රේනුකාගෙ හිනාව ...

'ජීවිතය ජය ගන්න උගන්නන්න බෑ,ඉගෙන ගන්න ඕනි.'
දිනක් සංවාදයක් ඇතුළත ඩයන් ගෝමස් කිව්වා.ඒත් මේ හිනාවෙ තියෙන්නෙ ජිවිතය ජය ගන්න උගන්නන්නත් පුළුවන් කියල ඔහුගේ ප්‍රකාශය අභියෝගයට ලක් කිරීමත්ද කියලත් හිතෙනවා.
ඩයන්ගෙ පිරුනු හිනාව සහ ඔහුගෙන් සම්මාන ගන්න රේනුකාගේ හිනාව ඇතුළෙ ඉතාමත් සාර්ථක වෙළද සේවා වොලිබෝල් තරගාවලියක් කිරීමෙන් උද්දාමයට පත් සභාපති රොහාන් සෝමවංශ ගෙ,ඔහු අසළ ඉන්න උප සභාපති සමන් වීරසූරියගෙ හිනාවට වඩා දෙයක් රැදිලා තියෙනවා.
මේ ජය සංඛේත ලබා ගන්න රේනුකා මෙවර වෙළද සේවා වොලිබෝල් කාන්තා සූරතාවය දිනූ මාවතගම මාස් කැෂුවලයින් ආයතනයෙ නායිකාව,රේනුකා නිල්මිණි නම් වූ ඇය මෙම තරගාවලියෙ අති සූර ක්‍රීඩිකාවත් වුණා.මේ ආයතනික ගණු දෙනුව නිසා නැගෙන හිනාවකටත් මේක ලඝු කරන්න බෑ.ඒක තදින් බැදුණු අධ්‍යාත්මික හිනාවක්.
කැෂුවලයින් ආයතනය ජාතික මට්ටමේ ජයග්‍රහණ සදහා ප්‍රවේශවන අවධියෙ කණ්ඩායමේ හිටපු රේනුකා,එක වරම දෛවය විසින් එල්ල කළ ඩෑෂ් පහරකින් බිම වැටෙනවා.
පිළිකාවක්!
කාගෙත් ඇස් වලට කදුළු නැගෙනවා.රේණුකා වොලිබෝලයට වගේම ජීවිතයෙන් නික්ම යන ගමනෙදි කැෂුවලයින් ආයතනයෙන් ද සමු ගෙන යන්න කළමණා පොදි බදිනවා.
පිරිස් කළමණාකාරිය අනෝමිද සිල්වා මේ වෙලාවෙ රේනුකාගෙ ඉරණම් ගමනෙ පයින් අදිනවා.ඒකට කණ්ඩායමේ කළමනාකරු චන්දන විජේසිංහ අවශ්‍යය මග පෙන්වීම කරනවා.කැෂුවලයින් සහෝදරත්වය සමග එන අනෝමිගේ උත්සාහයට යෝධ බල ශක්තියක් එකතු කරන ඩයන් සිය දෑතත් හෘදයාංගම සෙනෙහසත් ඒ වෙනුවෙන් කැප කරනවා.
මාස් සමූහයක් කියන කාරණය රේනුකා ට වගේම රේනුකාට අභියෝග කරන්න ආව මරණයටත් තේරෙනවා. රේනුකා වොලිබෝල් ගහනවා.දිනනවා,දක්ෂතම ක්‍රීඩිකාව වෙනවා.
ඒ අභිමාවත් මොහොතෙ තමන් වෙත ජීවිතය නැවත ඇදල දුන්නු ඩයන් ගෝමස්, රේනුකාගේ භාෂාවෙන්ම කියනව නම් 'අපේ ඩයන් ස්ර්' ඒ සම්මාන ප්‍රදානය කරන්න වේදිකාවෙ  ඉන්නවා.ඉතිං ඒ හිනාව තවත් හිනාවකට සම කරන්න පුළුවන්ද?
රොහාන්,සමන් දෙන්න මෑත කාලයේ දුටු දර්ශි වොලිබෝල් සංදර්ශනයකට නායකත්වය දුන්නු කණ්ඩායමේ නියමුවෝ දෙන්නෙක් තමයි.ඒ සාර්ථකත්වය ඊට දායක වූ ඕනෑම අයෙකුට හිනාවක් ඇති කරනවත් තමයි.ඒත් මෙතැන ඩයන්ගෙයි රේණුකාගෙ හිනාවටයි,ඒ ඇතුළෙ තියෙන මානව ප්‍රේමයේ ශක්තියේ ජයග්‍රාහී වෘතාන්තයටයි සමන් ගෙ හිනාවටයි,රොහාන් ගෙ හිනාවටයි ළං වෙන්නවත් බෑ.හැබැයි මේ හිනාවල් දෙක එක වේදිකාවක මේ විදිහට මුණ ගැස්සුව කණ්ඩායම හැටියට රොහාන්ලට සමන්ලට වගේම වෙළදසේවා වොලිබෝල් තරගාවලිය සාර්ථක කර ගන්න දහඩිය හලපු හැමෝටම ආඩම්බරණිය සතුටක් ලබන්න ඩයන්ගෙයි රේනුකාගෙයි හිනාවෙ කතාවම මදිද?
ඡායාරූපය සංජීව සමරවික්‍රම