කිරුළ ද එකතු කර ගත්තා.පිරිමි යුගල තරග වලදී නිලූක කරුණාරත්න ට සහ දිනුක කරුනාරත්නට තියුණු තරගයක් දෙන්නට හසිත චානක සහ එරංග ප්‍රනාන්දු සමත් වුව ද,පිරිමි කේවල අංශය සළකා බලද්දී නිලූක සහ ලාංකේය බැඩ්මින්ටන් අතර පරතරය විශාල ලෙසින් මෙම තරගාවලියේදී ත් දැක ගන්නට ලැබුණා.නමුත් සැළකිය යුතු දක්ෂයන් ප්‍රමාණයක් මෙම තරගාවලියේ පහතින් මතු වෙමින් තිබෙන බව පැහැදිළිව දකින්නට ලැබීම සතුටුදායක තත්ත්වයක්.නමුත් එය රැක ගැනීමට තරම් වැඩ පිලිවෙළක් ඇද්දැයි යන්න සැක සහිතයි.කණිෂ්ඨ සංචාර සදහා මෑත කාලයේ අත්දැකීමට අනුව එක් වන්නේ එම තරග සංචාරයට වියදම් කළ හැකි පිරිස මිස,දක්ෂයන් නොවීම යන්න එයට හේතුවයි.
ක්‍රීඩා අමාත්‍යංශය දෙසට මුව විවර වී ඇති පිං කැටයක් බදු බැඩ්මින්ටන් සම්මේලනය ක්‍රීඩක ක්‍රීඩිකාවන් වෙනුවෙන් සහ ක්‍රීඩාව වෙනුවෙන් ශක්තිමත් ආර්ථික වැඩ පිළිවෙළකට යෑම වෙනුවට සෑම අවස්ථාවකම අමාත්‍යංශයෙන් යැදීමේ න්‍යාය මත ක්‍රියාත්මක වන බැවින් තරුණ ක්‍රීඩක ක්‍රීඩිකාවන් විශාල පිරිසකට අසාධාරණයක් සිදු වෙමින් පවතියි.ක්‍රීඩාව වාණිජමය වශයෙන් සාර්ථක කර ගැනිම වෙනුවට සහ එහි ඇති ඉඩ-කඩ ප්‍රයෝජනයට ගැනීම වෙනුවෙන් ඇති හැකියාව තේරුම් ගැනීමට බැඩ්මින්ටන් නිලධාරින් වෙත දැණුමක් හෝ උවමනාවක් නැති බව අනුග්‍රාහකත්වයකින් තොරව ගලා ගිය හැට වන ජාතික සූරතාවලිය නැරඹිමේදී පැහැදිළි විය.
නිලූක කරුණාරත්න ගේ ඔලිම්පික් සහභාගීත්වයෙන් පසුව යම් කිසි මට්ටමකින් සමාජ ආකර්ශනයට ලක් වී ඇති බැඩ්මින්ටන් ක්‍රීඩාව වෙනුවෙන් රජකීය ගෘහස්ථ ක්‍රීඩා බිමේ ඉඩ - කඩ බැනර් සදහා වෙන් කර ගැනීමට හැකියාවක් තිබිණ.වෙළද ආයතන වලින් රුපියල් 20,000 බැනර් 10 - 15 ක් වෙන් කර ගත්තද තරගාවලියට වැය වෙන මුදලෙන් විශාල ප්‍රමාණයක් ආවරණය වන බැවින් එය යහපත් විසදුමක් වීමට තිබිණ.නමුත් තරග සංවිධානයට හිතවත් මිනිසුන්ගේ කීර්තා නාමය පුළුල් කිරීමට එම ඉඩ වැය කර තිබුණා හැරෙන්නට වෙනත් කිසිවක් එහි දකින්නට නොවිණ.ඒ අනුව හිටපු සභාපතිවරයෙකු ට තරගාවලියේ අනුග්‍රාහකයෙකු ලෙස හැසිරෙන්නට හැකි මල් දමක් සේ ඔහු ගේ නමින් කිසිදු මුදලක් ලබා නොදී බැනරයක් එල්ලා තැබීමට පමණක් ඒ ඉඩ වැය වී තිබිණ.
