ඇමෙරිකානු ක්‍රීඩා ඇකඩමි සම්මාන බෝල්ට් ට සහ සෙරීනා ට

ඇමෙරිකා එක්සත් ජනපද ක්‍රීඩා ඇකඩමි සම්මාන උළෙලේදී වර්ෂයේ හොදම ක්‍රීඩකයා ලෙස කෙටි දුර ධාවන සූර උසෙයින් බෝල්ට් සහ හොදම ක්‍රීඩිකාව ලෙස සෙරීනා විලියම්ස් සම්මානනීය වීමට නියමිතය.
මෙම සම්මාන ප්‍රදානයේදී බෝල්ට් සදහා එම සම්මානය හිමි වීමට ඔලිම්පික් ක්‍රීඩා උළෙලක දෙවතාවකදී මීටර් 100 සහ 200 ජයග්‍රහණ ආරක්ෂා කර ගනිමින් සහ දෙවතාවකදීම මීටර් 100 සහය දිවීමේ ජයග්‍රහණය ලබා ගැනීමට දායක වීමත් විශේෂ සැළකිල්ලකට ලක් කර ඇත.මෙවර ලන්ඩන් ඔලිම්පික් උළෙලේදී බෝල්ට් මීටර් 100 ඉසව්වෙන් නව ඔලිම්පික් වාර්තාවක් තැබීමට සමත් වූ අතර මීටර් 100 සහය දිවීමේ තරගයේදි නව ලෝක වාර්තාවකට දායක වන්නට සමත් විය.
සෙරීනා විලියම්ස් ගේ සම්මානය සදහා ද ඔලිම්පික් උළෙලේ දක්ෂතා විශේෂයෙන්බල පා ඇත.ඇය එහිදී කේවල ටෙනිස් රන් පදක්කම මෙන්ම සිය සොහොයුරිය සමග එක්ව එම කාන්තා යුගල රන් පදක්කමද දිනා ගැනීමට සමත් විය.එසේම ඇයට සම්මානය පිරිනැමීම සදහා පසුගිය මාස 12 ක කාලය තුළ දැක් වූ දක්ෂතා සැළකිල්ලට ගැනිමේදී විම්බල්ඩන් ටෙනිස් කිරුළ සහ ඇමෙරිකා විවෘත ටෙනිස් ජයග්‍රහණයද සැළකිල්ලට ගෙන  ඇත.
පිරිමි අංශයේදී බෝල්ට් හා මෙම සම්මානය පිළිබදව සළකා බැලීමේදී දෙවන ස්ථානය හිමි වී ඇත්තේ මයිකල් පෙල්ප්ස් ට ය.පිහිණුම් ක්‍රීඩාවෙන් ඔහු විසින් පෙන්වන විස්මිත හැකියාවන් ඒ සදහා සැළකිල්ලට ගෙන ඇත.තෙවැන්නා වී ඇත්තේ ටෙනිස් සූර නොවැක් ඩිජොක්වික් ය.
සෙරීනා හා තරග වැද දෙවන ස්ථානයට පත් පිහිණුම් සූරී මිසී ෆ්‍රෑන්ක්ලීන් ලන්ඩන් ඔලිම්පික් උළෙලේදී රන් පදක්කම් හතරක් සහ ලෝකඩ පදක්කමක් දිනා ගත්තාය.එහදී තෙවැන්නිය ලෙස තේරී පත් වූයේ හිම මත ලිස්සා යාමේ ක්‍රීඩිකා ලින්ඩ්සේ වොන් ය.
www.supirikrida.com

ලංකාවට ලෙඩ්ඩු එක්ක පරාජය උරුම වුණ තරගයක්

ෂේන් වෝන් සහ මුත්තයියා මුරලිදරන් ටෙස්ට් තරගාවලියේ දෙවැන්න ඉණිමකින් සහ ලකුණු 201 කින් ජය ගත් ඕස්ට්‍රේලියාව තරගයේ පමණක් නොව තරගාවලියේද ජයග්‍රහණය හිමිකර ගත්තේ ශ්‍රී ලංකාවට ඉදිරි තරග වලදී සේවය ලබා ගැනීමට නොහැකි වන පරිදි ක්‍රීඩකයන් කිහිප දෙනෙකුම රෝගින් බවට ද පත් කරමින්ය.වේග පන්දු යවන චානක වෙළගෙදර පමණක් පන්දු යැවීමේදී ආබාධයකට ගොදුරු වූ අතර කුමාර සංගක්කාර මෙන්ම ප්‍රසන්න ජයවර්ධන ද ආබාධ වලට ගොදුරු වූයේ ඕස්ට්‍රේලියානු වේග පන්දු ඉදිරියේය.
ශ්‍රී ලංකාවේ ටෙස්ට් ඉතිහාසයේ මුල් කාලයට පිවිසීමේදී වේග තණතිලි වල දැක් වූ පසුබෑම මෙම තරගාවලිය පුරාම දකින්නට ලැබෙන අතර මෑත කාලයේ එවැනි තණතිලි වලදී සහ වේග පන්දු වලට හොදින් මුහුණ දෙන පිතිකරුවෙකු ලෙස හදුනා ගෙන සිටින ලහිරු තිරිමාන්න වැනි ක්‍රීඩකයන් කෝටි ගණනක් වටින ලොගාඩ් ගේ වාර්තාවෙන් පවා කියවෙන තේරීම් කමිටුවේ දැණුවත් භාවයේ ආනුභාවයෙන් මෙම තරගාවලියට ඇතුළත් කර නැත.
ශ්‍රී ලංකා පිතිකරුවන් මෙම තරගයේදි හැසිරුන ආකාරය ඉතාමත් පහළ මට්ටමක පැවති අතර ඔවුන් මුළු තරගය පුරාම පන්දුවට පහර දී තිබුණේ පන්දු ඕවර් 68 ක් පමණි.දෙවන ඉණිම 25 වන පන්දු ඕවරයේ දෙවන පන්දුවෙන් අවසන් වන අතර සංගක්කාර ආබාධයකට ලක් ව පිටියෙන් ඉවත්වීම සහ ප්‍රසන්න ජයවර්ධන සහ චානක වෙළගෙදර ආබාධ හේතුවෙන් පහර දීමට නොපැමිණිම ද ශ්‍රී ලංකාවේ පරාජයේ පරිමාව තව දුරටත් පුළුල් කළේය.
ශ්‍රී ලංකාවට එරෙහිව පළමු තරගයේදී ක්‍රීඩා නොකළ මිචෙල් ජොන්සන් මෙල්බර්න් තණතිල්ලේ පන්දු යැවීම සදහා කැදවා තිබුණු අතර ඒ කැදවීම නිවැරදි බව සනාත කරමින් තුන් ඉරියව්වෙන්ම දක්ෂතා දැක් වූ මිචෙල් ඕස්ට්‍රේලියානු ජයග්‍රහණයේ පුරෝගාමියා වෙමින් තරගයේ වීරයා බවට ද පත් විය.ඉදිරි තරගය වඩාත් අසීරුතාවයකට ලක් කරන තරගයක් බවට පත් කරමින් ශ්‍රී ලංකා කණ්ඩායමේ නිත්‍ය කඩුළු රකින්නා ප්‍රසන්න මෙන්ම ප්‍රධානතම වේග පන්දු යවන්නා ලෙස කැපී පෙණුන චානක වෙළගෙදර ද ,වේග පන්දුවට මුහුණ දෙන සාර්ථකම ශ්‍රී ලංකා පිතිකරුවා ලෙස සැළකෙන කුමාර සංගක්කාර ද  මේ වන විට කණ්ඩායමෙන් ඉවත් වී ඇත.ඊට ආදේශක ලෙස යොදා ගන්නේ කවුරුන් ද යන්න සෙවිම මෙන්ම ශ්‍රී ලංකා කණ්ඩායමේ මෑත කාලීන ජයග්‍රහණ සදහා හේතු වූ රංගන හේරත්ගේ දග පන්දුව ඕස්ට්‍රේලියානු තණතිල්ලෙන් ප්‍රයෝජනයට ගත හැකි මට්ටමකට පත් වීමට තරගයේ දෙවන ඉණිම තෙක් පසු බසින්නට වීම ද තෙවන තරගයේදී සැළකිල්ලට ගැනිමට සිදු ව ඇත.
එසේම පරාජිත මෙම තරගයේ පරාජයේ ප්‍රමාණය පුළුල් කිරීමට මූලික වශයෙන්ම බල පෑ ශ්‍රී ලංකා කණ්ඩායමේ දුර්වල පන්දු රැකීම පිළිබදවද තෙවන තරගයේදී විශේෂ අවධානයකින් සළකා බැලිය යුතුව ඇත.පරාජයේ අමිහිර මෙන්ම ඉදිරි පැවත්ම සදහා බල පෑ ආබාධ සහිත ක්‍රීඩකයන්ද තුරුළු කර ගනිමින් මේ වන විටත් තරගාවලිය පරාජය වී සිටින ශ්‍රී ලංකාව මෙම ටෙස්ට් තරගයේ ලද පරාජය ශ්‍රී ලංකාව ටෙස්ට් තරගයක දී ලද විශාලතම පරාජයන් අතර තෙවන තැනට පත් වෙයි.
පහත දැක්වෙන්නේ තරගයේ සමස්ත ලකුණු විස්තරයට පිවිසෙන සබදතාවය වේ.
http://www.espncricinfo.com/australia-v-sri-lanka-2012/engine/current/match/573012.html

www.supirikrida.com

කැන්ගරුවන් සිංහයන්ව මදුරුවන් ගානට තලා දමයි

 ශ්‍රී ලංකාවේ දුර්වල පිතිකරණය යළිත් විදහා පාමින් ඕස්ට්‍රේලියාව සමග පැවත්වෙන දෙවන ටෙස්ට් තරගයේ තෙවන දිනයේ දිවා භෝජනය වන විට කඩුලු 4 ක් දැවී ලකුණු 43 ක් ලබා ශ්‍රී ලංකාව ඉනිමක පරාජයක් වෙත ඇදෙමින් සිටියි.පළමු ඉණිමට ශ්‍රී ලංකාවේ ලකුණු 156 වෙනුවට ලකුණු 460 ක් ලබා ගත් ඕසට්‍රේලියාව ප්‍රථම ඉණිමේ වාසිය ලකුණු 304 ක් බවට පත් කර ගත්තා.පස්වන කඩුල්ලට ලකුණු 196 ක සබදතාවයක් පැවත් වූ නායක මයිකල් ක්ලාක් (106) සහ ෂේන් වොට්සන්(83) ගෙන් පසුව මිචෙල් ජොන්සන් ලකුණු 92 ක් නොදැවී ලබා ගනිමින් පසුපෙළ ශක්තිමත් කළා.

