නව දැල් පන්දු පරිපාලනයක් පත් කර ගැනීමට ශ්‍රී ලංකා දැල් පන්දු කේෂ්ත්‍රයේ ක්‍රීඩා සමාජ වලට ලැබී ඇති අවස්ථාව නිවැරදිව ප්‍රයෝජනයට ගත යුතුව ඇත.මෙවර දැල් පන්දු නිලවරණයේදී අලුත් මුහුණු කිහිපයක් දකින්නට ලැබෙන අතර දැල් පන්දු කේෂ්ත්‍රයේ මෑතකාලීන අත්දැකීම් ඇති ක්‍රීඩිකාවන් කිහිප දෙනෙකුද ඒ අතර වේ.මෙම නිලවරණයේදී හිටපු සභාපතිවරියක වන ට්‍රික්සි නානායක්කාර සහ බැංකු නිලධාරිණියක වන ලක්ෂ්මි වික්ටෝරියා තරග බිමට පිවිස සිටින අතර එම දෙදෙනා මුල් කර ගත් කණ්ඩායම් ලෙස බොහෝ දෙනෙකු මෙම නිලවරණයට ඉදිරිපත් වි සිටියි.
ට්‍රික්සි නානායක්කාර හිටපු නිලධාරිණියක ලෙස අත්දැකීම් ඇති තැනැත්තියක් මෙන්ම විවිධාකාර ගැටළු වලට මුහුණ දුන් පරිපාලිකාවක්ද වේ.ලක්ෂ්මි, මහජන බැංකුවේ අනුග්‍රාහාත්මක මැදිහත්වීමත් සමග දැල්පන්දු කේෂ්ත්‍රයට යළිත් අවතීර්ණ වූ අතර ඇය පසුගිය කාලයේ ඇතිවූ අක්‍රමිකතා පිළිබදව සොයා බැලීමට පත්කළ කමිටුවේ ප්‍රධානත්වයද දැරුවාය.
මෙම නිලවරණයට සහභාගි වන කණ්ඩායම් අතර ලක්ෂ්මී විසින් සොයා බලන ලද අක්‍රමිකතා වලදී පරීක්ෂාවට ලක් වූ ඇතැම් චරිත ද ඇයගේ පාර්ශවයම නියෝජනය කරමින් තරග වදිනු දකින්නට ලැබීම යහපත් දර්ශනයක් නොවන අතර මීට පෙර ට්‍රික්සි නානායක්කාර පාලනය යටතේද එම තැනත්තියන් විවිධ චෝදනා වලට ඉලක්ක වූ අය වීම ද මෙහිදී අවධානය යොමු කළ යුතු කරුණකි.ඒ නිසා මෙහිදී පාර්ශව ගත නොවී ක්‍රීඩා සමාජ යහපත් අය එම තනතුරු සදහා තෝරා ගැනීම වැදගත් බව සුපිරික්‍රීඩා අදහස වේ.හිටුපු නායිකාවක වන ජයන්ති සෝමසේකරන්ගේ ආගමනය කැපී පෙනෙන අතර ඇයට අභියෝග කරමින් ඇය සමග ලේකම් තනතුරට තරග වදින්නී පාසල් දැල්පන්දු කේෂ්ත්‍රයේ කැපී පෙනෙන්නියක වන ශිරෝමි කුරුප්පු ය.
පාලන කිහිපයක් යටතේම විවිධ චෝදනා වලට ලක් වූ හිටපු භාණ්ඩාගාරිකවරියන් මෙවර වෙනත් තනතුරු හරහා කේෂ්ත්‍රයට අවතීර්ණ වීමට උපක්‍රමශීලීව කටයුතු කරමින් සිටින බවක් පෙනෙන්නට ඇති අතර ඒ අනුව භාණ්ඩාගාරික තනතුරට නිශාන්ති ඕවිටිගල ට තරගයක් දීමට අයෙක් ඉදිරිපත් වී නැත.ක්‍රීඩා අමාත්‍යවරයා කලෙක සිට පවතින අතුරු පාලන කමිටු පාලනයන් වලින් දැල් පන්දුව නිදහස් කර ගැනීම පිණිස වැදගත් වේ යැයි යන විශ්වාසයෙන් මෙම නිලවරණයට පිවිසිය ද,එහිදී අක්‍රීයව පැවති සංගම් වලට ඡන්ද බලය පිරිනැමීමට කටයුතු කිරීමෙන් දැල්පන්දුව වෙනුවෙන් ක්‍රියාකාරී සහයෝගයක් ලබා නොදුන් ඇතැම් පිරිස් වෙත බලය පැවරී ඇති ආකාරය ගැටළුකාරීය.
කෙසේ වුවත් ක්‍රීඩා අමාත්‍යවරයා බොහෝ තැන් වලදී දැල්පන්දුවේ සම්ප්‍රදායික මුහුණු වලට ඔබ්බෙන් මෙහි පරිපාලනය පිළිබදව සිතිය යුතු කාලය පැමිණ ඇති බව අදහස් කළ ද ඔහු වටා සිටින ඇතැම් නිලධාරීන් අමාත්‍යවරයාව උපක්‍රමශිලී ලෙස එම මතයට විරුද්ධ දිශාවන් වෙත යොමු කරන බවක් දැකිය හැකි අතර ඉකුත් සය ජාතික සිංගප්පූරු දැල්පන්දු තරගාවලියේදි ඒ තත්ත්වය මැනවින් දකින්නට ලැබිණ.
කෙසේ හෝ කණ්ඩායම් ගතව තරගයට ඉදිරිපත් වුව ද ඡන්දය භාවිතය කණ්ඩායම් ගතව සිදු නොවන්නේ නම් ක්‍රීඩාවේ යහපත පිණිස වන පිරිස තීරණය කර ඡන්දය භාවිතා කිරීමෙන් දැල් පන්දුවේ ප්‍ර‍බෝධය පිනිස ඡන්දදායකයින්ට විශාල සේවයක් කිරීමේ හැකියාව තිබෙන බව අපේ විශ්වාසය වන්නේය.ඒ සදහා අවංක මැදිහත් වීමක් කරන්නට ක්‍රීඩා අමාත්‍යංශය සහ ක්‍රීඩා සංවර්ධන දෙපාර්තමේන්තුව මැදිහත් වන්නේ නම් සිය හෘද සාක්ෂියට අනුව කටයුතු කිරීමට ඡන්දදායකයාට ඇති අවස්ථාව රකිමින් මෙම නිලවරණය රහසි ඡන්දයක් ලෙස පැවත්විය යුතු බව ද අපි දැඩිව අවධාරණය කරනු කැමැත්තේමු.
www.supirikrida.com
No comments:
Post a Comment