කාන්තා ලෝක කුසලාන ක්‍රිකට් තරගාවලියේ ශ්‍රී ලංකාව නවසීලන්තය ඉදිරියේ පරාජයට පත් වුණා.ඒ එංගලන්ත තරගය ජය ගෙන අනතුරුව අදහාගත නොහැකි අන්දමින් බටහිර ඉන්දීය කොදෙව් තරගයට පරාජය වූ අයුරින්මයි.ඉන්දියාවට එරෙහිව සුපිරි ජයක් ලබමින් සුපිරි හය වටයට පිවිසි ශ්‍රී ලංකාව විශිෂ්ඨ ජයග්‍රහණයකින් පසුව අනවශ්‍යය ආකාරයට සැහැල්ලු වන්නේ දැයි සැක සිතෙන තරමට නවසීලන්තයට එරෙහිව ලකුණු 103 ට දැවී යාම ද අදහාගත නොහැක්කක්.ඉන්දීය තරගයේදී පිතිකරු පෙළ ගැස්ම ඉතා හොද මට්ටමකින් ක්‍රියාත්මක වූ අතර ඒ නිසාම පිතිකාරිණියන් සිව් දෙනෙකුම අර්ධ ශතක ලබා ගත්තා.නමුත් එම පිතිකරු අනු පිළිවෙළ ඊයේ යළත් වෙනස් කම් වළට භාජනය වී තිබෙනු දකින්නට ලැබුණු අතර මෙසේ ස්ථාවර පිතිකරණ අනු පිලිවෙළක් දකින්නට නොලැබීම තරගාවලිය පුරාම ක්‍රියාත්මක වනවා.මේ තත්ත්වය දක්ෂතා අතින් ඉහළින් සිටියද පරිනත වෘත්තීය තත්ත්වය හා සම වීමට ශ්‍රී ලංකාවට තව දුර යා යුතු බව පෙන්වා දීමක්.
එය ක්‍රීඩාවේ පරිපාලනය හා සෘජුවම සම්බන්ධ වෙනවා.ස්ථාවර වෘත්තීය මට්ටමක් වෙනුවට තරගයෙන් තරගයට මුදල් උපයන දෛනික කූලි රැකියාවක් බදු ලංකාවේ කාන්තා ක්‍රිකට් ක්‍රීඩිකාවන්ගේ ජීවිත වල අස්ථාවර ස්වභාවයද පරිනත තත්ත්වයට ප්‍රවේශ වීමට ඇති මාර්ගය ඉදිරියේ තබා ඇති මාර්ග බාධක බදුයි.
මේ තත්ත්වය නිසා විශාල ජයග්‍රහණයකින් පසු ඊ ළග තරගයට අතිශයින් සරල විදිහට සෙසු කණ්ඩායම නොසළකා හැර සහභාගි වන්නේද යන සැකය පසු ගිය කාලය තුළ ශ්‍රී ලංකා කාන්තා කණ්ඩායමේ හැසිරීම් නිරීක්ෂණය කිරීමේදී සාධාරණ සැකයක් ඇති වෙනවා.
මේ සදහා වෘත්තීය තත්ත්වය ස්ථාවර වීම සහ ජයග්‍රහණය ආඩම්බර වීමට ආභරණයක් නොවන සාමාන්‍ය ජීවිතයේ කොටසක් වන තත්ත්වයට ශ්‍රී ලංකා ක්‍රීඩිකාවන්ගේ භෞතික සහ අධ්‍යාත්මික පරිසරය සකස් වීම වැදගත් වෙනවා.ඒ සම්බන්ධයෙන් වගකීමෙන් කටයුතු කිරීමට ශ්‍රී ලංකා ක්‍රිකට් පරිපාලනයේ අද දෑස් වලට ඇගිල්ලෙන් අනින තරමේ දස්කම් මේ වන විටත් ශ්‍රී ලංකා ක්‍රීඩිකාවෝ පෙන්වා තිබෙනවා.දැන් ශ්‍රී ලංකා ක්‍රිකට් වෙත සිය පමා වූ වගකීම ඉටු කිරීමට කාලය එලැඹ තිබෙන බව මෙම ලෝක කුසලාන තරගාවලිය තුළ සිදු වූ පරාජයන් සහ ජයග්‍රහණ හරහා ශ්‍රී ලංකා ක්‍රීඩිකාවෝ පැහැදිළි කරමින් සිටිනවා.
එසේම නවසීල්නතයට කඩුලු අටකින් ශ්‍රී ලංකා ක්‍රීඩිකාවෝ පරාජයට පත් වෙමින් සුවිශාල දක්ෂතා මගින් තහවුරු කරන ලද ජයග්‍රහණ වල දීප්තිය අඩු කර ගනිද්දී එංගලන්ත ක්‍රීඩිකාවන්ට ලකුණු දෙකක තියුණු පරාජයක් ඕස්ට්‍රේලියාවෙන් හිමි වීමටත් ශ්‍රී ලාංකිකයෙකු බල පෑවා.ඒ තරගයේ විනිසුරු ලෙස කටයුතු කළ රුචිර පල්ලියගුරු ලබා දුන් දුර්වල විනිසුරු තීරණ දෙකත් ඒ සියුම් පරාජයට විශාල වශයෙන් හේතු වූ නිසයි.විස්තර විචාරකයන්ගේ දැඩි දෝශ දර්ශනයට ලක් වූ පල්ලියගුරුගේ විසින් එංගලන්තයේ ප්‍රබලතම පිතිකාරිණිය වන නායිකා චාලට් එඩ්වර්ඩ්ස් ට එරෙහි කඩුල්ල ආවරණය කිරීමේ තීරණයත්,එයින් බිද වැටෙමින් තිබූ එංගලන්ත ඉණිම ගොඩ ගනිමින් ලකුණු 57 ක සබදතාවයක් ගොඩ නැගී තිබියදී සාරා ටේලර්ට ලබා දෙන කඩුල්ල ආවරණය කිරීමේ තීරණයත් යන දෙකම නොදැවීම් හැටියට හදුනා ගැනීමට හැකි වුණා.
මේ නිසා ජයග්‍රහණය කළ ඕස්ට්‍රේලියාව සුපිරි හය වටයේදී ශ්‍රී ලංකාවට ප්‍රතිවාදියෙකු ලෙස හමුවන තත්ත්වයක් තුළ ශ්‍රී ලංකාවට ද යම් අවාසියක් මේ ජයග්‍රහණයෙන් අත් විය හැකි නිසා පල්ලියගුරුගේ ගේ දුර්වල තීරණයන් ශ්‍රී ලංකාවට ද බලපාන තීරණ ලෙස හැදින්විය හැකියි.
www.supirikrida.com
No comments:
Post a Comment