කඩුලු ලබා ගැනීමේදී ශ්‍රී ලංකාවේ දග පන්දු තුරුම්පුව යළිත් අසරණ වූ අතර රංගන හේරත් ඉදිරියේ එක කඩුල්ලක් හෝ දැවී ගියේ නැහැ.ශ්‍රී ලංකාවේ දග පන්දු යැවීමට හිමි වූ එකම කඩුල්ල ඩිල්ෂාන්ට හිමි වූ අතර ධම්මික ප්‍රසාද් 106 / 3 ක් සහ සමින්ද එරංග 109 / 3 ක් දවා ගනිමින් කැපී පෙනෙද්දී ශ්‍රී ලංකාවේ ප්‍රධානතම වේග පන්දු අභියෝගය වන චානක වෙළගෙදර ආබාධ තත්ත්වය මත පන්දු යැවීමෙන් වැළකී සිටිනවා.

මේ නිසා ලකුණු 304 ක් හඹා ගොස් ඉණිමක පරාජයෙන් ගැලවෙන්නට උත්සාහ කරන ශ්‍රී ලංකාවට තවත් ඉතිරිව ඇත්තේ කඩුලු 4 ක් පමණයි.ආබාධ නිසා ප්‍රසන්න ජයවර්ධන සහ චානක වෙළගෙදරත් පන්දුවට පහර දිමට හැකි තත්ත්වයක නැහැ.ඒ නිසා දිවා භෝජනය වන විට තවත් දින දෙක හමාරක් ඉතිරිව ඇති මෙම තරගයේදී ඉණිමක පරාජයෙන් බේරීමට ශ්‍රී ලංකාව කඩුලු 4 ක් දැවීම වළකා ගනිමින් ලකුණු 261 ක් රැස් කර යුතුයි.

ලකුණු 3 ට කඩුලු 3 ක් අහිමි කර ගනිමින් (ඩිල්ෂාන් - 0,මහේල - 0 සහ දිමුත් කරුණාරත්න -1) ඉණිම ඇරඹු ශ්‍රී ලංකාව වෙනුවෙන් දැනට ඉණිම බේරා ගැනීම සදහා ඉතිරිව ඇති එකම විශ්වාසවන්ත පිතිකරුවන් දෙදෙනා වන සංගක්කාර නොදැවී 22 ක් සහ මැතිව්ස් නොදැවී 17 ක් ලබා ගෙන සිටිනවා.

තරගයේ ලකුණු විස්තරයට පහත සබදතාවයෙන් පිවිසිය හැකියි.

http://www.espncricinfo.com/australia-v-sri-lanka-2012/engine/current/match/573012.html

www.supirikrida.com

සෝචි ගැන වහාම සොයා බලන්න - පුටින් අණ කරයි

පුටින් ගේ වහා මැදිහත් වීම (දකුණේ)

එළැඹෙන සීත සෘතු ඔලිම්පික් උළෙල 2014 දී පැවත්වෙන රුසියාවේ සෝචි නගරය ආසන්නයේ ඊයේ දෙවන වරටත් භූමි කම්පාවක් ඇති වූ අතර එය ඊට පෙර සිදු වූ ක්‍රඩා භූමි කම්පාවට වඩා විශාලත්වයෙන් වැඩි එකක් විය.එය සැළ වූ වහාම පුටින් අදාළ ප්‍රදේශයේ සංචාරයක නිරත වෙමින් හදිසි අවස්ථා පිළිබද කටයුතු ඇමති ඉරිනා ගොගොලේවා ට අණ කළේ ඔලිම්පික් තරගාවලිය පැවත්වීමට ඇති බිම පිළිබදව වහාම සොයා බලා වාර්තාවක් ලබා දෙන ලෙසයි.
ගොගොලේවා කරුණු දක්වමින් ප්‍රදේශයේ ඉදි කළ පාලම් මෙන්ම විදුලි සැපයුම් මාර්ග වලට ද මෙයින් කිසිදු හානියක් සිදු වී නැති බව සිය අමාත්‍යංශ සේවකයන්ගේ තොරතොරු හුවා දක්වමින් පැවසුව ද,ජනාධිපති පුටින් ප්‍රකාශ කළේ,විශේෂ අවධානය යොමු කර මේ තත්ත්වය පිළිබදව සියළුම තොරතොරු ඇතුළත් වාර්තාවක් ලබා දෙන ලෙසයි.දෙසැම්බර් 23 දා මෙන්ම ඊයේ ද මේ ප්‍රදේශයේ භු කම්පා ඇති වීම නිසා සෝචි ඉදිකිරිම් වල ස්ථාවරත්වය පිළිබදව ජාත්‍යන්තර ප්‍රජාවට විශ්වසනීය සහතිකයක් ලබා නොදුන්නොත් තරගාවලියේ සහභාගීත්වය අඩු විය හැකි අවධානමක් පවතින අතර ඒ නිසා තත්ත්වය පිළිබදව නිවැරදි වාර්තාවක් ලබා දීම අනිවාර්යය වන්නේය.
www.supirikrida.com

රණබිමෙන් ජපන්නුන්ට අන්දයි

ශ්‍රී ලංකාවට දකුණු ආසියාවේ ප්‍රථම බේස්බෝල් ක්‍රීඩාංගණය පරිත්‍යාග කරමින් සහ ක්‍රීඩා භාණ්ඩ ප්‍රදානය කරමින් සිටි ජපන් කනගාවා කණ්ඩායම ඇතුළු එරට බේස්බෝල් බේස්බෝල් ප්‍රේමීන් වෙනුවෙන් ශ්‍රී ලංකාවෙන් තිළිණ ලෙස ටී ෂර්ට් ප්‍රදානයක් කරන්නට මහනුවර රණබිම රාජකීය විද්‍යාලය විසින් පියවර ගෙන තිබීම ඇගයීමට ලක් විය යුතු කරුණකි.ක්‍රීඩාංගණය විවෘත කිරීම නිමිති කර ගනිමින් ශ්‍රී ලංකාවේ ප්‍රදර්ශන තරග කිහිපයකට සහභාගි වීමට සහ පුහුණු කදවුරු කිහිපයක් පැවත්වීම වෙනුවෙන් පැමිණි කනගාවා උසස් පාසල් ඇකඩමි බේස්බෝල් කණ්ඩායම සහ ජපන් දූත පිරිස ශ්‍රී ලංකාවේ බේස්බෝල් ක්‍රීඩාවේ උන්නතිය වෙනුවෙන් විශාල පරිත්‍යාගයක් කරද්දී මේ ආකාරයේ සමරු තිළිණයක් හෝ ලබා දීමට කටයුතු කිරීම වැදගත් සහ අගය කළ යුතු තත්ත්වයකි.
කෙසේ හෝ රණබිම පිටියේ සූදානම් කර තිබූ මහනුවර තරුණ කණ්ඩායම සහ කනගාවා කණ්ඩායම අතර තරගය වර්ෂාවට සේදී ගිය අතර ඔවුන් විසින් පවත්වන්නට යෙදුණු පුහුණු කදවුර පැවත් වූයේද රණබිම පිටිය සහ එම විද්‍යාලීය කායවර්ධන සහ ශක්තිවර්ධන ශාලාව ද ප්‍රයෝජනයට ගනිමින්ය.එම අවස්ථාවට මහනුවර ප්‍රදේශයේ බේස්බෝල් ක්‍රීඩාව පවතින ත්‍රිත්ව,සිල්වෙස්තර්,රණබිම රාජකීය,කිංස්වු2ඩ් සහ ධර්මරාජ විද්‍යාල වලට සම්බන්ධ 75 දෙනෙකු පමණ සහභාගි වූ අතර ඔවුන් අතර බෙදා දුන් ක්‍රීඩා භාණ්ඩ ද ඒ මොහොතේම සියළු දෙනා අතර බෙදා දෙන ලදී.
එසේම ශ්‍රී ලංකා බේස්බෝල් ක්‍රීඩාංගණය යථාර්තයක් කිරීම සදහා ඇප කැප වී ක්‍රියා කළ වත්මන් ශ්‍රී ලංකා ජාතික බේස්බෝල් පුහුණුකරු වටනබේ වෙනුවෙන් සමරු තිළිනයක් ප්‍රදානය කිරීමද එදින සිදු වූ අතර ඡායාරූපයෙන් දැක්වෙන්නේ එම අවස්ථාවයි.
www.supirikrida.com

