හරුන් ලොගාඩ් විසින් ක්‍රිකට් ක්‍රීඩාව වෙනුවෙන් ලබා දුන් ස්වාධීන පරීක්ෂණ වාර්තාවේ නිර්දේශ ක්‍රීඩා පණතට එක්කර එළැඹෙන මාර්තු මාසයේ සිට ක්‍රියාවට නැංවීමට ක්‍රීඩා අමාත්‍යවරයා දරණ උත්සාහය අරක්කු මූඩියෙන් පැණි බීම බෝතලයත් වැසීමට උත්සාහ දැරීමක් වැනිය.ලොගාඩ් ක්‍රිකට් අර්බූදය සම්බන්ධයෙන් අදහස් ඉදිරිපත් කළ අතර සෙසු ක්‍රීඩා සදහා ද එයම වලංගු යැයි සිතීම දුෂ්කරය.ක්‍රිකට් ක්‍රීඩව පමණක් අප රටේ වෘත්තීය මට්ටමෙන් ක්‍රියාත්මක වන අතර අනෙකුත් සෙසු ක්‍රීඩා සදහා එවැනි වාතාවරණයක් නැත.ක්‍රිකට් හී දේශපාලනය සාමාන්‍ය පක්ෂ දේශපාලනයේ බලය ද ඉක්මවා යන තත්ත්වයෙන් තිබෙන බව ක්‍රීඩා අමාත්‍යවරයා පිළිගත්තද - නොපිළිගත්තද එය මුසාවක් නොවන බව ක්‍රිකට් ගැන දන්නා අයෙකුගේ හෘද සාක්ෂිය දන්නේය.මේ වන විට මේ රටේ බැඩ්මින්ටන් සහ නෙට්බෝල් ක්‍රීඩාව උදාහරණයකට ගත් විට ක්‍රිකට් හරහා ලොගාඩ් ගෙනෙන යෝජනාව අනෙකුත් ක්‍රීඩා හා ගැලපේදැයි සිතීම ගැටළුවකි.ගෙවුණු ආසියාතික දැල්පන්දු තරගාවලියේ දී ජ්‍යෙෂ්ඨ ක්‍රීඩිකාවන් සංචිතයට පැමිණියේ අමාත්‍යවරයාගේ මැදිහත් වීම පිටය.එය එසේ නොවුණා නම් අපට අනු සූරතාවය ද අහිමි වන්නට තිබිණ.බැඩ්මින්ටන් අවුල් - වියවුල් වී ඇත.ඒවා වෙනස් කිරිමට හැකි බලය ක්‍රීඩා අමාත්‍යවරයා භාවිතයට නොගනිමින් ඇත.මේ මොහොතේ ඇති ගැටළුව එවැන්නකි.
සිදුවිය යුත්තේ ක්‍රීඩාවේදි පළමුව අමාත්‍යවරයා නිර්දේශපාලනිකව හැසිරීමය.එය අමාත්‍යවරයාගෙන් අමාත්‍යවරයාට නොවෙනස් ප්‍රතිපත්තිමය කාරණයක් වන්නේනම් එය වඩාත් වැදගත් ය.තවමත් වගකීමක් පැවරීමේදී ලකුණු ලබා දෙන්නේ සහතික වලට වන අතර උදාහරණයකට පුහුණුකරුවෙක්ට වරප්‍රසාද ලබාදීමේදී ඔහු ලබා ගත් සහතික නිරීක්ෂණයට වඩා වැදගත් ඔහු සිය ක්‍රීඩක ක්‍රීඩිකාවන්ට ලබා දී ඇති සහතිකය.
මේ ආකාරයට ප්‍රතිපත්තිමය කාරණා මත ක්‍රීඩාවේ තේරීම් සිදුවිය යුතුය.එවැනි ප්‍රායෝගික ව්‍යහුයක් ලංකාවේ ක්‍රීඩාව තුළ දකින්නට නැත.ක්‍රීඩා පාළක සභාව හිතවත්කම මත නොපිරෙන තැනක් වන්නේනම් සහ එය ක්‍රීඩාව පිළිබදව දැනුවත් පුද්ගලයන්ගෙන් පිරී ඇත්නම් අමාත්‍යවරයාගේ වගකීම් ඒ වෙත මාරු කිරීමට හැකිය.සෑම තේරීම් කමිටුවකටම පත්වීම සදහා ඉල්ලුම් පත් කැදවිය යුතුය.ඔවුන් ට තේරීම් තරග පැවත්වෙන දින සදහා සිය සේවා ආයතනවලින් නිවාඩු ලබා ගැනීමට හැකි පරිදි මැදිහත්වීමක් අමාත්‍යංශය හරහා සිදු විය යුතුය.එසේ ඉල්ලුම්පත් යොමු කිරීමට ඔවුන් තේරීම් සදහා සහභාගිවන සෑම දිනයකදිම හෝ ඔවුන්ට පිළිගත හැකි දෛනික දීමනාවක් ලබා දිය යුතුය.එවැනි මූල්‍යමය වාතාවරණයක ඒ සදහා ඉදිරිපත්වන්නන් ප්‍රමාණය වැඩි විය හැකි අතර ඔවුන් අනතුරුව ක්‍රීඩා පාළක සභාවේ සම්මුඛ පරීක්ෂණයකින් පසුව ඒ සදහා පත් කළ යුතුය.
