මෙවර ජාතික බොක්සිං සූරතාවලිය තුළ විනිසුරු තීරණ සම්බන්ධයෙන් ඇති වු ගැටළුකාරි තත්ත්වයන් හේතුවෙන් ශ්‍රී ලංකා යුධ හමුදා ආධාරකරුවන් සිය කණස්සල්ල ප්‍රකාශ කිරීමට භාවිතා කළ ක්‍රීඩා ශීලි නොවන ප්‍රතිචාර දැක්වීමේ විදි ක්‍රමය අවසානයේ ක්‍රීඩාවේ ගෞරවයට කළු පැල්ලමක් ඇති කරමින් නිමාවට පත් වෙද්දී,මේ වසරේ හොදම බොක්සිං ක්‍රීඩා සමාජය මෙන්ම 86 වන ජාතික බොක්සිං සූරතාවලියේ සූරතාවය ද මාස් ස්ලිම්ලයින් ක්‍රීඩා සමාජයට හිමි විය.සෑම විටම සිය ප්‍රතිවාදියාව මරා දමන ලෙස ප්‍රකාශ කරමින් ප්‍රකෝපකාරී දිරි ගැන්වීමක යෙදීම ද, මාස් ක්‍රීඩකයන් ගේ ප්‍රතිවාදියා කවුරු වුව,විනිසුරුවරයෙකු ඔහු සම්බන්ධයෙන් ගනු ලබන තීරණ වලට අශෝභණ ලෙස ප්‍රතිචාර දැක්වීමද,මෙහිදි දකින්නට ලැබුණු අතර,එය පැහැදිළිවම ක්‍රීඩකයාගේ තරග රටාවට බාධා කල බවත් ඉතා හොදින් තරග කරන ක්‍රීඩකයන් බවා ආවේගකාරී ලෙස හැසිරෙනු දුටු බවත් දැක ගන්නට ලැබිණ.
ඔවුන් මේ සියළු දේ සමගින් ප්‍රතිවාදියා මරා දමන්නට, උස්සලා පොළවේ ගසන්නට ලෙස යන වචන භාවිතා කරමින් කියූ එක් වචනයක් පිළිබදව යුධ සෙබළාගේ තැන සිට නැවත කල්පනා කර නිවැරදි කර නො'ගන්නේ නම් එය සාමාන්‍ය සමාජය ද බිය ගන්වන සුළුය.ඒ, ඒ සියළු අනීතික දේ කරන්නට කීවේ 'ආමි මොරාල්' යන වචනය තුළ සිට ය.ආමි මොරාල් යනු තමන්ගේ ජයග්‍රහණය වෙනුවෙන් සෙබළා විසින් අනෙකාව පීඩනයකට ලක් කිරිම නම් ඔවුනගේ ආරක්ෂාව යටතේ සිටිය යුතු කෝටි ගණන් ජනතාව ඉතා විමසිලිමත්ව සිටිය යුතු බවට කරන අනතුරු ඇගවීම දරුණු අවධානමකි.
හමුදා සෙබළෙකු වීම ද සමග එම චණ්ඩිකම එක්වීමෙන් ඇති විය හැකි දරුණු ප්‍රතිපලය ඊයේ පැහැදිළිව දකින්නට ලැබිණ.එය ඉදිරියේදී වඩාත් අනර්ථකාරී තත්ත්වයකට ශ්‍රී ලංකාවේ බොක්සිං ක්‍රීඩාව රැගෙන යන්නට ඉඩ ඇත.සාමාන්‍ය ජනයා රැදී සිටිය යුතු ස්ථාන තීරණය කිරීමට ඇතැම් තීරණාත්මක අවස්ථාවල හමුදාවට බලය ලැබෙන පරිදිම ඔවුන්ට ද සිය බලයේ වපසරියට අඩංගු නොවන ස්ථාන ඇත.මෙම බොක්සිං තරගාවලියේ ඔවුන් ඒ සීමාව අති ක්‍රමණය කරමින් ජනමාධ්‍යවේදීන් ගේ සීමාව අතික්‍රමණය කිරීම සහ එසේ නොකරන ලෙස කියා සිටියදී, විනයෙන් සහ බුද්ධියෙන් මෝරා නොගිය ඇතැම් සෙබළු එය සිය අයිතියක් මෙන් ප්‍රකාශ කරමින් ප්‍රකෝපකාරී ලෙස හැසිරෙන්නට කටයුතු කිරීම නවතා දමන්නට හමුදාවේම හිටපු බොක්සිං ප්‍රවීනයන් සහ පොලිසියේ නිලධාරීන් මැදිහත් නොවන්නට හමුදාවේ වීම ඕනෑම කෙනෙකුට තර්ජනය කිරීමට සහ ඕනෑම තැනෙකට පිවිස කරණම් ගැසීමට ලැබුණ වරප්‍රසාදයක් යැයි සිතන සෙබළ මානසිකත්වයක් ඇති අයෙකු අතින් මාධ්‍යවේදීන්ට ශරීර අඩන්තේට්ටම් පවා වෙන්නට තිබිණ.