ශ්‍රී ලංකාව තවත් පරාජයක් අභියස

මයිකල් ක්ලාක් ගේ නායකත්වය ඉදිරියේ වාර්තාගත ජයග්‍රහණයක් මෙන්ම වසරක් තුළ වැඩිම ලකුණු ප්‍රමාණයක් ලැබූ ඕස්ට්‍රේලියානු ක්‍රීඩකයා වීමේ අවස්ථාවත් මයිකල් ක්ලාක්ට හිමි කර දෙමින් මෙල්බෝර්න් නුවර ක්‍රියාත්මක දෙවන ටෙස්ට් තරගයෙන්ද ශ්‍රී ලංකාවට පරාජය වන්නට සිදුවනු ඇති බවට මේ වන පෙර නිමිති පහළ වෙමින් ඇත.ඕස්ට්‍රේලියානු වේගය ඉදිරියේ බිද වැටුණු මානසිකත්වයෙන් තරග වැදි ශ්‍රී ලංකා පිතිකරුවෝ කඩුළු පූජා කරමින් ලකුණු 156 ට දැවී ගිය පසු පිටියට  පැමිණි ඕස්ට්‍රේලියානු ආරම්භක පිතිකරුවන් ලකුණු 95 ක සබදතාවයක් පවත්වමින් හොද ආරම්භයක් ලබා දුනි.
නමුත් ලකුණු 117 වන විට ශ්‍රී ලංකාව තරගයට ප්‍රවේශ වෙමින් කඩුලු 3 ක් දවා ගත්තද ඉන් අනතුරුව පිටියට එකතු වූ මයිකල් ක්ලාක් සහ ෂේන් වොට්සන් දෙදෙන දෙවන දින දිවා භෝජනය වන විට ඕසට්‍රේලියානු ලකුණු පූවරුව ලකුණු 238 දක්වා රැගෙන ආවේ ශ්‍රී ලංකා පන්දු රකින්නන් විසින් දවා ගැනිමට තිබූ අවස්ථා දෙකක් මග හැරීමේ ආශිර්වාදය ද සමගය.සංගක්කාර සහ මහේල අතින් ගිලිහී ගිය එම අවස්තා දෙකේ වාසිය මැනවින් යොදා ගත් ක්ලාක් (56*) සහ වොට්සන් (60*) නොදැවී අර්ධ ශතක ලබා ගැනිමට සමත් වූ අතර ශ්‍රී ලංකාවට තවත් පීඩනයක් එල්ල කරමින් චානක වෙළගෙදරගේ සේවය ද අහිමි වී ගියේ ඔහු ව ආබාධයකට ලක් කරමින්ය.
මයිකල් ක්ලාක්, රිකී පොන්ටින් වසරක් තුළ වැඩිම ලකුණු ප්‍රමාණය වන 1544 තරග 15 දී ඉණිම 28 දී වාර්තා කර තිබුණු අතර ක්ලාක් මේ වසරේ තමා මුහුණ දෙන 11 වන තරගයේ 18 වන ඉණිමේ දී එම ලකුණු ප්‍රමාණය අභිබවා යාමේ භාග්‍යය උදා කර ගත්තේ මේ වසරේ ඔහුගේ ටෙස්ට් ඉණිමක සාමාන්‍ය ලකුණු ලබා ගැනීම 100 ට ඉහළින් තබා ගනිමින්ය.
ශ්‍රී ලංකාව ට ජය ගැනීමට අසීරු තරගයක් මෙන්ම පරාජය නොවී සිටීමට අසීරු තරගයක් බවට පෙරළෙමින් තිබෙන මෙම තරගයේදී අමතර පීඩනයක් එල්ල වෙමින් චානක වෙළගෙදර සහ ප්‍රසන්න ජයවර්ධන ආබාධ වලට ලක් වී තිබීම නිසා දෙවන ඉණිමේදී බොහෝ විට කඩුලු 8 ක් අතැතිව පන්දුවට පහර දීමට විය හැකි තත්ත්වයට පත් වී ඇත.
තරගයේ ලකුණු විස්තරයට පහත සබදතාවයෙන් පිවිසිය හැකිය.
http://www.espncricinfo.com/australia-v-sri-lanka-2012/engine/current/match/573012.html

www.supirikrida.com

අයර්ලන්තයේ ක්‍රීඩා රැජිණ සම්මානය බොක්සිං තරුව 'කැතී' ට

දෙසැම්බර් 25 වන දා නත්තල් රාත්‍රිය ආලෝකමත් කරමින් අයර්ලන්ත ක්‍රීඩා කවුන්සිලය විසින් සංවිධානය කරන්නට යෙදුණ ක්‍රීඩා තරු ඇගයීමේ සම්මාන උළෙලේ දී ‍ලොව ප්‍රථම කාන්තා ලයිට්වේග්ට් බොක්සිං ඔලිම්පික් රන් පදක්කම්ලාභිණිය වූ කැතී ටේලර් වසරේ දක්ෂතම අයිරිස් ක්‍රීඩිකාව ලෙස සම්මානනීය වූවා ය.ඇය 2012 ලන්ඩන් ඔලිම්පික් උළෙලේදී රුසියාවේ සොෆ්යා ඔචිගාවා පරාජය කරමින් ලකුණු 10 - 8 ක් ලෙස එම ඓතිහාසික රන් පදක්කමේ උරුමක්කාරිය වූවාය.
ලොව සිටින සුපිරිතම බොක්සිං ක්‍රීඩිකාවක ලෙස පතල කැතී ටේලර් සිව් වරක් ලයිට්වේග්ට් බර පංතියේ ලෝක සූරිය මෙන්ම පස් වරක් යුරෝපීය සූරිය ලෙස කිරුළු පැළදි ක්‍රීඩිකාවකි.තවමත්  26 හැවිරිදි කැතී ඉදිරියේදී බොක්සිං කවය තුළ තවත් බොහෝ වෙනස්කම් කළ හැකි ක්‍රීඩිකාවක් ලෙස ‍ජගත් බොක්සිං විචාරකයන්ගෙන් පැසසුම් ලබන ක්‍රීඩිකාවකි.
www.supirikrida.com

සුපිරි ක්‍රීඩා බේස්බෝල් අනාවැකිය ගාල්ලේදී තහවුරු වෙයි

ජපන් ආධාර ඇතිව ශ්‍රී ලංකාවට ලැබුණු බේස්බෝල් ක්‍රීඩාංගණය විවෘත කරමින් එම ක්‍රීඩාංගණය ආශ්‍රිතව ක්‍රියාත්මක වූ බේස්බෝල් තරග ආශ්‍රිතව සුපිරික්‍රීඩා දැක් වූ අදහස් සනාත කරමින් ජපාන කනගාවා උසස් පාසල් ඇකඩමි කණ්ඩායම දැඩි අසීරුතාවයකට ලක් කළ ගාලු තරුණ ක්‍රීඩකයෝ එම කණ්ඩායමට ප්‍රබල තර්ජනයක් එල්ල කරමින් ලකුණු 6 - 7 ක් ලෙස පරාජය වැළද ගත්හ.ක්‍රීඩාංගණය විවෘත කරමින් පැවති තරගයේදී ශ්‍රී ලංකා තරුණ කණ්ඩායම ජපන් කනගාවා කණ්ඩායම අතින් ලකුණු 3 - 0 ක් ලෙස පරාජයට පත් වූ අතර අනතුරුව සභාපතිගේ කණ්ඩායම ලෙස තරග වැදි ශ්‍රී ලංකා කණ්ඩායම ලකුණු 11 - 4 ක පරාජයක් ලැබීය.අනතුරුව බේස්බෝල් පරිපාලනය ගත් දුර්වලම තීරණයේ වර්ගපලය ප්‍රදර්ශනය කරමින් අවුරුදු 19 න් පහළ සූරයන් ලෙස සළකා නාලන්දාවට පමණක් ලබා දුන් අවස්ථාවේ ප්‍රතිපලය නිමාවට පත් වූයේ ලකුණු 28 - 1 ක් ලෙස අන්ත පරාජයක් ශ්‍රී ලංකා බේස්බෝලයට අත් කර දෙමින්ය.
එහිදී සුපිරි ක්‍රීඩා අදහස් කිහිපයක් ඉදිරිපත් කරමින් කියා සිටියේ කාලයකින් අලුත් තේරීමක් සිදු නොවී තිබෙන ශ්‍රී ලංකා බේස්බෝල් කණ්ඩායමේ වෙනසක් සිදු වී තරුණ පිරිසට කණ්ඩායමට ඒමට අවස්ථාවක් තිබිය යුතු බවය.එසේම නාලන්දාව වැනි ශ්‍රී ලංකාවේ අවුරුදු 19 න් පහළ කණ්ඩායමක් එම වයසේ ජාතික සූරතාවය දිනූ පමණින් උසස් බේස්බෝල් සංස්කෘතියක් ඇති රටක කණ්ඩායමකට එරෙහිව ඉදිරිපත් නොකර දක්ෂතාවයන්ගෙන් පරිපූර්ණ කණ්ඩායමක් ඉදිරිපත් කිරීමට තිබුණු බවද අප පැහැදිළි කළේය.ඒ හරහා ශ්‍රී ලංකා බේස්බෝල් ක්‍රීඩාවේ ගෞරවය ආරක්ෂා කර ගන්නට තිබුණු බවද පැහැදිළි කළේය.
ගාල්ලේදී ඒ බව අපූරුවට සාක්ෂි සහිතව සනාත විය.ගාල්ලේදී ලැබුණු අවස්ථාව පාසලක් විසින් අයිති කර ගත්තේ නැත.එය එහි ප්‍රධාන වශයෙන් බේස්බෝල් ක්‍රීඩා කරන පාසල් ත්‍රිත්වය වන ගාල්ල සිරිධම්ම,රිච්මන්ඩ් සහ මහින්ද යන පාසල් ත්‍රිත්වයේ දක්ෂයන්ට හිමි වී තිබිණ.එම ත්‍රිත්වයෙන් පෙරී ආ ස්ප්‍රීතුවක් වූ ගාල්ල කණ්ඩායමට ඇතුළත් වූයේද තාරුණ්‍ය නියෝජනය කරන අවුරුදු 19 න් පහළ ක්‍රීඩකයන්ය.
මේ තත්ත්වය කොළඹදී ද සිදු වූවා නම් ගාල්ලේදී වූ දෙයම නොවුනද යම් අභියෝගයක් එල්ල කරන්නට තිබිණ.එසේම එක පාසලක ක්‍රීඩකයන්ට අත් වූ අවස්ථාව කොළම බේස්බෝල් ක්‍රීඩා කරන පාසල් වන කොළඹ ආනන්ද,ඩීඑස් සේනානායක,රාජකීය වැනි විද්‍යාල අතර බෙදී යන්නට ද කොළඹ පාසල් අතර සිටින දක්ෂතම තරුණ ක්‍රීඩක කණ්ඩායමට එම අවස්ථාව හිමි වීමට ද තිබිණ.
ඒ නිසා සුපිරික්‍රීඩා මෙම තරගාවලිය හරහා කළ අදහස් ඉදිරිපත් කිරීම පැහැදිළිය.ජපානය වැනි කණ්ඩායමකට මුහුණ දීමට  දක්ෂයන්ගේ එකතුවක් ඉදිරිපත් කළ යුතුව තිබිණ.එසේම ශ්‍රී ලංකා බේස්බෝල් කණ්ඩායමට ප්‍රවේශ වීම සදහා තරුණයන් විසින් කරන පීඩනයට අවනතව වහාම සංචිත ගත කිරීමක් සහ තේරීමක් සිදු විය යුතුය.
මේ තත්ත්වය පැහැදිළි කළ ගාලු තරගයේදී ගාල්ල කණ්ඩායමට ඇතුළත් වූ මහින්ද විද්‍යාලයේ කසුන් කුමාර ජපන් කණ්ඩායමේ 'පිචර්' ලෙස කටයුතු කළ සයිතෝ ව අභියෝගයට ලක් කරමින් එල්ල කළ හෝම් හිට් ප්‍රහාරය මෙන්ම,ජපන් කණ්ඩායමේ තවත් 'පිචර්' වරයෙකු ලෙස ක්‍රියා කළ මියෙදා ට එරෙහිව ගාල්ල රිච්මන්ඩ් විද්‍යලයෙන් ගාලු කණ්ඩායමට එකතු වූ කාවින්ද රාජරත්න එල්ල කළ හෝම් හිට් පහර ද විෂේශ තැනක් ගත්තේය.
එම අවස්ථාවට ගාල්ල දිස්ත්‍රික්කයේ සියළුම පිරිස් කැදවා ජපානයෙන් ලැබුණු ආධාර එම අවස්ථාවේදීම බෙදා අවසන් කරන්නට කටයුතු සකස් කර තිබීම අගය කළ යුතු අතර එසේම පවත්වන්නට යෙදුණ පුහුණු කදවුරට ගාල්ල ප්‍රදේශයේ 50 ක් පමණ සහභාගි වීම ද කැපී පෙණින.තරගය සහ පුහුණු කදවුර රුහුණු විශ්ව විද්‍යාලයේ ඉංජිනේරු පීඨයේ ක්‍රීඩාංගණයේදී පැවත්විණ.
www.supirikrida.com