එසේම බැඩ්මින්ටන් සම්මේලනයේ සභාපතිවරයා මීට පෙර අවස්ථාවක වෙනත් රටක ජාතික පුහුණුකරුවෙක්ට තවත් රටක ක්‍රීඩකයෙකු වෙනුවෙන් පෙනී සිීමට නොහැකි බව නොදැන සිටියා මෙන් මෙවරද සමාප්ත සමාචාර උත්සවයට සහභාගිවන පිරිස කවුරුන්ද යන්න හෝ ඔවුන්ට අසුන් පනවන්නේ කෙසේද යන්න හෝ නොදැන සිට බවක් පෙනෙනන්නට තිබිණ.තරගාවලිය නැරඹීමට රංගන ශිල්පිනියන් දෙදෙනෙකු කැදවා තිබුණු බවක් පෙනෙන්නට තිබුණු අතර තරගාවලියේ සමස්ත බර කර පිට තබා සිටි පාලිත හෙට්ටිආරච්චි පැවසුවේ ඔවුන් බැඩ්මින්ටන් පිළිබදව උනන්දුවෙන් විමසා පැමිණි බවක්ය.එසේනම ඔවුන් අසුන් ගත කළ යුතුව තිබුණේ,ප්‍රේක්ෂකාගාරයේ වුවත් බැඩ්මින්ටන් ප්‍රවීනයන් එම ස්ථානවල රදවා නිළියන් පුධාන වේදිකාව මත අලවා තැබිමට සංවිදායකයන් කටයුතු කර තිබීම කණගාටුදායකය.ඇතැම් විට නිළියන් ප්‍රේක්ෂකයන් අතර සිට තරගය නැරඹුවේ නම් ඒ පැමිණීම ක්‍රීඩාවට ආලෝකයක් වන්නට තිබුණු අතර නමුත් සිදුවූයේ ඔවුන් ආලෝකමත් කිරීමට සිය ශ්‍රමය වැය කිරීමකි.
පැමිණි රංගණ ශිල්පිණියන් අතර දකුණු පළාත් සබා මංත්‍රීනී අනර්කලී ආකර්සා ද සිටි අතර ඇයට ඉදිරි පෙළේ සිය පළාත් සභා මංත්‍රීකමට සුදුසු අසුනක් නොපැනවිය.එයින් එක් අතකට ඇයගේ මංත්‍රීකම හෑල්ලුවට ලක් වූවේය.නමුත් ඇය මංත්‍රීවරියක ලෙස එම සභාවට වගකිව යුතු අයුරෙන් සැරසී නොපැමිණි නිසාවෙන් ගැටළුවක් ඇති නොවුණු අතර සැබවින්ම ඇයට අවශ්‍යයව තිබුණේ තරග නැරඹීමේ අවශ්‍යයතාවය ලෙස සිතෙන ආකාරයට සැහැල්ලුවෙන් පැමිණ සිටි අතර ඇය ප්‍රධාන පීඨිකාවකට කැදවා සිදු කළේ ඇයට රිසි සේ තරගය විද ගැනීමට තිබුණු අවස්ථාව අහිමි කිරීම සහ මහජන නියෝජිතත්ත්වයට හිමි විය යුතු තැන පිරි නො'නමා ඇයව අපහසුවට පත් කිරීමය.ඒ නිසා කැදවන්නේ කවුද යන්නත් ඔවුන් ට සළකන්නේ කෙසේද යන්නත් පිළිබදව පූර්ව දැන ගැනීමකින් තොරව සිටීමෙන් ඉදිරි පෙළ අපිලිවෙළකට අසුන් සැකසීමට සිදු වීම නොසැළකිල්ල නිසා සිදු වූවක් බව පිළිගත යුතුය.
කෙසේ හෝ ඒ සියල්ල මැද තරගාවලියේ ක්‍රියාන්විතය ශක්තිමත් කිරීමට බැඩ්මින්ටන් සම්මේලනය වෙනුවෙන් පාලිත හෙට්ටිආරච්චි වෙහෙසක් දැරූ බව ක්‍රීඩක ක්‍රීඩිකාවන් කිහිප දෙනෙකුම පිළිගත්තේ ඇතැම් අය එම දින ගණන තුළම ටයි සහ කෝට් සමග ප්‍රදර්ශනය වූයේ එදා පමණක් බවට නෝක්කඩුවක් ද එක් කරමින්ය.බැඩ්මින්ටන් සම්මේලනය මේ තරගාවලිය සදහා අනුග්‍රාහකයෙකු සොයා ගැනීමට අපොහොසත් වීම මෙන්ම මුදල් සෙවීමට හැකි ඉඩ-කඩ වසා ගෙන එම අවස්ථා හිතවතුන්ට ප්‍රශස්ති වැයීමට වෙන්කළ ද තරගාවලියේ ජයග්‍රාහකයන් වෙනුවෙන් රුපියල් ලක්ෂ හතරක මුදල් ත්‍යාග පිරිනැමීම යහපත් ප්‍රවනතාවයක් ලෙස අගය කළ යුතුය.එසේම තරග පැවත් වූ ආකාරය විනිසුරුවන් හැඩ ගන්වා තිබූ ආකාරය ආදිය ද අගය කළ යුතු තත්ත්වයක තිබිණ.කාන්තා අංශයේදී ක්‍රීඩාවේ යම් ප්‍රගමනයක් දකින්නට ලැබීමද සතුටුදායක අතර නව සූරිය ලෙස තිළිණි හෙන්දහේවා කිරුළු පළදද්දී මීට වසර කිහිපයකට පෙර පැවති පරිපාලනය විසින් නින්දිත ලෙස ඝාතනය කරන්නට උත්සාහ කළ ලේඛා ෂෙහානි අවසන් තරගයට පිවිස එදා ඇයව රැක ගැනීමට වෑයම් කළ මාධ්‍යවේදීන් නැගූ හඩේ තිබූ සත්‍යය පැහැදිළි කළාය.