ඔවුන් සිටි ප්‍රදේශයෙන් එල්ල වූ බිත්තර ප්‍රහාර,පුටු ප්‍රහාර,සහ ඇතැම් වීසි කිරීම් වලට මාධ්‍යවේදින් පවා ගොදුරු විණි.ඒවා යුධ හමුදාව විසින් සිදු කළ බව ඒත්තු ගන්වන්නට වෙනත් පිරිසක් විසින් එල්ල කළ ප්‍රහාර බව ඔවුන් පසුව ප්‍රකාශ කළද පහර දුන්නේද නැතිද යන්නට වඩා විනය ගරුකව හැසිරිය යුතු පිරිසක් ලෙස තමන්ට අසාධාරණයක් සිදු වූ විට හැසිරෙන්නේ මෙසේ යැයි සමාජය ඉදිරියේ කියා පෑ ආකාරය හමුදාවේ කීර්තිනාමය පිළිබදව සාමාන්‍ය ජනතාව තුළ අපකීර්තිමත් හැගිමක් ඇති කිරීමක් බව සිතට ගැනිම වැදගත්ය.
විනිසුරු තීරණ සම්බන්ධයෙන් ගැටළු ඇති බව සුපිරික්‍රීඩා නිරන්තරයෙන් ප්‍රකාශ කර ඇත.මෙහිදී ද එවැනි තත්ත්වයන් ඇති නොවුණු බව අපි නොකියන්නෙමු.අප විසින් කරන ලද සොයා ගැනීම් වලට අනුව ඇතැම් විනිසුරුවන්ට එරෙහිව තරග තහනම් පවා පැනවීමට ක්‍රියා කර ඇත.ඒ මෙම තරගාවලිය ආශ්‍රිතවය.එසේම එක තරග වටයක් විනාඩියක් අඩුවෙන් කාලය ගණනය කිරීම නිසා විශාල ගැටළුකාරී තත්ත්වයක් ද ඇති විය.මෙවැනි නිලධාරීන් පිළිබදව පැරණි හිතවත්කම් හෝ තරාතිරම නොබලා පියවර ගත යුතුය.අලුත් විනිසුරුවන්ට පිවිසිය හැකි ලෙස දොරටු විවර විය යුතුය.ඒ සදහා ප්‍රවේශයක් ලබාගත හැකි පරිදි සිය සුදුසුකම් සපුරා ගැනීමට ද කවයෙන් පිට සිට තීරණ දෙන පිරිස උත්සාහ කළ යුතුය.තීරණ ඇතැම් අවස්ථාවල සිතා ගැනිමට නොහැකි ලෙස වරදින අවස්තා අප දැක ඇත්තෙමු.එය ඇතැම් විට මාස් ක්‍රීඩකයන්ට බලපාන අවස්ථා ද දැක ඇත්තෙමු.මේ සියළු දේ තුළින් යම් අසාධාරණයක් වූ බවට ගෙනෙන තර්කය ද කිසිදු මාධ්‍යවේදියෙකු ප්‍රතික්ෂේප නොකරනු ඇත.එහෙත් 86 වන බොක්සිං තරගාවලිය තුළ ඒ මතයේ පිහිටා සිය ක්‍රීඩකයා හෝ මාස් නොවන ක්‍රීඩකයා ගේ ආධාරකරුවාගේ කණ්නාඩියෙන් තරග නැරඹිමේ දී මහ හඩින් විරෝධතා දැක් වූ බොහෝ දේ නිවැරදිව සිදු වූ අපි දුටිමු.සිදුවීම දරුණු තත්ත්වයට පෙරළුණු මංජු වන්නිආරච්චිගේ ගැටුම පිලිබදවද කිව යුතුව ඇත්තේ ද එයමය.දක්ෂ ක්‍රීඩකයෙකු වන වීරක්කොඩි මෙම තරගය තුළ හැසිරෙන ආකාරය,ප්‍රහාරයට පිවිසෙන ආකාරය තුළ ඔහු බොක්සිං ක්‍රීඩකයෙකු ලෙස ලබා තිබූ ශික්ෂණය වෙනුවට දකින්නට ලැබුණේ තරහකාරයෙකු මරා දමන්නට හැසිරෙන ආකාරයක් බව එම තරගයේ වීඩියෝ දර්ශන ඇත්නම් ඔබ ඒ සම්බන්ධයෙන් දරණ පූර්ව නිගමණ වලින් බැහැරව තරගය නැරඹීමෙන් හදුනා ගන්නට පුළුවන.