නැට්ට ලී දෙබලේ දා ගෙන කූඤ්ඤය ගලවන වදුරාගේ භූමිකාවට රග දක්වන ක්‍රිකට් ආයතනය

ශ්‍රී ලංකාව සහ ඕස්ට්‍රේලියාව අතර ටෙස්ට් තරගාවලිය පැවත්වෙන අතර ශ්‍රී ලංකා නායකයාගෙන් සහ කණ්ඩායම් කළමණාකරුගෙන් නිදහසට කරුණු විමසන බවට ප්‍රකාශ කරමින් පරිපාලනයක් විසින් රට වෙනුවෙන් තරග වදින කණ්ඩායමකට පීඩනයක් ඇති කිරීමේ මුග්ධ තීරණයක් ගැනීමට ශ්‍රී ලංකා ක්‍රිකට් ආයතනය තීරණය කර ඇත.ඊට හේතුව ලෙස ක්‍රිකට් ආයතනය විශ්වාස කළ නොහැකි ආයතනයක් බවට මහේල ජයවර්ධන විසින් ක්‍රිකට් ආයතනයට එවා ඇති ලිපිය යි.
මහේලගේ එම ලිපියට පදනම වූයේ ක්‍රීඩකයන්ට ලෝක කුසලානය වෙනුවෙන් හිමි විය යුතු මුදලින් කණ්ඩායමට සේවය ලබා දීමේ ප්‍රමාණය සළකා සහය සේවකයන්ට ක්‍රීඩකයන්ට හිමි වරප්‍රසාද මුදලින් යම් මුදලක් ගෙවන ලෙස මහේල විසින් ශ්‍රී ලංකා ක්‍රිකට් ආයතනයට දන්වා එවූ ලිපිය පිළිබද තොරතොරු ක්‍රිකට් ආයතනය හරහා මාධ්‍යයට එළිදරව් වීමයි.එම හෙළිදරව් වීම පිළිබදව පරීක්ෂණයක් කිරීම වෙනුවට සහ එවැනි පෞද්ගලික කරුණක් හෙළිදරව් වීම පිළිබද පරීක්ෂණයක් නොකර ඒ නිසා සිදු වූ විශ්වාසය බිද වැටීම පදනම් කරගෙන ආයතනය අවිශ්වාස තැනක් බවට ප්‍රකාශ කිරිම පිළිබදව  පරීක්ෂණයක් පවත්වන්න යාමෙන් තීරනාත්මක තරගාවලියකට සහභාගි වී සිටින කණ්ඩායම තුළ පීඩනයක් ඇති කිරීමට ක්‍රිකට් ආයතනය උත්සාහ කිරීමෙන් රටේ ක්‍රීඩාව සම්බන්ධයෙන් ඔවුන් දක්වන උනන්දුව පැහැදිළි කර ගැනීමට හැකිය.
මහේල සිය කණ්ඩායම් කළමණාකරුගේ විද්‍යුත් ලිපිනය හරහා ගණු - දෙනු කරමින් මෙම ලිපිය යොමු කර ඇති අතර ක්‍රීඩකයෙකු සාමාන්‍යයෙන් සිය පරිපාලනයට යම් දැණුම් දීමක් කළ යුතු විට කළමණාකරු හරහා දැණුම් දීම සාමාන්‍ය පරිපාටිය වෙනවා.ඒ ආකාරයට කටයුතු කිරීම නිසා  ක්‍රිකට් ආයතනය විසින් පවත්වන්නට යෙදෙන විනය පරීක්ෂණයේ දී කළමණාකරු චරිත් සේනානායක ද චූදිතයෙකු කිරීමට ක්‍රිකට් ආයතනය තීරණය කර තිබීම හාස්‍යජනක එකක් වෙනවා.
තමන් විසින් කරන ලද විශ්වාසය බිද දැමීමක් පිළිබදව තමන්ට දෝෂාරෝපනය කිරීම පිළිබදව, තමන්ගේ වරද නොතකා ඊට දෝෂාරෝපනය කරන පුද්ගලයා වරදකරු කිරිමට තැත් කිරීමේ කැකිල්ලේ තීන්දුව ජාත්‍යන්තරය ඉදිරියේ රග දක්වන්නට උත්සාහ කරන ශ්‍රී ලංකා ක්‍රිකට්,ජාත්‍යන්තර තරගාවලියක් තුළ මෙවැනි ක්‍රියාවන්ගෙන් තමන් පරිපාලනය කරන ක්‍රීඩාවම විනාශ වන බව නොදැන කටයුතු කරන්නේ,නැට්ට දෙබලේ දමා ගෙන කූඤ්ඤය ගලවන වදුරාගේ භූමිකාව සිහියට නගමින්ය.
www.supirikrida.com

සංගා ට 10000 යි

ශ්‍රී ලංකා ක්‍රිකට් ක්‍රීඩක කුමාර් සංගක්කාර ටෙස්ට් ලකුණු 10,000 සීමාවට පිවිසි දෙවන ශ්‍රී ලංකා ක්‍රීඩකයා බවට අද පත් වුණා.මීට පෙර මහේල ජයවර්ධන ශ්‍රී ලංකාව වෙනුවෙන් ටෙස්ට් ලකුණු 10.000 සිමාවට පැමිණි අතර අද ඔහු වැඩිම ටෙස්ට් ලකුණු ලාභින් අතර නව වන තැන පසුවන අතර සංගක්කාර ලොව 11 වැන්නා ලෙස පසු වෙනවා.
සිය 115 වන ටෙස්ට් තරගයට සහභාගි වන කුමාර් සංගක්කාර ලකුණු 10,000 සීමාවට පිවිසුණේ සිය 195 වන ටෙස්ට් ඉණිමේදීයි.බොක්සිං දිනයේදී ක්‍රියාත්මක වන මෙම ටෙස්ට් තරගයේදී දිවා භෝජනයට පෙර මිචෙල් ජොන්සන් විසින් යවන්නට යෙදුණ අවසන් ඕවරයේදී එල්ල කළ හතරේ පහරකින් සංගක්කාර සිය 10,000 වන ලකුණ ලබා ගන්නට සමත් වුණා.
ලකුණු 10000 සීමාවට පිවිසි ක්‍රීඩකයන් අතරින් හොදම ටෙස්ට් සාමාන්‍ය අතින් ජැක් කලිස් ට පමණක් දෙවැනිව සිටින සංගක්කාර,එම ක්‍රීඩකයන්ගේ හොදම පෞද්ගලික ඉණිම සළකා බලද්දී දෙවැනි වන්නේ බ්‍රයන් ලාරා (නොදැවී 400) සහ මහේල ජයවර්ධනට (374) පමණයි.සංගක්කාරගේ හොදම ඉණිම ලකුණු දකුණු අප්‍රිකාවට එරෙහිව රැස් කළ ලකුණු 287 ක් ලෙස සටහන් වෙනවා.වසර දෙකක්ම ලොව ජනප්‍රියතම ක්‍රිකට් ක්‍රීඩකයා වන්නට සමත් වූ සංගක්කාර අන්තර්ජාතික ක්‍රිකට් ප්‍රජාවගේ ඉමහත් ගෞරවයට පත් ක්‍රීඩකයෙකු ලෙස ශ්‍රී ලංකාවට විශාල කීර්තියක් එක් කර දුන් ක්‍රීඩකයෙක් ද වනවා.
www.supirikrida.com

බොක්සිං දිනයේ කාසියේ වාසිය මහේලට

ඕස්ට්‍රේලියාව සහ ශ්‍රී ලංකාව අතර බොක්සිං දිනය කේන්ද්‍ර කර ගනිමින් පැවත්වෙන ටෙස්ට් තරගයේ කාසියේ වාසිය දිනා ගන්නට මහේල ජයවර්ධන සමත් වුව ද,ඔහු මුලින් පන්දුවට පහර දීමට ගත් තීරනයේ වාසිය ලබා ගැනීමට දිවා භෝජනය වන තෙක් ශ්‍රී ලංකාවට හැකි වී තිබුණේ නැත.එම අවාසිදායක තත්ත්වයට මුල පුරමින් මෙම ටෙස්ට් තරගයේදී ඕස්ට්‍රේලියාව වෙනුවෙන් ටෙස්ට් වරම් ලැබූ ජැක්සන් බ්ර්ඩ් සිය මංගල කඩුල්ල ලෙස දිමුත් කරුණාරත්න ක්‍රීඩා පිටියෙන් ඉවත් කිරීමත් සමග තරගයේ මුල් කාර්තුවේ වාසිය ඕස්ට්‍රේලියාව දෙසට දෝලනය වන්නට විය.