එසේම කවිදි ඉෂාන්තිකා සහ ඕෂධි කුරුප්පු කාන්තා යුගල අවසන් තරගයේදී ජාතික යුගල සූරියන් ගේ නාමාවලියට පළමු වරට සිය නම එක් කිරීමට සමත් වීම අගය කළ යුතුය.ප්‍රවීනතම ක්‍රීඩිකාව වන චන්ද්‍රිකා ද සිල්වා සමග එක්ව තරග කළ ෂුස්මිතා ඉලංගකෝන් පරාජය කළ ඕෂධි සහ කවිදි ඉතා හොද තරගයක නියැලෙමින් තමන්ට වඩා දශක දෙකකට ආසන්න කාලයක් පැරණි චන්ද්‍රිකා වැනි ක්‍රීඩිකාවක් පරාජය කරන්නට ක්‍රීඩා කළ ආකාරය ප්‍රශස්තය.
චන්ද්‍රිකා මෙම තරගාවලියේ එම අනු සූරතාවයට දායක වීමට අමතරව ලසිත මේනක සමග එක්ව මිශ්‍ර යුගල තරගයේ අනු සූරතාවයට ද දායක වූවාය.නමුත් ලේඛා ෂෙහානි ගේ තාරුණ්‍යයේ ප්‍රහාරය චන්ද්‍රිකා ට අර්ධ අවසන් පූර්ව තරගයෙන් එපිටට යන්නට ඉඩක් ලබා නොදුන්නාය.මේ වන විට චන්ද්‍රිකා ක්‍රීඩිකාවක් ලෙස සිටිනවාද නැතිනම් ඇයගේ අත්දැකීම් සහ දැණුම ලාංකේය බැඩ්මින්ටන් ප්‍රගමනය සදහා යොදා ගැනඹට හැකි මගක් සොයන්නේද යන්න පිලිබදව සිතා බැලිය යුතු බව මෙම තරගාවලිය පැහැදිළි කළේය.එසේම චන්ද්‍රිකා වැනි අත්දැකීම් බහුල ක්‍රීඩිකාවක් එම භූමිකාවෙන් ගලවා ශ්‍රී ලංකාවට පලදායි ලෙස වෙනත් භූමිකාවක් කරා යොමු කිරිමට ඇයව පෙළඹවීමට බැඩ්මින්ටන් පරිපාලනයට ද අවබෝධයක් තිබිය යුතුය.
කරුණාරත්න පවුලේ නිලූක සහ දිනූක ට අමතර කුඩාම සාමාජිකයා වන ලාකේය කණිෂ්ඨ සූරයා ලෙස සිටින චාමික ද ඒකල තරගවල දී අර්ධ අවසන් පූර්ව තරග දක්වා පැමිණි අතර ලුවී කරුණාරත්න නම් වූ ඔවුන්ගේ පියා ද අවුරුදු 50 ඉහළ බැඩ්මින්ටන් කේවල සූරයා වෙමින් ද,එම වයස් සීමාවේ යුගල තරගයේදී ලලිත් නානායක්කාර සහ සුරේෂ් තවරාසා ඉදිරියේ වට තුනක් ක්‍රීඩා කිරීමෙන් ඉනික්බිතිව වට 2 - 1 ක් ලෙස රොහාන් ද සිල්වා සමග එක්ව අනු සූරතාවය දිනා ගැනීමත් නිසා කරණාරත්න පවුලට මෙම තරගාවලියේ විශේෂ තැනක් වෙන්විය.සූරතා හතරක් සහ අනු සූරතා දෙකක් රැදුණේ කරුණාරත්න නිවසේ ය.
ක්‍රීඩා අමාත්‍යවරයාගේ සහභාගීත්වය අපේක්ෂාවෙන් සංවිධානය වූ සමාප්ත උළෙලේ ප්‍රධාන ආරාධිතයා ලෙස අමාත්‍යවරයා සහභාගි නොවූ අතර එම හිස්තැන පිරවීම ට අමාත්‍යංශ ලේකම්වරයා කැදවා තිබිණ.ඔහු ට අමතරව ක්‍රීඩා සංවර්ධන දෙපාර්තමේන්තුව නියෝජනය කරමින් එහි අධ්‍යක්ෂ ජෙනරාල් රංජනි ජයකොඩි ද එම අවස්ථාවට එක් වී සිටි අතර අමාත්‍යවරයා බැඩ්මින්ටන් ජාතික සූරතාවලිය මග හැර ගියේ ඉදිරි දින කිහිපයේදී පරිපාලනමය වශයෙන් බැඩ්මින්ටන් වැටෙමින් පවතින අගාධයේ මාවත වෙනස් කිරීමට තීරනය කර තිබීම නිසා දැයි යන්න මෙහි පැමිණ සිටි බොහෝ දෙනෙක්ට මාතෘකාව වී තිබිණ.
සමස්තයේ පවතින අවුල් වියවුල් වලින් පැටලී තිබුණා හැරෙන්නට තරගාවලියට යම් දීප්තියක් එක් කිරීමට ගෙන තිබූ උත්සාහය යහපත් බව අපි කියන්නෙමු.එහෙත් මුල සිට අග දක්වා වු සැළසුමකට ක්‍රියාත්මක නොවුණු එන එන හැටියට ගස උළුවස්සා න්‍යායෙන් ක්‍රියාත්මක වී ගොඩ ගිය තරගාවලියක් බව සදහන් කරනු කැමැත්තේමු.
දශක දෙකකටත් මදක් වැඩි කාලයක් ගත් විට නිලූක ජාතික සූරයා වන්නට මත්තෙන් අප දැන සිටි ජාතින සූරයන් වූ දුමින්ද ජයකොඩි,නිරෝෂන් විජේකොන් වැන්නන් මෙම තරගාවලියේ ඉහළ වයස් ඛාණ්ඩ අතරේ තරග වැදීම අගය කළ යුතුය.ඒ අතර සමකාලීන මතකයන් තුළ සිටින තුසාර එදිරිසිංහ සහ උදය වීරකෝන් ද සිටියේනම් නිලූක මෙන්ම දශක දෙකකටත් වැඩි ඉතිහාසයේ ශ්‍රී ලංකාවේ ජාතික සූරයන් වූ සියල්ල එක පිටියක බලා ගන්නට තිබිණ.එවැනි සූරයන් අවසාන දිනයක ඒ ඉතිහාසයත් සමග නිළියන් වෙනුවට ඉදිරියේ අසුන් ගන්නවා ගෞරවනීය කළ හැකිනම් එය බැඩ්මින්ටන් අනාගතයට දිරි දීමක් බව සිහිපත් කිරීමට කැමැත්තෙමු.එසේම ඉදිරි දැක්මක් තිබේනම් සහ හෘද සාක්ෂියට අනුව ක්‍රීඩාවට සැබෑ ලෙස ආදරය කරන්නේනම් බැඩ්මින්ටන් පරිපාලනයට මේ අවස්තාවේ අනාගතය වෙනුවෙන් ඇතැම් විට මුරණ්ඩු යැයි හංවඩු ගැසෙන්නට හැකි වුවත් අනාගතයේ බැබලෙන නම් බවට පත් විය හැකි තීරණයක් ගැනීමට පුළුවන.විශේෂයෙන් කාන්තා තරග අංශයේදී එය පැහැදිළිව පෙනෙන්නට තිබිණ.ඉතා ලාබාල ක්‍රීඩිකාවන් ඉතා ඉහළ දස්කම් පාන තත්ත්වයක් තුළ ඒ අය අතරින් තෝරාගත් දක්ෂයන් කිහිප දෙනෙකුට ඉහළ අනුග්‍රහයක් ලබා දී ඔවුන් මෙන්ම ඔවුන්ගේ පෞද්ගලික පුහුණුකරුවනගේ දැණුමද යාවත් කාලීන කරමින් ලාංකේය බැඩිමින්ටන් ක්‍රීඩාවට අළුත් පැහැබර ගමණක් අරඹන්නට හැකි මාවතක් සකස් කළ හැකිය.
www.supirikrida.com
No comments:
Post a Comment