ශ්‍රී ලංකාවේ ක්‍රියාත්මක ආසියානු දැල් පන්දු තරගාවලියේ ශ්‍රී ලංකාව සහභාගි වූ දෙවන තරගයේදී ඉන්දියාවට එරෙහිව ලකුණු 85 - 29 ක අති විශිෂ්ඨ ජයක් ලැබීය.තරගයේ මුල සිටම ඉන්දියාව අභිබවමින් පෙරට පැමිණි ශ්‍රී ලංකාව තරගයේ ප්‍රථම කාරතුවේදීම ලකුණු 23 -06 ක් ලෙස පෙරට පැමිනියේ ය.දෙවන කාර්තුවේදී තවත් ලකුණු 25 -09 ක් ලෙස ඉදිරියෙන් සිටි ශ්‍රී ලංකාව තෙවන කාර්තුවේදී දැඩි අපහසුතාවයකට පත් කළ ඉන්දියාව,ශ්‍රී ලංකාව ලකුණු 14 ක් ලබන විට ලකුණු 10 ක් ලබා ගැනීමට සමත් විය.තෙවන කාර්තුවේදී ශ්‍රී ලංකා ආරක්ෂක පෙළ තරුණ වීම ඉන්දියාව තෙවන වටයේ දී කළ ආක්‍රමණය පවත්වා ගෙන යාමට නොහැකි තත්ත්වයක් ඇති කළ අතර ඒ අනුව ඉන්දියාවට හැකි වූයේ ලකුණු 04 කින් සෑහෙන්නට ය.නමුත් අවසාන වටයේදී ආරක්ෂක අංශයේ මැදිහත් වීම මත පන්දුව 31 වතාවක්ම ශ්‍රී ලංකා දැල වෙත පැමිණියද එයින් සාර්ථක කර ගැනීමට ලැබුණේ අවස්ථා 23 ක් පමණි.තරගයේ ලකුණු යන්ත්‍රය සක්‍රිය කිරීමට තර්ජනී සිවලිංගම් ට ඇති හැකියාව මෙහිදී ද පැහැදිළි වූ අතර ඇය උත්සාහයන් 55 කින් 53 ක් ම සාර්ථක කර ගත් අතර එය ප්‍රතිශතයක් ලෙස සියයට 96 ක් විය.ශසිකා සමරසිංහ උත්සාහයන් 11 කින් 09 ක් ම සාර්ථක කර ගත් අතර ශ්‍රී ලංකාවේ දැල් පන්දු අනාගතය සවිබල ගැන්වීම පිණිස වඩා වැදගත් වන තිසාලා අල්ගම උත්සාහයන් 24 කින් 20 ක් ද සේමිණි අල්විස් උත්සාහයන් හතකින් 03 ක් ද සාර්ථක කර ගැනීමට සමත් විය.
තරගයේ කාර්තු හතර වෙනස් ක්‍රීඩිකාවන් යොදවමින් ජ්‍යෙෂ්ඨයන්ට විවේකය ලබා දීම හොංකොං තරගයේදී මෙන්ම මෙම තරගයේදී ද දකින්නට ලැබුණු අතර නමුත් කණ්ඩායමේ ආරක්ෂක පෙළ බිද ගෙන ගොස් ඉන්දියාව ලකුණු 29 ක් ලැබීම පිළිබදව නැවතත් සිතා බලන්නට සිදු වෙයි.තරගයේ දී නව මුහුණු වැඩි පුර දකින්නට ලැබුණු සිව්වන වටයේදී ඉන්දීය දැල ආක්‍රමණය 31 වතාවක් සිදු කිරිමට තරම් ශ්‍රී ලංකා ප්‍රහාරක අංශය සාර්ථක වීම හොද තත්ත්වයක් මෙන්ම එය තරගයේදී ශ්‍රී ලංකාව ප්‍රතිවාදී දැල ආක්‍රමණයට පිවිසි වැඩිම අවස්ථා ගණනද විය.එසේම ඉන්දීය ප්‍රහාරක අංශයට ද ශ්‍රී ලංකා දැල වෙත පිවිසීමට අවස්ථාවක් නොලැබුණු අතර එය අවස්ථා අටකට පමණක් සීමා වීම ද,ශ්‍රී ලංකා අාරක්ෂක අංශයේ හොදම මැදිහත් වීම විය.
මේ තත්ත්වය මවන ච්‍රිත්‍රය අතිශයින් වැදගත් වන අතර විශේෂයෙන් සේමිණි අල්විස් සහ තිසාලා අල්ගම ලකුණු ලබා ගැනීමට අමතරව ඉන්දීය කණ්ඩායම ශ්‍රී ලංකා දැල ආක්‍රමණය කිරිම වැළක්වීමට ගත් පැසසිය යුතු දායකත්වය ද අවධානයට ලක් කර තරගාවලිය ගමන් කරන ආකාරයට බොහෝ විට ශ්‍රී ලංකා - සිංගප්පූරු විය හැකි අවසාන තරගයේදි කණ්ඩායමේ සංයුතිය සැකසීමට ශ්‍රී ලංකා බලධාරින්ගේ අවධානය යොමු විය යුතුය.ඒ නිසා ඉදිරි තරගවලදී එම ක්‍රීඩිකාවන් දෙදෙනා ගෝල් කීපර් සහ ගොල් ඩිෆෙන්ස් යන ස්ථාන වල යොදවා ක්‍රීඩා කර යම් කිසි අධ්‍යයනයක යෙදිය හැකිනම් ශ්‍රී ලංකාවට තරගාවලියේ තීරණාත්මක තරග සදහා පිවිසීමේදී එය වැදගත් වනු ඇත.
මරීෂා ප්‍රනාන්දු,ශසිකා සමරසිංහ මෙන්ම ගයත්‍රි ලංකාතිලක ද මෙම තරගයේදි ද සිය ජ්‍යෙෂ්ඨත්වයේ සහ පළපුරුද්දේ වටිනාකම පැහැදිළි කරන්නට සමත් විය.ප්‍රථම තරගයේදී පැවසූ ආකාරයටම තර්ජණී තව දුරටත් සැහැල්ලු වීමට අවශ්‍යය බව මෙම තරගයේදී ද පැහැදිළි කළ අතර එය ශ්‍රී ලංකා කණ්ඩායමේ ඉදිරි ගමණට බෙහෙවින්ම අත්‍යවශ්‍ය ය.
www.supirikrida.com
No comments:
Post a Comment