බ්ර්ඩ් - මංගල ටෙස්ට් කඩුල්ලේ සතුට

අනතුරුව පළමු ටෙස්ට් තරගයට කැදවිම් නොලද මිචෙල් ජොන්සන් ටීඑම් ඩිල්ෂාන් ව දවා ගනිමින් ද,අනතුරුව පළමු ටෙස්ට් තරගයේ වීරයා වූ පීටර් සීඩ්ල් මහේල ජයවර්ධන දවා ගනිමින් ද ශ්‍රී ලංකා ලකුණු පූවරුව ලකුණු 37 ට කඩුලු 3 ක් බවට පත් කරන්නට  සමත් විය.එතැන් සිට ශ්‍රී ලංකාවේ කඩුලු බිද වැටීම ආරක්ෂා කරමින් පන්දුවට පහර දුන් කුමාර් සංගක්කාර දිවා භෝජනය වන විට නොදැවී 43 ක් ලබා සිටි අතර තිලාන් සමරවීර නොදැවී ලබා සිටි ලකුණු ප්‍රමාණය 10 කි.

අද ශ්‍රී ලංකාව වෙනුවෙන් පළමු ටෙස්ට් තරගයට ක්‍රීඩා කළ නුවන් කුලසේකර ක්‍රීඩා  නොකරන අතර එම ස්ථානය ධම්මික ප්‍රසාද් ට හිමි වී ඇත.ක්‍රීඩා කිරීම අවිනිශ්චිත තත්ත්වයේ  පැවති මයිකල් ක්ලාක් කණ්ඩායමට ක්‍රීඩා කරන අතර ඕස්ට්‍රේලියාව වෙනුවෙන් පළමු තරගයේ දකින්නට නොලැබුණු මිචෙල් ක්ලාක් සහ කෝඩුකාර ජැක්සන් බ්ර්ඩ්  ක්‍රීඩා කරනු ලැබේ.

තරගයේ ලකුණු විස්තරයට පහත සබදතාවයෙන් පිවිසෙන්න.

http://www.espncricinfo.com/australia-v-sri-lanka-2012/engine/current/match/573012.html

www.supirikrida.com

දියගමට ජපන් බේස්බෝල් සත්කාරයේ උණුසුම දැණුනු තවත් දවසක්

සුහද තරගයෙන්

ජපන් ආධාරයෙන් දකුණු ආසියාවේ ප්‍රථම බේස්බෝල් ක්‍රීඩාංගණයේ උරුමක්කාරයන් වන්නට භාග්‍යවන්ත වූ ශ්‍රී ලංකාවේ බේස්බෝල් ක්‍රීඩාවේ ප්‍රගතිය වෙනුවෙන් තවත් සත්කාරයන් රැසක් සිදු වූ වැඩසටහන් කිහිපයක් එම දියගම මහින්ද රාජපක්ෂ අන්තර්ජාතික ක්‍රීඩා සංකීරණයේ පිහිටි බේස්බෝල් පිටියේදී සිදු වුණා.එහිදී උදෑසනම ශ්‍රී ලංකා බේස්බෝල් සාමාජිකයන් සහ ජපන් සාමාජිකයන් එකට එක්ව මිත්‍ර බේස්බොල් තරග කිහිපයක නියැලි අතර අනතුරුව අවුරුදු 15 න් පහළ පාසල් සිසුන් වෙනුවෙන් බේස්බෝල් ක්‍රීඩාවේ මූලික දැණුම ලබා දෙන පුහුණු වැඩ සටහනක් සංවිධානය වුණා.

තරුණියන්ටත් මූලික දැණුම

ජාත්‍යන්තර විනිසුරු මඩුල්ල -වමේ සිට සුජීව විජේනායක,කොජියසෝ සහ පිරිස 

අනතුරුව පස්වරුවේ ජපාන අන්තර්ජාතික විනිසුරු සහ එරට බේස්බෝල් නීති සහ රෙගුලාසි සම්පාදන කමිටු සභාපති කොජියසෝගේ ප්‍රධානත්වයෙන් එරටින් සහභාගි වූ ඒ පිළිබද විශේෂ දැණුම සහිත පිරිසක් සහ ශ්‍රී ලංකාවේ එකම අන්තර්ජාතික විනිසුරු වන සුජීව විජේනායක සහභාගිත්වයෙන් විනිසුරුවන් පුහුණු කිරීමේ වැඩ මුළුවක් ක්‍රියාත්මක වුණා.එම පුහුණු වැඩ මුළුව අවසානයේ කොජියසෝ ගේ අත්සන ද සහිතව වටිනා සහභාගීත්ව සහතිකයක් එම වැඩමුළුවට සහභාගි වූ සියළු දෙනාටම පිරිනැමුණු අතර ජපානයෙන් ලැබුණු ක්‍රීඩා උපකරණ තොගයක් ජාතික කණ්ඩායමේ සහ අවුරුදු 18 න් පහළ ශ්‍රී ලංකා කණ්ඩායම නියෝජනය කරන කොළඹ දිස්ත්‍රික් ක්‍රීඩකයන් අතර බෙදා දිම සිදු කරන්නට යෙදුණා.

විනිසුරු වැඩ මුළුවෙන්

සහතිකපත් බෙදා දීමේ උත්සවයෙන්

මේ අතර ගාල්ල සහ මහනුවර දිස්ත්‍රික් ආශ්‍රිතව ඉදිරියේදී පැවත්වෙන මෙවැනි වැඩමුළු සහ සුහද බේස්බෝල් තරගාශ්‍රිතව එම දිස්ත්‍රික්කයන්හී සිටින ජාතික කණ්ඩායම සහ අවුරුදු 18 න් පහළ කණ්ඩායම නියෝජනය කරන ක්‍රීඩකයන් අතර ද මෙවැනිම ජපන් ආදාර සහිතව උපකරණ බෙදාදීමක් සිදු වන බව බේස්බෝල් සංගමයේ සංවිධායක දිනේෂ් පෙරේරා ප්‍රකාශ කර සිටියා.
ඡායාරූප - එස් සුන්දර්රාජ්
www.supirikrida.com

බේස්බෝල් අලුත් හිතීමක අවශ්‍යතාවය තහවුරු වෙයි

සභාපතිවරයෙකු නොමැති බව ජනමාධ්‍ය මගින් ප්‍රකාශ කරන අතරේම ඊයේ සභාපතිවරයාගේ කණ්ඩායම ලෙස ශ්‍රී ලංකා සංචිතයේ නායකයා විතරක් අඩුවෙන් ජපාන කනගාවා කණ්ඩායමට එරෙහිව තරග බිමට පිවිසි ශ්‍රී ලංකා කණ්ඩායම ලකුණු 11 - 4 ක පරාජයක් ලැබීය.කනගාවා රැස් කරන ලද එම ලකුණු ප්‍රමාණය ක්‍රීඩා පිටිය විවෘත කරමින් ශ්‍රී ලංකා තරුණ කණ්ඩායමට එරෙහිව ලැබූ ලකුණු 3 ට වඩා ලකුණු 8 ක් රැස් කිරීමක්ය.
එම තරගය සජීවි ව විද ගත් ඕනෑම අයෙකු තරගය නිම වන තෙක් කනගාවා ක්‍රීඩකයෝ තැති ගැන්මකින් ක්‍රීඩා කළ බව දුටූහ.ඒ නිසා පීඩනය ලකුණු 11 ක් තරම් දුර යෑමේදි මදක් හෝ සැහැල්ලු විය හැකි වුව ද,ලකුණු 3 සීමාවේදි ශ්‍රී ලංකා යොවුන් කණ්ඩායම ඉදිරියේ කනගාවා කණ්ඩායමට සැහැල්ලු විමට කිසිදු අවකාශයක් නොවිණ.

ශ්‍රී ලංකා සභාපතිගේ කණ්ඩායම සහ කනගාවා කණ්ඩායම

විශේෂයෙන් ශ්‍රී ලංකා නායක ක්‍රිෂ්න හපුආරච්චි සහ 2009 දී අවුරුදු 18 න් පහළ ආසියාවේ විශිෂ්ඨතම ක්‍රීඩකයා ලෙස පවා අභිෂේක ලැබූ මධුරංග ප්‍රියනාත් දැනටමත් ශ්‍රී ලංකා කණ්ඩායමේ සිටින අතර ඒ අතරට ඉතා ඉක්මණින් ජෙරුසනා සුබ්‍රමනියම්,රශ්මික විජයංග සහ ඉෂාර තෙන්නකෝන් ද එක් විය යුතු බව කණිෂ්ඨ ක්‍රීඩක දක්ෂතා විමසද්දී පැහැදිළි විය.මේ පිළිබදව විමසා බලද්දී කණ්ඩායම අලුත් වීමට අලුත් තේරීමකට මේ වන විට පියවර ගෙන නොමැති වීමේ අඩුව ඊට හේතුව විය හැකි බව පෙනෙන්නට තිබුණද,පෞද්ගලික න්‍යාය පත්‍ර වලින් බැහැරව ශ්‍රී ලංකාව පෙරමුණේ තබා කටයුතු කරන්නේ නම් එකම ක්‍රීඩකයාට කණ්ඩායම් කිහිපයකට ක්‍රීඩා කිරීමට ඉඩ ලබා දීමෙන් හෝ එවැනි අනීතික සහ සම්ප්‍රදායික නොවන තත්ත්වයන්ට පෙළඹීමෙන් වැළකී,මේ පිටිය යොදා ගෙන වැඩි වාරයක් තේරීම් තරග පැවත්වීම වටින්නේය.

