Jun 16, 2013

විනිසුරු අවුල දිග් ගැස්සෙන ලකුණු

මාතර පාපන්දු කණ්ඩායමේ විදේශ ක්‍රීඩකයෙකු මෙන්ම ක්‍රීඩා ලෝලීන්ද,පාපන්දු විනිසුරුවෙකුට පහර දීම පිළිබදව නිවැරදිව විනය ක්‍රියාමාර්ග නොගත් බවට පාපන්දු විනිසුරුවන් විසින් විරෝධය දක්වමින් ඉදිරියේදී පාපන්දු තරග විනිශ්චයෙන් වැළකි සිටිමට සූදානම් වන බවට තොරතොරු සුපිරික්‍රීඩා වෙත වාර්තා වේ.පහරදුන් විදේශ ක්‍රීඩකයාට දුන් තහනම ප්‍රමාණවත් නොවන බවත් මාතර ක්‍රීඩා සමාජයට එරෙහිව ගත් විනය ක්‍රියාමාර්ග ප්‍රමානවත් නොවන බවත් පාපන්දු විනිසුරුවන්ගේ මතය වී ඇති අතර මේ නිසා මාතර පැවත්වෙන තරග විනිශ්චයෙන් වැළකි සිටින බවත් පාපන්දු විනිසුරුවන්ගේ මතය වි ඇත.
මේ තත්ත්වය මත මාතර ක්‍රීඩා සමාජය වෙන ස්ථානයක පවත්වන තරගයක් එම විනිසුරුවන්ගෙන් තොරව වෙනත් විනිසුරුවන් යොදා පැවත්වීමට ගෙන ඇති තීරණයට එරෙහිව වෙනත් තරග විනිශ්චයෙන්ද වැළකි සිටීමේ තීරණයකට එලැඹෙන්නට විනිසුරුවන් තීරනය කිරීමට සූදානමක් පවතින බවද සුපිරික්‍රීඩා වෙත වාර්තා වන තොරතොරු ඔස්සේ දැන ගන්නට ලැබිණ.
මාතර ක්‍රීඩා සමාජ ප්‍රකාශකයෙකු පැවසුවේ පාපන්දුවේ ප්‍රවර්ධනයට ක්‍රීඩා සමාජවල දායකත්වය අතිශයින් වැදගත් බැවින් පාපන්දු ප්‍රේමීන් වශයෙන් පාපන්දු විනිසුරුවන් මීට වඩා නම්‍යශීලීව කටයුතු කළ යුතු බවය.උද්වේගකර තරගයකදී විනිසුරුවෙකු අතින් සිදුවන වැරද්දකදී පාපන්දු ලෝලින් මෙන්ම ක්‍රීඩකයන්ද යම් ආවේගකාරී තත්ත්වයන්ට පත් වීම මේ සිදු වීමට පමණක් සීමා නොවුණු එකක් බව පෙන්වා දුන් එම ප්‍රකාශකයා ඇති වූ අනතුරුදායක තත්ත්වය මාතර ක්‍රීඩා සමාජ නිලධාරීන් පොලීසියේද සහය ඇතිව අවම කිරීමට අවශ්‍යය පියවර ගත් බව පෙන්වා දුන්නේය.
එසේම එවැනි තත්ත්වයක් ඇති විමට විනිසුරුගේ තීරණ ද බලපෑවේද නැද්ද යන්න විමසා බැලීමත් විනිසුරුවන්ගේ කාර්යය විය යුතු බව පෙන්වා දෙන එම ප්‍රකාශයා එක සිදුවීමක් අරඹයා ක්‍රීඩා සමාජයක් විනාශ කිරීමට උත්සාහ දැරීම කිසිම පාපන්දු ප්‍රේමියෙකු තුළින් බලාපොරොත්තු විය නොහැකි දෙයක් බව ද පෙන්වා දෙයි.
මේ අතර මේ සිදුවීම දෙස බලන මධ්‍යස්ථ මතධාරීන් ප්‍රකාශ කර සිටින්නේ පාපන්දු පරිපාලනය මැදිහත්ව දේපාර්ශවයම සාකච්ඡා මේසයකට කැදවා ඇති වී තිබෙන තත්ත්වය පිළිබදව තීරණයක් ගත යුතු බවය.පාපන්දු විනිසුරුවන්ගේ ගෞරවය කෙළෙසා නොදැමීමට කටයුතු කිරිම මෙන්ම විශාල උනන්දුවකින් සහ වියදමක් දරමින් දුෂ්කරතා මැද පාපන්දු ක්‍රීඩාව පවත්වා ගෙන යන මාතර වැනි පිට පළාත් ක්‍රඩා සමාජයක් ආරක්ෂා කිරීමත් පාපන්දු බලධාරීන්ගේ යුතුකම බව මධ්‍යස්ථ මතධාරීන්ගේ අදහස වී ඇත.
www.supirikrida.com

No comments: