චීනයේ පැවත්වෙන ආසියානු යොවුන් (අවුරුදු 17 න් පහළ සහ අවුරුදු 15 න් පහළ ) බැඩ්මින්ටන් තරගාවලියට සහභාගි වන ශ්‍රී ලංකා ක්‍රීඩක ක්‍රීඩිකාවන්ගෙන් එම සංචාරයට එක් වූ පුහුණුකරු අවසාන මොහොතේදී රුපියල් අටදාහක මුදලක් ඉල්ලීම නිසා දෙමව්පියන් මහත් අසරණභාවයට පත් ව ඇත.එසේම එවැනි මුදලක් අය කරන්නේනම් බැඩ්මින්ටන් සංගමයේ නිලධාරියෙකු ඊට මැදිහත්ව එම ගෙවීම් සම්බන්ධ රිසිට් පතක් ලබා දී එම මුදල් ලබා ගත යුතු වුව ද මෙහිදී එවැනි කිසිදු නිල ගණුදෙණුවක ස්වරූපයෙන් යමක් සිදු වී නැත.අවසාන මොහොතේදී එසේ මුදල් ඉල්ලීම නිසා වඩාත් අසරණභාවයට පත් දෙමව්පියන් කිහිප දෙනෙකුම එම මුදල් ගෙවා නැති අතර මෑත කාලීනව දැඩි කතා බහකට ලක් වූ තම සේවකයෙකු කණ්ඩායම් කළමණාකරු ලෙස විදේශ ගත කළ ජාතික සංගමයේ උප සභාපතිවරයාගේ පුතු ට තනි කාමරයක් වෙන කර තිබීම නිසා රුපියල් 13,000.00 මුදලක් ගෙවන්නට සිදු වී ඇත.
තරගාවලිය සදහා රුපියල් එක්ලක්ෂ දොළොස් දහස මගින් දරුවන් අට දෙනෙකුගෙන් අය කර ගෙන ඇති අතර එම අට දෙනාට එහි පහසුකම් සම්පාදනය වන අතර ඉතිරි තිදෙනාගෙන් අය කර ඇති මුදල අයෙකුගෙන් රුපියල් එක්ලක්ෂ විසිනව දාහකි.
එසේ මුදල් අය කර ඇතත් තව දිනක් වැඩි පුර එරට සිටින්නට වන බවත් එය මුලදී ගණනය කර නැති බවත් පවසමින් කණ්ඩායම් කළමණාකරු මෙසේ මුදල් එකතු කර තිබේ.එයින් පැහැදිළි වන්නේ ජාතික සංගමය සහ පාසල් සංගමය වගකීමකින් තොරව කටයුතු කර ඇති බවකි.තරගාවලිය පැවත්වෙන බව සහ එහි තොරතුරු දීර්ඝ කාලයක සිට වෙබ් අඩවියේ පළ වන අතර එසේ තිබිය දී සංචාරයේ දින ගණන සහ අවශ්‍යය මුදල් පිලිබදව නිවැරදිව එකවර දැණුම් දීමට අපොහොසත් වීම එම සංගම් දෙක වගකීම පැහැර හැරීමකි.
නමුත් වැරදි කරන්නට කරන්නට ඒවා දැණුම් දෙන පුද්ගලයන් ආශ්වාදයට ලක්වන ප්‍රකාශ කිරීමට එහා යමක් ක්‍රීඩා අමාත්‍යංශයෙන් හෝ අධ්‍යාපන අමාත්‍යංශයෙන් මෙම සංගම් දෙකට එරෙහිව සිදු නොවන අතර එයින් නිලධාරීන් කිහිප දෙනෙකුගේ සුඛ විහරණය පමණක් සිදු වෙමින් බැඩ්මින්ටන් ක්‍රීඩාව අගාධයට යමින් පවතියි.විශේෂයෙන්ම ජාතික සංගමය ක්‍රීඩා අමාත්‍යවරයාද නොතකා වැඩ කරන තත්ත්වයට පත්ව ඇති නමුත් අමාත්‍යවරයාට ඒවා ඉවසා විද දරන්නට සිදු වී ඇති බලයක් බැඩ්මින්ටන් සංගමය තුළ තිබෙන බව එම අන පනත් නොතකා හැසිරෙන නිලධාරීන්ම කිහිප තැනකදී පවසා ඇත.
මෙම සටහනට පාදක වූ සංචාරයට අවුරුදු 17 න් පහළ ජාතික අනු සූරිය වන ඉල්මි වරංගා ඇතුළත් කර නැති අතර ඒ සම්බන්ධයෙන් එකිනෙකා පරස්පර ප්‍රකාශ කරමින් සහ අනෙකාට ඇගිල්ල දිගු කරමින් සිටිනු විනා යමක් නොකළ අතර ක්‍රීඩා අමාත්‍යවරයාට ඒ සම්බන්ධයෙන් කළ පැමිණිල්ලට ද ක්‍රියා මාර්ගයක් ගෙන නැත.ඇය ජාතික සූරිය වන තිළිණි හෙන්ද‍හේවා ට පමණක් එම වයස් කාණ්ඩයේ පසු පසින් සිටින අතර මෙවර ජාතික කණිෂ්ඨ සූරතාවලියේදී ද ඒ බව සනාත කරමින් ඇය තිළිණිට පමණක් පරාජය වෙමින් එම වයස් කාණ්ඩයේ කේවල අනු සූරියද,තිළිණි සමග එක්ව යුගල සූරතාවය ද දිනා ගත්තාය.
එසේම ක්‍රීඩා අමාත්‍යවරයා බැඩ්මින්ටන් සංගමයේ සිටීම සම්බන්ධයෙන් විරෝධය ප්‍රකාශ කළ පුද්ගලයෙකු දිගින් දිගටම එහි රදවා තබා ගැනීමට පරාක්‍රම බස්නායක ශක්තිමත් වී ඇති අතර එපමණක් නොව ඔහුට ප්‍රධාන විධායක තනතුර පිරිනමමින් රටේ බැඩ්මින්ටන් සංවර්ධනය සම්බන්ධ සාකච්ඡාවකට සහභාගිවීමට මැලේසියාවට යැවීමට ද තීරණය කර ඇත.
පසුගිය කාලයේ බොහෝ අයථා පාලන පැවති ක්‍රීඩා සංගම්වල පරිපාලනය වෙනස් කිරීමට අමාත්‍යවරයා මැදිහත් වුව ද,බැඩ්මින්ටන් සංගමයට චෝදනා එල්ල වද්දී ඒ මොහොතට බැනීම සහ විවේචනය හැරෙන්නට යමක් කිරීමට නොහැකි තත්ත්වය නිසා ක්‍රිඩා අමාත්‍යවරයාට බැඩ්මින්ටන් සංගමයේ සියළු වැරදි ඉවසා සිටින්නට සිදු වී ඇත.
පාසල් සංගමයේ තත්ත්වය ද මෙය වන අතර එහි ක්‍රියාකාරීත්වය මේ රටේ සාමාන්‍ය ජනතාවට ඇති අයිතිය පවා පිලි නොගනිමින් රැකීමට ඇතැම් අවස්ථාවල අධ්‍යක්ෂවරයා ක්‍රියා කරමින් සිටියි.ඔහු සෑම විටම ලිඛිත සාක්ෂි නැති බව කියා ලිස්සා ගිය ද අධ්‍යාපන අමාත්‍යවරයා මාධ්‍ය වාර්තා පදනම් කර ගෙන පරීක්ෂණ අරඹන්නට මාධ්‍යවේදීන් ඉදිරිපිටදීම නියෝග කළ ද අධ්‍යක්ෂවරයා ඉන් අනතුරුව ද මාධ්‍ය කිහිපයකටම පවසා ඇත්තේ ලිඛිත සාක්ෂි නොමැති බවය.එසේම එම සංගමයේ ක්‍රියාකාරීත්වය අභියෝග කරමින් අධ්‍යක්ෂවරයාට යොමු කළ ලිපි කිහිපයකම පිටපත් අප සතුව ඇති අතර අධ්‍යාපන අමාත්‍යවරයා සිය අත්සනින් පාසල් බැඩ්මින්ටන් සංගමයේ චෝදනා ගැන පරික්ෂා කරන්නට යැයි අධ්‍යක්ෂවරයාට දෙන ලද ලිපියක් සම්බන්ධයෙන් අධ්‍යක්ෂවරයා ලිපිය යොමු කළ පුද්ගලයාට දන්වා එවන්නේ ඔහු දෙමව්පියෙක් හෝ විදුහල්පතිවරයෙක් හෝ ගුරුවරයෙක් නොවන බැවින් ඔහුට එසේ චෝදනා කරන්නට අයිතියක් නැති බවය.
ඒ නිසා ජාතික බැඩ්මින්ටන් සංගමය මෙන්ම පාසල් බැඩ්මින්ටන් සංගමය ගැන වැරදි වාර්තා කිරීමේ එකම සුගතිය එම සංගම්වල ක්‍රියාකාරීන්ගේ තොරතුරු දැන ගැනීමෙන් සාමාන්‍ය ජනතාව ප්‍රවේශමෙන් කටයුතු කරන්නට ඉගෙනීම පමණක් වන තරමට තත්ත්වය ඛේදණීය වී ඇති අතර ක්‍රීඩා සහ අධ්‍යාපන අමාත්‍යවරයාට සිය බලය යොදවා මෙම සංගම් සම්බන්ධයෙන් ක්‍රියා කළ නොහැකි තත්ත්වයක් තිබෙන බව එක දිගටම සිදුවන සිදුවීම් වලදී එම අමාත්‍යවරුන්ට නිහඩව සිටින්නට සිදු වීමෙන් පැහැදිළි වේ.
www.supirikrida.com
චීනයේ ගුවෑන්ඩොන්ග් හී පැවත්වෙන ආසියානු අවුරුදු 17 න් පහළ සහ 15 න් පහළ බාලක බාලිකා යොවුන් තරගාවලියේ යුගල තරග නියෝජනය කළ ශ්‍රී ලංකා ක්‍රීඩක ක්‍රීඩිකා යුගල පහම විනාඩි 101 ක කාලයක් ඇතුළත ප්‍රතිවාදින් ඉදිරියේ පරාජයට පත් විය.ඒ අතරින් අවුරුදු 15 න් පහළ බාලක බාලිකා තරග යුගලයත් අවුරුදු 17 න් පහළ බාලිකා යුගලයකුත් එම තරග වට වල වේගවත්ම පරාජයන් වාර්තා කළ කන්ඩායම් වීම ද කැපී පෙණින.
.jpg)