නාලන්ද කණ්ඩායම සහ කනගාවා කණ්ඩායම
 ජාතික මට්ටමේ ක්‍රීඩා කිීමෙන් අත්දැකීම් ඇති කැපවීමෙන් ක්‍රියා කළ හැකි තේරීම් කමිටුවක් මගින් මේ තත්ත්වය ඇති කළ හැකි අතර බේස්බෝල් සංගමය පවත්වන තරගාවලි දෙකේදී ක්‍රීඩකයන්ට කණ්ඩායම් මාරු කර වෙනස් කණ්ඩායම් වලට එකම පිරිසකට ක්‍රීඩා කිරීමේ අවකාශ සැළසීමේ ‍විහිළුවෙන් නැවතී,දක්ෂ ක්‍රීඩකයන් තෝරා දක්ෂතම කණ්ඩායම් කිහිපයක් නිර්මාණය කර සංගමය මගින් තරග පැවත්වීම වටින්නේය.උදාහරණයකට උඩරට බ්ලූ සහ රෙඩ් ලෙස කණ්ඩායම් දෙකක් බටහිර යෙලෝ සහ ග්‍රීන්  ලෙස කණ්ඩායම් දෙකක් ලෙස ඒ ආකාරයට නම් කරන ලද දකුණ, වයඹ ආදි කණ්ඩායම් ද නම් කර මෙම තරගාවලිය පැවත්වීමට හැකියාව ඇත.

එය ඉතා ස්වාධින සහ විශ්වසනීය මට්ටමෙන් ද ඉහළ තරගාවලියක් මෙන්ම සැබෑ දක්ෂයන්ට බේස්බෝල් ජාතික කණ්ඩායම වෙනුවෙන් ක්‍රීඩා කිරිමට අවස්ථාව දිනා ගැනීමට කරන සාධාරණ පරීක්ෂණයක්ද වනු නිසැකය.

ජාත්‍යන්තර විනිසුරු සුජීව විජේනායක

නැවත කනගාවා දෙසට හැරීමේදී ඔවුන් ශ්‍රී ලංකා පාසල් සූරයන් වන නාලන්දාව පරාජය කළේ ලකුණු 28 - 1 ක් ලෙස ය.එය ඉතාම ඛේදණිය සහ පසුබස්නා සිතුවිලි ඇති කරන පරාජයක් විය.ලොව ඉහළම බේස්බෝල් සංස්කාතියක් ඇති රටක් ලෙස සැළකෙන ජපානයේ ඇකඩමි කණ්ඩායමක් යනු අපේ ජාතික කණ්ඩායමටත් ඉදිරියෙන් තිබෙන කණ්ඩායමක් බව තේරුම් ගැනීම අපහසු නැත.එය සභාපතිගේ කණ්ඩායම ලෙස ඉදිරිපත් වූ අපේ ජාතික කණ්ඩායමට අත් වූ ඉරණමෙන්ම පැහැදිළිය.
මෙය ජාතික බේස්බෝල් පරිපාලනය දන්නා දෙයකි.ඒ නිසා පරාජය ක්‍රීඩාවට ඇති උනන්දුව හීන කරන සහ මන්දෝත්සාහී පරාජයක් වීම වැළකිය යුතුය.
එවැනි තත්ත්වයක කනගාවා තරුණ කණ්ඩායමේ වයස මට්ටම සැළකිල්ලට අපේ පාසල් සූරයන්ට ඔවුන් හා තරග වැදීමට ඉඩ සැකසීම ළදරු පාසල් දරුවෙකු සහ උසස් පෙළ දරුවෙකු අතර මීටර් 100 තරගයක් පැවත්වීම වැනිය.හාවා සහ ඉබ්බා ගේ තරගයේදී මුග්ධ හාවා සිතූ සහ ක්‍රියා කළ ලෙස ක්‍රියා කරන්නට ජපානය නොසිතුවේ නම් මේ තරගයේ ඉරණම 28 - 1 ක් වීම සාමාන්‍ය දෙයක් බව බලධාරීන්ට නොතේරීම කණගාටුදායකය.

වටනබේ බේස්‍බෝල් ක්‍රීඩාංගණයේ සිහිනය සැබෑවක් කළ උත්තරීතර මිනිසා

ජාතික ක්‍රීඩකයන් කිහිප දෙනෙකුම ක්‍රීඩා කරන ශ්‍රී ලංකා විශ්ව විද්‍යාල කණ්ඩායම හෝ ක්‍රීඩා සමාජ සූරතාවය දිනූ කණ්ඩායම පිළිබදව නොසිතා හෝ නැතිනම් සභාපති ගේ හෝ ලේකම් ගේ කණ්ඩායමක් ලෙස නිර්මාණය කරන ලද කණ්ඩායමක් පිළිබදව නොසිතීමෙන් පරිපාලනය ශ්‍රී ලංකා බේස්බෝල් ක්‍රීඩාවට මෙන්ම නාලන්දයේ බේස්බෝල් ක්‍රීඩාවටද පරාජයට වඩා හානියක් කළ බව තේරුම් ගත යුතුය.
ජාතික පරිපාලනයක් සිය හෘදයාංගම බැදීම් වලින් මිදී ක්‍රියා කළ යුතුය.හැගීම් වලට වඩා බුද්ධියට ඉඩ දිය යුතුය.එසේම බලය යනු පාවාඩ සහ පිරුවට ය.සදාකාලික උරුමයන් නොවේය.ඒ තත්ත්වය තේරුම් ගෙන සිය දරු මල්ලන්ට සමාජ පූර්වාදර්ශයක් ලෙස සිය පියවරුන් සහ මව්වරුන් පිළිබදව ආඩම්බරයෙන් කතා කරන සමාජයක් ඉතිරි කර දීම පිලිබදව හැගිම්බර වන්නේ නම් එය වඩාත් බුද්ධිමත් තීරණයක් වනු සැක නැත.
අප අපට ලැබුණු අවස්ථා වෙන්දේසි කර අවසන් බැවින් එහි ලාභ අලාභ කතා කරන්නට යාම පල නැත.අලාභය රටට ද බලපාන බැවින් ඒ සම්බන්ධයෙන් එල්ල වන චෝදනා වේ නම් ඒවා ප්‍රතික්ෂේප කිරීම හෝ ඊට එරෙහිව කැරළි ගැසිමට වඩා වටින්නේ එහි යථාර්තයට අනුව කටයුතු කර බේස්බෝල් ක්‍රීඩාංගණයේ සැබැ ආශිර්වාදය දිනා ගැනිමය.මිලියන ගණනක සිහිනයක් අපට සැබෑවක් කර දෙන්නට ජපානය වෙහෙසුණ බව ඇත්තය.ඒ සිහිනය යථාර්තයක් වූ බිමේ අප වැඩි දුර  නොසිතා නිරුවතින් දිවගිය බවක් පෙනෙන්ට ඇත.
ජපානය, හිරෝසිමා - නාගසාකි  ‍ඛේදවාචකයෙන් නැගිටි රටකි.වසරකට ආසන්න කාලයකදි සුනාමි අනතුරෙන් යළි ඉපදී ඇත.ඔවුන් ඒ අතර අප වැනි රටවලට සහෘදත්වයේ උණුසුම් දෑත දිගු කරන්නෙමු.අප ඔවුන් නැගිට්ටේ කෙසේද යන්න තඹයකට මායිම් නොකර තවමත් අද දවසේ ජයග්‍රහණ පිලිබදව පමණක් සිතන අනාගතය පිළිබද බර සිහින නැති රටක් ලෙස හුරේ දමමින් සිටිමු.
ජපානයේ බේස්බෝල් යනු හුදෙකලා වික්‍රමයක් නොවන එහි දේශපාලන යාන්ත්‍රණයේ පිබිදීම ප්‍රකාශ කරන කොටසක් බව සිතන්නට දේශපාලනික වූ දැක්මක් සහ පදනමක් බේස්බෝල් පරිපාලනයට ඇවැසිය.
එවිට රටක ක්‍රීඩාව සෙල්ලමක් නොවන ජාතික සංවර්ධනයේ සැළසුම් සහගත විෂය ධාරාවක් බව වැටහෙනු ඇත.ඒ තුළ කිසි විටෙක මගේ යන්න වෙනුවට අපේ යන්න ප්‍රකාශ වන්නේ එවිටය.ජයග්‍රහණ මගේ සීමාවෙන් එපිට වඩා පුළුල් අපේ ඒවා බවට පත්වන්නේද එවිටය.මෙය ලංකාවේ බේස්බෝල් වලට පමණක් නොව සියළු ක්‍රීඩාවන්ටද අදාළ විය හැකිය.
ඡායාරූප - එස් සුන්දරරාජන්
www.supirikrida.com

ලංකාවට එරෙහිව ඕස්ට්‍රේලියාවෙන් කුරුළු වේගයක්

ෂේන් වෝන් සහ මුත්තයියා මුරලිදරන් කුසලානය සදහා ශ්‍රී ලංකාව සහ ඕස්ට්‍රේලියාව අතර පැවත්වෙන ටෙස්ට් තරගාවලියේ දෙවන ටෙස්ට් තරගයට ඔස්ට්‍රේලියාව නව වේග පන්දු යවන්නෙක් හදුන්වා දීමට සූදානමින් සිටියි.ජැක්සන් බර්ඩ් නම් 26 හැවිරිදි එම වේග පන්දු යවන්නාගේ සහභාගීත්වය මේ වන විටත් ඔස්ට්‍රේලියානු පුහුණුකරු විසින් සනාත කර ඇති අතර වර්ථමානයේදි ටස්මේනියා ප්‍රාන්තය නියෝජනය කරමින් පළමු පෙළ තරග වලට සහභාගි වන්නෙකි.පළමු පෙළ ක්‍රිකට් තරග 17 ක් සදහා පමණක් සහභාගි වී ඇති බර්ඩ් එම තරග 17 තුළ කඩුලු 87 ක් දවා ගෙන ඇත.
හය වතාවක්ම ඉණිමකදී කඩුලු 5 සීමාවට පැමිණ ඇති ජැක්සන් බර්ඩ් දෙවතාවකදීම තරගයකදී කඩුලු 10 සීමාවට පැමිණ ඇත.ඒ නිසා ශ්‍රී ලංකාවට එරෙහිව ජැක්සන් පළමු වරට ටෙස්ට් වරම් දිනා ගත්තද ශ්‍රී ලංකාවට එරෙහිව ඔහු භාවිතා කරන වේගය සහ ඉලක්කය නම් ශ්‍රී ලංකාවට පහසුවෙන් මුහුණ දිය හැකි තත්ත්වයක තිබෙනු ඇතැයි සිතීම අපහසුය.
www.supirikrida.com

