ලංකාවට සුවිශාල ජයක්

ගාල්ල මහජන ක්‍රීඩාංගනයේ ක්‍රියාත්මක වූ ශ්‍රී ලංකා -පකිස්තාන් ප්‍රථම ටෙස්ට් තරගයෙන් ලකුණු 209 ක දැවැන්ත ජයක් වාර්තා කරන්නට ශ්‍රී ලංකාව සමත් විය.ප්‍රථම ඉණිමේ ලබාගත් ලකුණු 472 වාසිය රදවා ගැනීම සදහා ශ්‍රී ලංකා පන්දු යවන්නන් ප්‍රථම ඉණිමේ දී ලබා දුන් සහයෝගය මතින් තරගයට පිවිසි ශ්‍රී ලංකා ක්‍රීඩකයෝ පකිසතානු ඉණිම ලකුණු 100 ට සීමා කිරීම නිසා ඇති වූ ලකුණු පරතරය පියවා ගැනීම පකිස්තානයට ඉතා දුෂ්කර කාරියක් විය.

තරගයෙන් ජය ගැනීම සදහා ගාලු තණතිල්ලේ දින දෙකකට වැඩි කාලයක් තුළ ලකුණු 500 ක් ලබා ගැනීමේ ඉලක්කයට පිවිසෙන විටම පකිස්තානයට තරගයේ පරාජය අවම කර ගන්නේ කෙසේද යන්න පිලිබදව සිතීමත් පරාජය හැකි තරම් දුරට පමා කිරීමෙන් වර්ෂාව වැනි ස්වභාව ධර්මයේ ආශිර්වාදයක් හේතු කරගෙන පරාජය නොවී සිටීමට අවස්ථාවක් ලැබේදැයි සිතීමත් යන කරුණු දෙක පමණක් ඉතිරිව තිබිණි.නමුත් පකිස්තානු දෙවන ඉණිමේ ආරම්භයද කණගාටුදායක කිරීමට වග බලා ගත් නුවන් කුලසේකර සහ රංගන හේරත් ලකුණු පූවරුව 25 ක් වන විට කඩුලු තුනක් පකිස්තානයට අහිමි කර දැමූහ.ගොම්මන් පිතිකරු ලෙස පිටියට පිවිසි සහීඩ් අජ්මාල් ලකුණු පූවරුව 38 ක් වෙද්දී දැවී යාමෙන් පසුව පකිස්තානය බලාපොරොත්තු වූ ආකාරයේ සබදතාවයක් ගොඩ නැගෙන්නට විය.

පස්වන කඩුල්ල වෙනුවෙන් යුනිස් ඛාන් සහ අසාද් සෆීක් අතර ගොඩ නැගුණු ලකුණු 151 ක සබදතාවය සහ ඒ සදහා ගත කළ කාලය ශ්‍රී ලංකාව දැඩි අසීරුතාවයකට පත් කරන සුළු විය.යුනිස් ඛාන් ලකුණු 87 ක් ලබා ගැනීමට පැය 4 ක් සහ විනාඩි 26 ක් ගත කළ අතර සෆික් ලකුණු 80 ක් වෙනුවෙන් පැය 3 විනාඩි 33 ක් ගත කර තිබිණ. නමුත් ලකුණු 212 ක් වෙද්දී මෙම දෙදෙනාම ක්‍රීඩාගාරයට හරවා යවන්නට ශ්‍රී ලංකා පන්දු යවන්නන් සමත් වූ අතර එහිදී පකිස්තානු මැ‍ද පෙළ ශක්තිමත් කිරීමට අද්නන් අක්මාල් ගත් සුවිශේෂි උත්සාහය හුදෙකලා වූ අතර පකිස්තානු පසුපෙළින් සැළකිය යුතු සහයක් ඔහුට නොලැබෙමින් ලකුණු 300 දී පකිස්තානු දෙවන ඉණිම නිමාවන විට අක්මාල් ඉදිරියේ නොදැවී එකතු වී තිබූ ලකුණු ප්‍රමාණය 40 ක් විය.

ගාලු තණතිල්ලේ ස්වභාවය සමග නුවන් කුලසේකරගේ දායකත්වය යහපති වනු ඇතැයි ටෙස්ට් තරගයට පෙර සිටම සුපිරික්‍රීඩා පළ කළ අදහස සනාත කළ කුලසේකර ලකුණු 48 ට කඩුලු 3 ක් දවා ගනිමින් පකිස්තානු දෙවන ඉණිම අඩපණ කිරීමට පෙරමුණ ගත ලාංකේය පන්දු යවන්නා විය.සුරාජ් රන්දිව් ලකුණු 86 ට කඩුලු 3 ක් දවා ගත් අතර රංගන හේරත් ලකුණු 91 ට කඩුලු 2 ක් දවා ගත්තේය.

  ශ්‍රී ලංකා ජයග්‍රහණයේ අඩිතාලම ශක්තිමත් කළ ප්‍රථම ඉණිමේ කුමාර සංගක්කාර නොදැවී රැස් කළ අමිළ ලකුණු 199 හේතුවෙන් කුමාර සංගක්කාර  තරගයේ වීරයා ලෙස ඇගයීමට ලක් විය.පහත දැක්වෙන සබදතාවය ඔස්සේ තරගයේ සමස්ත ලකුනු සටහනට පිවිසීමට අවස්ථාව ඇත. http://www.espncricinfo.com/sri-lanka-v-pakistan-2012/engine/current/match/562444.html

www.supirikrida.com