කණිෂ්ඨ ක්‍රීඩකයෝ දියගමින් කොළඹට

ආසියානු කණිෂ්ඨ මලල ක්‍රීඩා සූරතාවලිය සදහා බියගම සංචිත ගත කරතිබෙන ක්‍රීඩක ක්‍රීඩිකාවන්ට වඩාත් යහපත් තත්ත්වයකින් කටයුතු කිරීම සදහා එම සංචිතය කොළඹට කැදවීමට ක්‍රීඩා අමාත්‍යවරයාගේ අවධානය යොමු වී තිබෙන බව සුපිරික්‍රීඩා වෙත වාර්තා වේ.අමාත්‍යවරයාගේ උපදෙස් පිට ක්‍රියාත්මක වන ක්‍රීඩා අධ්‍යක්ෂ ජෙනරාල් රංජනී ජයකොඩි මෙන්ම නියෝජ්‍ය අධ්‍යක්ෂ ජෙනරාල් සජිත් ජයලාල් ද එම ක්‍රීඩක ක්‍රීඩිකාවන්ට අවශ්‍යය පහසුකම් සහ නවාතැන් සැපයීම මුල්‍යමය අසීරුතා නොසළකා හරිමින් හෝ ඉටු කර දීමට උත්සාහ කරන බව සුපිරික්‍රීඩා වෙත පැවසීය.

ඒ සම්බන්ධයෙන් අදහස් දැක් වු තවත් පිරිසක් පෙන්වා දුන්නේ ක්‍රීඩකයන් කොළම නගරය ආසන්නයට කැද වන්නේ නම් විශාල පිරිසකට සිය නිවසේ සිට පුහුණුවිම් සදහා සහභාගි වීමට හැකියාව ලැබෙනු ඇති බවය.

www.supirikrida.com

මේස පන්දු සූරතාවය කොළඹ නගර සභාවට

ගල්කිස්ස ශාන්ත තෝමස් විද්‍යාලීය ගෘහස්ත ක්‍රීඩා සංකීරණයේදී ක්‍රියාත්මක වූ රාජ්‍ය සේවා මේස පන්දු සූරතාවලියේ සූරතාවය රාජ්‍ය මුද්‍රණාලීය කණ්ඩායම පරාජයට පත් කළ කොළඹ නගර සභා කණ්ඩායම විසින් දිනා ගත්තා.පිරිමි කණ්ඩායම් සූරතාවය දිනා ගැනීමේ දී ඔවුන් විසින් මුද්‍රණාල කණ්ඩායම 3 – 1 ලෙස පරාජයට පත් කළා.

පිරිමි ඒකළ තරගයේදී රාජ්‍ය මුද්‍රණාල කණ්ඩායමේ පීඩී ගජේන්ද්‍රසිරිව පරාජය කළ නුවන් සම්පත් යුගල තරගයේදී  ප්‍රභාත් සම්පත් සමග එක්ව රජයේ මුද්‍රණාලයේ පීඑස් ඩී සිල්වා සහ ඉසුරුසිරි සම්පත් පරාජය කරමින් ද්විත්ව සූරතා සදහා හිමිකම් කියනු ලැබුවා.කොළඹ නගරසභා කණ්ඩායම නියෝජනය කළ එස්යූබී දොලපිහිල්ල,චන්දන පෙරේරා,ප්‍රභාත් නිමේෂ්,එන්එච් පියදාස,නුවන් සම්පත් (පසුපෙළ) යන ක්‍රීඩකයින් ජීජී වීරක්කොඩි,නියෝජ්‍ය නගරාධිපති ටයිටස් පෙරේරා,නගරාධිපති ඒජේඑම් මුසම්මිල්,නාගරික කොමසාරිස්වරිය භද්‍රානි ජයවර්ධන,ක්‍රීඩා අධ්‍යක්ෂ ජීඑම්ජේ අපොන්සෝ  (ඉදිරිපෙළ) යන අය සමග ඡායාරූපයකට මුහුණ දුන් අයුරු මේ සමග දැක්වේ.

www,supirikrida.com

ලෝක රෝද පුටු සූරතාවයේ දී ගාමිණි සහ උපාලි සී කොටසෙන් අංක එකට

මේ දිනවල කොරියාවේ සියොල් නුවර ක්‍රියාත්මක ලෝක රෝද පුටු ටෙනිස් කණ්ඩායම් තරගාවලියේ දී පිරිමි අංශයේ සී කාණ්ඩය යටතේ තරග වදින ශ්‍රී ලංකාව එහිදී එම කොටසේ සූරතාවය දිනා ගන්නට ඊයේ සමත් වුණා.ඊයේ පැවති තරග වලදී ශ්‍රී ලංකාව නියෝජනය කරන උපාලි රාජකරුණා සහ ගාමිණි දිසානායක ඉතාලිය 2 – 1 ලෙස පරාජය කිරීමෙන් පසුව මෙම ‍ෙඔතිහාසික ජයග්‍රාහී අවස්ථාව උදා වුණා.

එහි පළමු තරගය ගාමිණි දිසානායක සහ ඉතාලියේ අයිවන් ලියොන් අතර පැවති අතර එහිදී ගාමිණි පහසුවෙන්ම ලියොන් පරාජය කරමින් වට 2 -0 ක ජයක් ලබා ගත්තා.නමුත් ශ්‍රී ලංකාවේ අංක එකේ ක්‍රීඩක සහ ජගත් ශ්‍රේණිගත කිරීම් වල අංක 69 දරණ උපාලි රාජකරුණා ඉතාලියේ අංක එකේ ක්‍රීඩක සහ ජගත් ශ්‍රේණිගත කිරීම් වල අංක 27 දරණ ෆේබියන් මැසී ඉදිරියේ වට 2 – 0 ලෙස පරාජය වීමත් සමග යුගල තරගය තීරණාත්මක වූ අතර එහිදී උපාලි සහ ගාමිණි ‍‍ෆේබියන්ට සහ ලුකා ස්පැනෝ ට එරෙහිව  6-3,7-5. සහ 6 -4 ලෙස තියුණු  ජයක් ලබා ගනිමින් සී කොටසේ සූරයන් බවට ශ්‍රී ලංකාව පත් කළා.

මේ වන විට ජගත් ශ්‍රේණිගත කිරීම් වල උපාලි 69 වන ස්ථානයට ඉහළ ගොස් සිටින අයුරෙන්ම ගාමිණි ද 77 වන ස්ථානය දක්වා ඉහළ පැමිණ තිබෙනවා.

www.supirikrida.com 

මංගල ගේ තුවක්කුවට පුස් වෙඩිල්ලක්

මිටර් 50 බිම වැතිර වෙඩි තැබීමේ ඉසව්ව වෙනුවෙන් ලන්ඩන් ඔලිම්පික් උළෙල නියෝජනයට සුදුසුකම් ලබා සිටින මංගල සමරකෝන් සමග එම උළෙලට පුහුණුකරුවෙක් සහභාගි නොකර කළමණාකරුවෙක් පමණක් සහභාගි කර වීමට තීරණය කර ඇතැයි සුපිරික්‍රීඩා වෙත වාර්තා වෙයි.සුපිරික්‍රීඩා වෙත වාරතා වන ආකාරයට ශ්‍රී ලංකාවට විශාල කීර්තියක් ගෙන ආ ක්‍රීඩිකාවක වන පුෂුපමාලී රාමනායක යටතේ පුහුණුව ලබන මංගල, මංගල ගේ දක්ෂතා ඉදිරියට ගැනීමට මෙන්ම පුහුණුකාරියක ලෙස විශාල අත්දැකීමක් ලබා ගැනීමට පුෂ්පමාලි ට ඇති අවස්ථාවද හකුලා දමා වෙඩි තැබීමේ අතුරු කමිටුවේ නිලධාරියෙකු මෙම සංචාරයට කළමණාකරු ලෙස එක් වීමට කටයුතු කරන බව එම වාර්තා පෙන්වා දෙයි.

ජාත්‍යන්තර ක්‍රීඩා ඉසව්වකදී පුහුණුකරු සහ කළමණාකරු ලෙස වෙන් වෙන් වගකීම් පැවරෙන අතර ඒ තත්ත්වය තේරුම් ගැනීම වෙනුවට අතුරු කමිටු නිලධාරියා සිය සහභාගීත්වය සනාත කර ගනු පිණිස මංගල‍ගේ තෝරා ගැනීම වයිල්ඩ්කාඩ් අවස්ථාවක් ලෙස පහත හෙලමින් ක්‍රීඩකයා පදක්කමක් නොලැබුවද එහි දී ඔහු දක්වන දස්කම් ලංකවේ වෙඩි තැබීමේ ක්‍රීඩාවේ ප්‍රවර්ධනයට කෙතරම් වැදගත් වනු ඇත්ද යන්න ද නොසළකා හැර තිබෙන බව ද සුපිරික්‍රීඩා වෙත දැන ගන්නට ඇත.