ක්‍රීඩා කණ්ඩායම් සදහා විදේශ සංචාර සදහා වැය කරන අති මහත් මුදල් කන්දරාව නැවතිය යුතුය.එම මුදල් ක්‍රීඩාවේ යටිතල පහසුකම් සංවර්ධනය පිණිස යොදාගත හැකිය.හදුනාගත් විශේෂ අවස්ථාවන් හී ගමන් අනුග්‍රහය සදහා මැදිහත් වීම් කළ හැකි අතර එසේ නොවන තැන් හී එම ගමන් අනුග්‍රහ අදාළ ක්‍රීඩා සංගමය හෝ සම්මේලනය විසින් සොයා ගත යුතුය.එහිදී පළමු වැන්න ලෙස ක්‍රීඩා පරිපාලනයට එන සභාපතිවරයා,ලේකම්වරයා සහ භාණ්ඩාගාරිකවරයා ආර්ථික වශයෙන් කෙතරම් ශක්තිමත් විය යුතුද යන්න පිළිබදව විමසා බැලෙන සීමාවක් ලකුණු විය යුතුය.එසේම ගහමරා ගනිමින් බලයට එන එම පිරිසට එම ක්‍රීඩාවට අනුග්‍රාහකත්වයක් සොයා ගැනීමට හැකියාව තිබිය යුතු අතර ක්‍රීඩා සංචාර තරගාවලි සංවිධානය වැනි කාරණා වලට මුදල් යෙදවීම වෙනුවට ඒවා අධික්ෂණය කිරීමෙන් සෑහෙන්නට ක්‍රීඩා අමාත්‍යංශයට හැකියාව තිබිය යුතුය.
ඒ නිසා ලොගාඩ් ගේ වාර්තාව ක්‍රිකට් වලින් බැහැරව වෙනත් ක්‍රීඩා වලට යෙදවීමට යාමේ දී ගැටළු අතිවිය හැකිය.ක්‍රීඩා පණතේ ක්‍රීඩා අමාත්‍යවරයාට බලය ලබා දෙමින් වගන්ති නිර්මාණය වීමට බල පෑ සාධක තවමත් නොවිසදී පවතින බව පමණක් අප දත යුතුය.මෙවැනි ප්‍රායෝගික කාරණා පිළිබදව මාධ්‍යවල හා වෙනත් ලාංකේය ක්‍රීඩා ප්‍රේමින්ගේ අදහස් විමසා බැලීම සුදු හමකින් කෝටි ගණන් වැය කර ගන්නා අදහසක් තරම් නොවටිනා බව අපි දනිමු.ලොගාඩ් ගේ වාර්තාවේ තිබෙන දුර්වලතා ද මෙරට ජනමාධ්‍ය හරහා කෙතරම් අවස්ථාවක් පෙන්වා දුන්නද ඒවා පිච්චියකට ගණන් නොගෙන අද ලොගාඩ් අමුතුම වික්‍රමයක් කළ ආකාරයෙන් කෝටි එක හමාරක් වැය කර ඔහුගේ අදහස් මුදුන් මල්කඩ සේ සළකා කටයුතු කිරිමෙන්ම පැහැදිළිය.එහෙත් අප ක්‍රීඩාවේ සුභ සිද්ධිය පිණිස ගතයුතු ක්‍රියාමාර්ග ගැනීම සදහා ලොගාඩ් න්‍යාය සියල්ලට ආදේශ කිරීම පසෙකලා විධිමත් සංවාදයක් ඇරඹිය යුතුව ඇති බව කිව යුතුය.ඒ සදහා ලොගාඩ්ගේ වාර්තාවට වැය කළ කෝටි එක හමාරක් වැය කළ යුතු නැත.ඒ සදහා තෝරා ගන්නා නිර්දේශපාලනික ක්‍රීඩාප්‍රේමින්ට ප්‍රවාහණය සහ දෛනික දීමනාවක් හෝ ගෙවිය හැකිනම් සතියකින් පමණ එම අඩුපාඩු සකස් කර ගත හැකිය.
ක්‍රීඩාවෙන් ක්‍රීඩාවට ප්‍රතිපාදන ලබා දීමේ කාර්යයද වෙනස් විය යුතු බැවින් ක්‍රීඩා පණතේ ඒ ඒ ක්‍රීඩාවන් සදහා බලපාන විවිධ කාරණාද ප්‍රධාන වගන්ති වලට යටත්ව ක්‍රියාත්මක විය යුතු බැවින් ඒ පිලිබදවද අවධානය යොමු කළ යුතු අතර මේ තත්ත්වය මේ සටහන්කරුම දිනක් අමාත්‍යවරයාගේ සංශෝධන කෙටුම්පත සකස් කරන නිලධාරීන්ට පෙන්වා දුන් අතර එය සාකච්ඡා කිරීමට එකග වුව ද අද වන තුරු ඒ පිළිබදව කිසිදු උනන්දුවක් දක්වා නැත.මේ සියළු තත්ත්වයන් සැළකිල්ලට නොගෙන ලොගාඩ් ක්‍රිකට් වලට හදාපු මූඩිය පාපන්දුවටත් දමන්නට යාමේදී ප්‍රශ්නයක් ඇති වීම වැළක්විය නොහැකිය.තවත් ආකාරයකින් කියන්නේනම් මුදුගිල්ලට නිර්මාණය කරන මුද්ද සුළැගිල්ලට හෝ මාපටගිල්ලට දැමීමට යාමේදී විය හැකි ගැටළුව ගැන සිතීමෙන් තේරුම් ගැනීමට හැකිය.
www.supirikrida.com
1 comment:
මේ පොරද අර සල්ලි කන යන්තරේ...
Post a Comment