කෙසේ හෝ තරගාවලිය තුළ කාන්තා බොක්සිං ක්‍රීඩාව යම් ප්‍රගතියක් ලබා තිබෙන බව පැහැදිලිය.ඔවුන් ශිල්පීය ගුණයෙන් විශාල ලෙස ඉදිරියට පැමිණ ඇත.තරගකාරීත්වය ඉහළ ගොස් ඇත.ඒ විවෘත ස්වබාවයේ ගොදුරු බවට පත් වූ ටැන්සානියා ලෝකඩ පදක්කම්ලාභින් දෙදෙනා වූ ශිරෝමාලා වීරරත්න, ඩබ්අයිඑස්එස් ශෂිකලා ඉදිරියේත් සිතාරා සදරේකා, කේඒකේ හංසිකා ඉදිරියේත් පරාජයට පත් විය.එසේම ජාත්‍යන්තර අත්දැකිම් ඇති සහ ගෙවුණු ක්ලිෆර්ඩ් කුසලාන බොක්සිං තරගාවලියේ දී දක්ෂතම ක්‍රීඩිකාව වූ නිරංජලා සේනානායක,එල් උදයංගනී ඉදිරියේ පරාජයට පත් විය.
දැවැන්ත ශක්තියක් සහිත මුෂ්ටි ප්‍රහාර වලින් පොහොසත් මොහොමඩ් ඩිල්ෂාන් ශ්‍රී ලංකා ගුවන් හමුදාව වෙනුවෙන් මෙම තරගාවලියේදී ත් සිය යුතුකම ඉටු කළේ,දක්ෂතම ක්‍රීඩකයා වෙමින්ය.එසේම ඔහු මේ වසරේ ලාකේය බොක්සිං තර අතර දීප්තිමත්ම තරුව බවට පත් වෙමින් බොක්සි ක්‍රීඩකයන් අතර වසරේ දක්ෂතමයා ලෙස සම්මානණීය විය.එසේම වසරේ අති දක්ෂ බොක්සිං තරුවට පිරිනැමෙන කුසලානය අනූසා කොඩිතුවක්කු දිනා ගත්තාය.ඇය මේ වසරේ බොක්සිං ක්‍රීඩවට ඉන්දීය - ශ්‍රී ලංකා තරගාවලියේදී සමු දුන් අතර,එහදී ද දක්ෂතම ක්‍රීඩිකාව බවට පත් වූයේ අනූෂාය.ඊට අමතරව ඇය ටැන්සානියා ජාත්‍යන්තර තරගාවලියේදී රන් පදක්කම දිනා ගත්තාය.එසේම අනූසා වසරේ බොක්සිං තරුව ලෙස සම්මානනිය වීම කාන්තාවකට එම සම්මානය හිමි වූ දෙවන අවස්ථාව ලෙස ඉතිහාසයට එක්වන අතර ඊට පෙර 2009 දි නිල්මිණි ජයසිංහ ද එම සම්මානය දිනුවාය.
තරගාවලියේ කැපී පෙණෙන ක්‍රීඩකයන් ලෙස මොහොමඩ් ඩිල්ෂාන් මෙන්ම සුරේෂ් පට්ටියආරච්චි ද එසේම සංවර්ධනයට ලක් විය යුතු චරිතයක් ලෙස සිය පළමු ජාතික සූරතාවලියම ජයග්‍රහණයකින් කෙළවර කර ගත් එම් ප්‍රභාස්වර ද, අවධානයට ලක් විය යුතු චරිතය.එසේම කාන්තා තරග ඉසව්වලදී කිලෝග්‍රෑම් 75 න් පහළට විහිදි සෑම ක්‍රීඩිකාවක්ම පාහේ යම් ප්‍රවර්ධනයක් අත් කර ගෙන ඇති ආකාරය පැහැදිළි වීම කාන්තා බොක්සිං ක්‍රීඩාවේ අනාගතය පිළිබදව සතුටු විය යුතු සහ පවත්වා ගෙන යමින් සහ සංවර්ධනය කරමින් රැක ගත යුතු තත්ත්වයකි.
www.supirikrida.com
No comments:
Post a Comment