ගේල් ප්‍රමුඛ කොදෙව් පිතිකරුවෝ ඕස්ට්‍රේලියානු බලාපොරොත්තු සංහාරය කරති

ක්‍රිස් ගේල් ඇතුළු කොදෙව් පිතිකරුවෝ ඕස්ට්‍රේලියානු කණ්ඩායමේ බලාපොරොත්තු සියල්ල සුන්නද්දූලි වන ප්‍රහාරයක් එල්ල කරමින් මෙවර 20 / 20 ලෝක කුසලාන තරගාවලියේ කණ්ඩායමක් එක් ඉණිමක රැස් කළ වැඩිම ලකුණු ප්‍රමාණය වාර්තා කරමින් කඩුලු 4 ලකුණු 205 ක් ලබා ඕස්ට්‍රේලියාවට ලකුණු 74 ක පරාජයක් අත් කර දුන්නේය.ක්‍රිස්ගේල් පන්දු 41 දී නොදැවී ලකුණු 75 ක් ලබා ගැනීමට සමත් වූයේ කොදෙව් ඉණිමේ නියමුවා වෙමින්ය.ගේල්  හයේ පහර හයක් සහ ඩ්වේන් බ්‍රාවෝ සහ කෙරන් පොලාඩ් හයේ පහර තුන බැගින් ද එල්ල කළ අතර මාලන් සැමුවෙල්ස් හයේ පහර දෙකක් එල්ල කළේය.හයේ පහර 14 ක් සහ හතරේ පහර 13 ක් එල්ල වූ කොදෙව් ප්‍රහාරයෙන් වැඩියම බැට කෑ පන්දු යවන්නා වූයේ ෂේවියර් ඩොරතිය.ඔහු පන්දු ඕවර් 3 ක් තුළ ලකුණු 48 ක් ලබා තිබුණු අතර කොදෙව් ඉණිම නිමා වූ ඕවරයේදී ඩොරතිට එරෙහිව ලකුණු 25 ක් රැස් විණ.
පිලිතුරු ඉණිමට පිවිසි ඕස්ට්‍රේලියාව වෙනුවෙන් තරගාවලිය පුරාම ලකුණු අතර සිටි වොට්සන් මෙන්ම ඔහු සමග හොද ආරම්භක සබදතාවයක් පැවත් වූ ඩේවිඩ් වර්නර් ද ලකුණු 205 පීඩනයෙන් ඇති කර ගත් තැති ගැන්මෙන් අඩු ලකුණු ගණනකට දැවී ගියේය.නමුත් නායක ජෝජ් බේලි පන්දු 29 ක ට ලකුණු 63 ක් ලබා ගත්තේය.එහෙත් ඔහුට සහයට කිසිවෙකු නොවුණු බැවින් ඕස්ට්‍රේලියා ඉණිම ලකුනු 131 ට සීමා විය.
ඒ අනුව දැවැන්ත ලකුණු ප්‍රමාණයක් රැස් කරමින් ප්‍රතිවාදීන්ට විශාල ලකුණු ගණනකින් පරාජය අත් කළ කොදෙව් කණ්ඩායම ලකුණු 139 ක් වැනි ලකුණු ගණනකින් විශිෂ්ඨ ජයග්‍රහණයක් අත් කර ලත් ශ්‍රී ලංකාව සමග අවසාන තරගයට මුහුණ දීමට නියමිතය.ඒ අනුව අවසාන තරගයේදී කොදෙව් පිතිකරණ ප්‍රචණ්ඩත්වයට එරෙහි ශ්‍රී ලංකා කණ්ඩායමේ උපක්‍රමශීළී පන්දු යැවීමේ සටන ක්‍රියාත්මක වන්නේ කොස්දැයි යන්න නරඹන්නන්ගේ ආනන්දයට හේතු වනවා නිසැකය.
කොදෙව් , ඕස්ට්‍රේලියා තරගයේ ලකුණු විස්තරයා පහත සබදතාවය තෙරපීමෙන් පිවිසිය හැකිය.
http://www.espncricinfo.com/icc-world-twenty20-2012/engine/current/match/533297.html

www.supirikrida.com