සචින් එක්දින වාර්තා පොත වසා දමයි

ලොව එක්දින වැඩිම තරගලාභියා,ලකුණුලාභියා මෙන්ම ශතකලාභියා ලෙස ද වාර්තා පොත අලුත් කරමින් සිටි සචින් තෙන්දුල්කාර් සහභාගි වන සෑම අන්තර්ජාතික එක්දින තරගයකදීම වැඩිම එක්දින තරගලාභියාගේ වාර්තාව අලුත් කිරිමට සිදු වූවත් සචින් එම තත්ත්වයට නැවතුම තබමින් එක්දින පිටියෙන් නික්ම යන්නට තීරණය කළේය.නික්ම යන විට වසර 23 ක් සපිරී තිබූ සචින් ගේ එක්දින දිවිය ඇරඹෙන්නේ 1989 දෙසැම්බර් 18 දා ය.ඔහු ඉන්දියාව වෙනුවෙන් එක්දින වරම් ලැබූ 74 වැන්නා විය.
ශතක 49 ක් රැස් කර ගත් සචින්,අර්ධ ශතක 96 ක් රැස් කර ඇත.පන්දු යවන්නෙකු ලෙස ද කැපී පෙ‍ණුන සචින් කඩුලු 154 ක් දවා ගෙන ඇති අතර පන්දු යැවීමේන් ඔහු තරග දෙකකදී ම කඩුලු 5 බැගින් දවා ගන්නට සමත් විය.වැඩිම එක්දින ලකුණුලාභියා ලෙස ලකුණු 18,426 ක් රැස් කර තිබූ සචින්,ඉණිමකදී ලබා ගත් වැඩිම ලකුණු ප්‍රමාණය 200 කි.කඩුලු 100 ට වැඩි ප්‍රමාණයක් ලබා ගනිමින්,උඩ පන්දු 140 ක් රැක ගනිමින් තරග 463 දී සචින් දක්වා ඇති තුන් ඉරියව් දක්ෂතාවයද ලෙහෙසි පහසු එකක් නොවේය.
ඉන්දීය ක්‍රිකට් ලෝලීන් ආගමක් සේ අදහන ක්‍රිකට් හී දෙවියන් ලෙස සැළකෙන සචින් අද එරට සෙනෙට් සභාවේ මහජන නියෝජිතයෙකු ලෙස පාළක කොංග්‍රස් පක්ෂය විසින් නම් කර ඇත්තේය.සිය පියා මහාචාර්යවරයෙකු වූ බැවින් සිය පුතා පොත මත ඇලවිම වෙනුවට පුතුගේ හැකියාවට සරිලන ගමණ යාමට ඉඩ දීමට ඔහු බුද්ධිමත් වූ අතර එය තමන්ට පමණක් නොව ලෝකය ඉදිරියේ ඉන්දියාවටම ආඩම්බරයක් විය හැකි තීරණයක් බවට පත් විය.ශ්‍රීමත් ඩොනල්ඩ් බ්‍රැඩ්මන්ට පමණක් දෙවැනි අසහාය පිතිකරුවා ලෙස ලෝක ක්‍රිකට් ප්‍රජාව ඉදිරියේ ගරු බුහුමන් ලැබීමට සමත් වූ සචින්,ඉන්දියාවට පමණක් නොව ක්‍රිකට් ලෝකයටම පහළ වූ වීරයෙකු ශ්‍රේෂ්ඨයෙකු ලෙස ක්‍රිකට් ඉතිහාසය තුළ සදාතනිකව රැදෙනු ඇත.ඔහු කළ බොහෝ දේ යලි දිනයක විය හැකි වුවත් ඒ බොහෝ දේ පළමුව කිීමේ අපූර්ව ගුණය දිනූ තැනත්තා ලෙස සචින් සදාකාලිකවම ක්‍රිකට් වංශ කතාව තුළ අපූර්ව ක්‍රීඩකයෙකු ලෙස වැජඹෙනු නිසැකය.
www.supirikrida.com

දකුණු ආසියාවේ පළමු බේස්බෝල් ක්‍රීඩාංගණය විවෘත වෙයි

දකුණු ආසියාවේ පළමු බේස්බෝල් ක්‍රීඩාංගණය දියගම මහින්ද රාජපක්ෂ ක්‍රීඩා සංකීරණයේ දී විවාත විය.ජනාධිපති මහින්ද රාජපක්ෂ ක්‍රීඩාංගණයේදී විවාත වූ මෙම ක්‍රීඩාංගණයේ විවෘතය ජනාධිපති මහින්ද රාජපක්ෂයන් අතින් සිදු වන්නට තිබුණ ද එය සිදු වූයේ ඔහු පුත් පාර්ලිමේන්තු මංත්‍රී නාමල් රාජපක්ෂයන් අතින්ය.ඊට රජයේ කැබිනට් ක්‍රීඩා ඇමති මහින්දානන්ද අලුත්ගමගේ, අධ්‍යාපන ඇමති බන්දුල ගණවර්ධන ඇතුළු මැති ඇමතිවරු රැසක් එක් වූහ.විශේෂ ආරාධිතයා වූයේ ජපාන තානාපති නොබොහිටෝ හොබෝ ය.
ක්‍රීඩා පිටිය විවෘත කරමින් පළමු පන්දු පහර නාමල් රාජපක්ෂ මංත්‍රීවරයා විසින් එල්ල කරන්නට යෙදුණ අතර පන්දුව යොමු කළේ,ජපාන තානාපති හොබෝය.මංගල තරගයට ශ්‍රී ලංකා තරුණ පිළට එරෙහිව ක්‍රීඩා කළ කනගාවා උසස් පාසල් ඇකඩමි කණ්ඩායම සමරු තිලිණයක් ප්‍රදානය කරන්නට යෙදුණ අතර එය එම කණ්ඩායම් කළමනාකරු විසින් පාර්ලිමේන්තු මංත්‍රී නාමල් රාජපක්ෂ වෙත ප්‍රදානය කරන්න යෙදිණ.

නාමල් මංත්‍රීවරයා පහර දෙනු බලි සිටින්නේ අමාත්‍ය බන්දුල ගුණවර්ධනය.ජාත්‍යන්තර තරග විනිසුරු සුජීව විජේනායක පසුපසින් වේ 

තරගයේ දී ශ්‍රී ලංකා තරුණ කණ්ඩායම කනගාවා කණ්ඩායම හා සම මට්ටමක නැති බව හැගුණේ පන්දුවට පහර දීමේදීය.ශක්තිය මෙන්ම පිතිකරුවන් ධාවනයේදී දක්වන ලද මන්දගාමීත්වය ද නොවන්නට තවත් බොහෝ දේ වෙනස් වන්නට තිබිණ.ඒ සදහා අතිරේක වශයෙන් ලැබෙන විටමින් පෙත්තකවත් අනුග්‍රහයක් නොලබන ශ්‍රී ලංකා ක්‍රීඩකයන්ට ඒ වරප්‍රසාද ලබා ගැනීම සදහා අවශ්‍යය මග පෙන්වීමේ කාර්යය කළ සුපිරි ක්‍රීඩා පුවතට පසු මේ වන විට ශ්‍රී ලංකා ක්‍රීඩා වෛද්‍ය ආයතනයේ ලියාපදිංචි  වී සිටින බේස්බෝල් ක්‍රීඩකයන් ඒ සමගම ක්‍රීඩා සංවර්ධන දෙපාර්තමේන්තුවට අයත් ශක්තිවර්ධන සහ කායවර්ධන පහසුකම් ද ලබා ගැනීමෙන් ඉක්බිතිව මෙම පරතරය අඩු කර ගන්නට හැකියාව ලැබෙනු ඇතැයි අප විශ්වාස කරමු.

ආසියාවේ පළමු බේස්බෝල් ක්‍රීඩාංගනයේ විවෘත වීම.වමේ සිට බස්නාහිර පළාත් සභා අමාත්‍යවරුන් වන ගාමිණි තිලකසිරි සහ උපාලි කොඩිකාර,මංත්‍රි නාමල් රජපක්ෂ,අමාත්‍ය බන්දුල ගුණවර්ධන,ජපාන තානාපති නොබිහිටෝ හොබෝ සහ ක්‍රීඩා අමාත්‍ය මහින්දානන්ද අළුත්ගමගේ 

එතැනින් මෙපිට සිට පන්දු රැකීමේදී මෙන්ම ශිල්පීය වශයෙන්ද ශ්‍රී ලංකා තරුණ ක්‍රීඩකයෝ පෑ හපන්කම් මත තරගය 3 - 0 ට පරාජය වුව ද සතුටු විය හැකි දක්ෂතා ප්‍රදර්ශනය කරන්නට ලාංකේය ක්‍රීඩකයන් සමත් වුණා.ලබා ගත් ලකුණු 3 න් ලකුණු දෙකක්ම දයිසුකේ ඇබේ විසින් රැස් කරන්නට යෙදුණ අතර යුමා නිෂිඩා ඉතිරි ලකුණ ලබා ගත්තා.තරගය වට අටක් ක්‍රියාත්මක වුණා.
ශ්‍රී ලංකා කණ්ඩායම වෙනුවෙන් පන්දු යොමු කිරීමට කටයුතු කළ මධුරංග මෙන්ම නායකත්වය දරමින් කටයුතු කළ ක්‍රිෂ්න හපුආරච්චි ද කැපී පෙනෙන දක්ෂතා දැක් වූවා.
තරගය විනිශ්චය කිරීමට සහභාගි වූයේ ශ්‍රී ලංකාව සතු එකම අන්තර්ජාතික විනිසුරු වන සුජීව විජේනායකයි.ඔහු ක්‍රීඩාංගණයේ ඉදිකිරීම් වෙනුවෙන් සිය ආයතනය හරහා මිලියන 8.5 ක මුදලක් මේ ක්‍රීඩාංගණය සදහා සොයා දීමට මැදිහත් පුද්ගලයාද වූවා.මෙහිදී සංවිධානයේදී වූ යම් යම් දුර්වලතා නිසා සුජීවට යම් අපහසුතා වලට මුහුණ දීමට සිදු වූවා.ඒ මොහොතේ ඔහු සමග සිටීමෙන් ඔහු විදින අපහසුව පසෙකලා ඔහු සම්භන්ධයෙන් වාර්තා වැඩ සටහනකට කරුණු එකතු කර ගන්නට පැමිණි ජපාන රූපවාහිනි මාධ්‍යවේදීන් ඉදිරියේ ලංකාව හෑල්ලු වීම වළකා ගන්නට මේ ලියුම්කරුට හැකි වුණා.
එහෙත් ජනාධිපති ආරක්ෂක අංශයේ නිලධාරීන් පූර්ව දැණුම් දිමක් නොකර තිබීම ගැන කම්පා වෙමින් රටේ ගෞරවය මෙන්ම එහි ගරු කළ යුතුම පුද්ගලයෙක් බවට සුජීව පිළිගැනීමෙන් කටයුතු කිරීම අගය කළ යුතුයි.
ක්‍රීඩාංගණයට ඇතුළු වීමට ඉහළම නිලධාරීන් කැමැත්ත දුන්නද එය නොරුස්සනා ගතියෙන් හැසිරි එක් නිලධාරියෙක් හැරෙන්න අන් සියළු දෙනාම මා විසින් ඒ පිලිබදව කරුණු පහදා දුන් අවස්ථාවේ එය ඉතා සතුටින් භාර ගැනීම ප්‍රශංසාත්මකයි.වාහනය නැවත්වීමේ දී එය මැති ඇමතිවරුන්ට වෙන් කළ සීමාවක් බැවින් වාහනය ඉවත් කර ගන්නා බව කී විට එම නිලධාරියාට මෙම ක්‍රීඩාංගණය පැමිණෙන දේශපාලකයන්ට එය විවෘත කිරීම සදහා ක්‍රීඩා පිටිය තනන්නට මුල් වූ සහ තරගයේ ප්‍රධාන විනිසුරු සුජීව බව පෙන්වා දුන් විට ඔහු ඉතාමත් නිහතමානීව වාහනය නැවතීමට අවශ්‍යය පසුබිම සකසා දුන්නා.
මේ තත්ත්වය ආරක්ෂක අංශවල අඩු-පාඩු කම් නිසාම පමණක් සිදුවන්නක් නොවන බව කිව යුතු අතර ඉසව් සංවිධානයේදී ඒ අය සිය අවශ්‍යයතා පිලිබදව මීට වඩා ඔවුන්ව දැනුවතත් කර පහසුකම් ලබා ගැනීමට අවධානය යොමු කළ යුතුය.
www.supirikrida.com

නියමයි - වටනබේ

යම් යම් අය අනුන්ගේ ලියැදි වලට ද පැන අල්ලා වගා කරති.අස්වැන්න  නෙලා ගෙන පලා යති.ඇතැම් විට බිම් කඩේ හිමිකරුට ශත පහක හිමිකමක් නෙලැබෙන්නේය.නමුත් අනුන්ගේ ලියැද්දක් දහදිය හෙලා වගා කර අස්වැන්න ද ඒ බිමේ හිමිකරුටම දී දෑත් පිසලා හිනා වෙන මිනිස්සු වෙයිද?
වටනබේ එවැන්නෙකි.මහින්ද රාජපක්ෂ අන්තර්ජාතික ක්‍රීඩා සංකීරණයේ අභිනවයෙන් ඉදි වූ බේස්බෝල් ක්‍රීඩාංගණයේ හීනය සැබෑවක් කරන්නට සිහිනය දැකීමේ සිට යථාර්තයක් වන තෙක් ඇප කැප වූ මිනිසා ඔහුය.වත්මන් ශ්‍රී ලංකා ජාතික පුහුණුකරු ද ඔහු ය.
ඔහු මෙරට පුහුණුකරු ධූරය සමග මෙරට හා කෙතරම් බැදී යද්ද යන්න වඩාත් පැහැදිළි වූයේ ක්‍රීඩාංගණය විවෘතයේදී ඔහු බොහෝ හැගීම්බර ලෙස ශ්‍රී ලංකා ජාතික ගීය කට ඇර ගායනා කරද්දීය.සිය දෙවන ජාතියද පළමු ජාතිය කොට සිතා මෙරට ක්‍රීඩාවේ අභිවෘද්ධිය පිණිස ඔහු විසින් කරවන්නට මග පෑදු මේ ක්‍රීඩාංගණය යථාර්තයක් වූ මොහොතේ මොකද්ද දැනෙන හැගීම යැයි මම ඔහුගෙන් විචාළෙමි.සතුටුයි යනුවෙන් පවසා එය දැනෙන තරමින් විස්තර කරන්නට ඔහු සතු පටු සිංහල ශබ්ද කෝෂයේ වචන හාරා අවුස්සන්නට වුව ද ඒ සිංහල කිව හැකි අදහසට ප්‍රමාණවත් නොවන බව මට හැගිණ.අනතුරුව ඔහු ඒ සියල්ල හැඩුම්බරව සහ හැගුම්බරව එක වචනයකින් මුදා හළේ ඔහුගේ දැණුමට සාපේක්ෂව ඒ හොදම වචනය වන බව හැගුණ නිසාවෙන් විය යුතුය.එය 'නියමයි' නම් විය.
ඇතැමෙක් ඔහු මෙම ක්‍රීඩාංගනයේ ඉදිකිරීම් කරන කළ මාධ්‍ය පවා නොමග යවමින් මෙම ඉදිකිරීමට අදාළ වැසිකිළි වලත් නැවත ඔහු රැගෙන යන බවට  පළ කළද එවැනි ජරා සිත් ඇත්තවුන්ට එය ක්‍රීඩාංගණයේ නොවපුළ වැසිකිළියේම වපුළ හැකි පරිදි වටනබේලා වැසිකිළිද තනා දෙනු ඇත.ඒවා පිට කරන්නට මිස අනුභව කරන්නට නොවන බව වටනබේලා වැනි මිනිසුන්ගෙන් හෝ අප උගත යුතුය.
"මම වැදගත් නෑ මගේ රට වෙනුවෙන් මම මේ රටට මේ ග්‍රවුන්ඩ් එක දෙන්න වැඩ කළා.මම රටවල් දෙකටම ආදරෙයි."
වටනබේ විදිහට හිතන්නට තරම් පොහොසත් පරාර්ථයක් නැති වුව ද කම් නැත.සිය මව් රටට පමණක් හෝ ආදරය කළ හැකි පමණට සිය බඩ වියත හරහා කේන්ද්‍රීයව තිබෙන හැගීම පෝෂනය කර ගැනීමට හැකිනම්,වටනබේ ට ගල් ගසනු වෙනුවට මල් පුදනු සැක නැත.අඩු - පාඩු හිත් රිදවීම් තිබිය හැකිය.එහෙත් මේ විදේශිකයා ලංකාවේ බොහෝ දෙනෙකුට කළ හැකිව තිබුණ ද,නොකළ දේ කළේය.එහි පොළිය කාගේ ගිණුමට දමා ගත්තද කම් නැත.ජපානය සතුටු වන පරිදි අඩු තරමේ මේ සොදුරු මිනිසාගේ නම එහි ක්‍රීඩාගාරයක් ඉදිවන මොහොතක එයට යොදන්නට හෝ බේස්බෝල් පරිපාලකයෝ,ක්‍රීඩා පරිපාලකයෝ සිතට ගන්නේ නම් එය තවත් සොදුරු මිනිසුන්ගේ සහෘද පරිත්‍යාගයන්ට සුදුසු කෘතවේදී ජාතියක් ලෙස අපට තව - තවත් වරප්‍රසාද හිමි වන්නට හේතුවක් වනු නිසැකය.
අවසානයේ වටනබේ ගේ උදාරතර දාන සිතුවිල්ල යථාර්තයක් විය.ක්‍රීඩා පිටිය විවාත වෙමින් ශ්‍රී ලංකා යොවුන් කණ්ඩායම සහ වටනබේගේ ජපානයේ බේස්බෝල් නෑදෑයෝ පිරි කනගාවා උසස් පාසල් බේස්බෝල් ඇකඩමි යොවුන් කණ්ඩායම තරග වැදිණ.මේ සියල්ල පිළිබද වටනබේ ගේ දැණුමෙන් ඔහුට දැනෙන හැගීම නියමයි වන්නා සේම අපට ඔබ ගැන දැනෙන හැගීමද ඔබේ දැනුමත් ප්‍රමාණයෙන්ම ඔබට තේරුම් ගත හැකි පරිදි මෙහි තබන්නට අපි සිතුවෙමු.
වටනබේ!
ඔයා නියමයි.
www.supirikrida.com

කල්මාඩි ට දඩුවම් නියමවීම ලබන මාසයේ

ඉන්දියාවේ ජාත්‍යනත්ර ක්‍රීඩා පාලකයෙකු ලෙස නමක් දිනා  සිට එරට ඔලිම්පික් කමිටු සභාපතිවරයාව සිටි සුරේස් කල්මාඩි ඇතුළු දස දෙනෙකුට 2010 නවදිල්ලි පොදු රාජ්‍ය මණ්ඩලීය ක්‍රීඩා උළෙලේදී කරන ලද වංචනික ක්‍රියා සම්බන්ධයෙන් දඩුවම් නියම කිරීම ලබන මාසයේදී සිදු විමට නියමිත බව ඉනදියාවෙන් වාර්තාවේ.මෙහි දී ස්විස් ආයතනයකින් භාණ්ඩ මිළදී ගැනීමේ දී අදාළ පරිපාටි උල්ලංඝනය කරමින් කටයුතු කිරීමට එම ක්‍රීඩා උළෙලේ සභාපතිවරයා ලෙස කල්මාඩි ද දායක වී තිබෙන බව අනාවරනය වීම නිසා මේ වන විට ඔහුට ජාත්‍යන්තර ඔලිම්පික් කමිටුවේ නියමය පරිදි ඉන්දිය ඔලිම්පික් කමිටුවේ සභාපති තනතුරට ඉදිරිපත්වීමේ අවසරයද අහිමි වී එම තනතුරද අහිමි වී ඇත.
අදාළ චෝදනා  තහවුරු කරමින් 2011 අප්‍රේල් මාසයේදී කල්මාඩි ව ඉන්දීය මධ්‍යම අපරාධ පරික්ෂණ කාර්යංශය (CBI) මගින් අත් අඩංගුවට ගන්නට යෙදිණ.
www.supirikrida.com