 

ඔලිම්පික් කමිටු සභාපති හේමසිරි ප්‍රනාන්දු ද මෙම කේෂ්ත්‍රයේ ප්‍රවීනයෙක් වන බැවින් ද ක්‍රීඩා අමාත්‍යවරයාද ක්‍රීඩකයන්ගේ සහ පුහුණුකරුවන්ගේ අවස්ථා මංකොල්ල කෑමට විරුද්ධ බැවින් ද  අප ඉදිරියේදී මංගලගේ සහභාගීත්වය හෑල්ලුවට ලක් කරමින් ඔහු සමග ලන්ඩන් යන්නට කෙළ හළන නිලධාරීන්ගේ දොලු දුකට වඩා මංගල ට ක්‍රීඩකයෙක් ලෙස තරගය තුළ ප්‍රගතියක් ලැබීමටත් පුෂුපමාලී ට පුහුණුකාරියක ලෙස ඉදිරියට යාමටත් ලැබෙන මෙම අවස්ථාව සංචාර ලෝලී නිලධාරීන්ට කොල්ලකෑමට අවස්ථාවක් නෙලැබෙනු ඇතැයි අපි විශ්වාස කරන්නෙමු.

www.supirikrida.com 

බුබ්කා ගේ ලේකම් ට තහනමක්

යුක්රේන ඔලිම්පික් කමිටු ලේකම් ව්ලැඩ්මිර් ගෙරාස්ච්හෙන්කෝ ගේ බලය හකුලා දැමීමට වහාම ක්‍රියාත්මක වන පරිදි පියවර ගත් බව බීබීසි ය මගින් ඔහු ඔලිමිපික් ටිකට් වංචනික ලෙස අලෙවි කළ බවට කළ හෙළිදරව්වත් සමග පියවර ගත් බව යුක්රේන ඔලිම්පික් කමිටු සභාපති සර්ජි බුබ්කා මාධ්‍යයට ප්‍රකාශ කරයි.

බීබීසි ය මගින් කරන ලද මෙම හෙළිදරව්වත් සමග වහාම ක්‍රියාත්මක වූ මේ වන විටත් ජගත් රිටි පැනීමේ වාර්තාවට හිමි කම් කියන බුබ්කා වහාම ක්‍රියාත්මක වන පරිදි 1997  පටන් යුක්රේන ඔලිම්පික් කමිටුවේ ප්‍රබලයෙක් වන ව්ලැඩ්මීර් ගේ සේවය අත් හිටුවීමට මෙන්ම ඒ සම්බන්ධයෙන් පරීක්ෂණයක් පැවත්වීමටත් පියවර ගන්නා බව ප්‍රකාශ කර ඇත.

www.supirikrida.com 

පල්ලේකැලේ,හම්බන්තොට සහ ඛෙත්තාරාමයේ පිහිනන්න අවස්ථාවක්

පල්ලේකැලේ,හම්බන්තොට සහ ඛෙත්තාරාම ක්‍රීඩාංගණ වල ඉදිරි‍යේදී ක්‍රිකට් ඇකඩමි අරඹන බවත් ඒ සදහා පිහිණුම් තටාක සැකසීම වැනි කරුණු මේ වන විට සැළසුම් කරමින් තිබෙන බවත් ක්‍රීඩා අමාත්‍යවරයා පාර්ලිමේන්තුවේදි ප්‍රකාශ කර ඇත.මෙම පහසුකම් සම්පාදනය කිරීමේ දී ක්‍රීඩකයන්ට නේවාසිකව එම ඇකඩමි වල පුහුණුව ලැබීමට අවස්ථාව සැළසෙනු ඇති බව  ද ක්‍රීඩා අමාත්‍යවරයා අවධාරණය කර ඇත.

පාර්ලිමේන්තුවේ දී සජිත් ප්‍රේමදාස මංත්‍රීවරයා ඇසූ පැනයකට පිළිතුරු දෙමින් මේ බව අවධාරණය කළ ක්‍රීඩා අමාත්‍යවරයා දයාසිරි ජයසේකර මංත්‍රීවරයා ඇසූ පැනයකට පිලිතුරු දෙමින් පැවත්වීමට නියමිත ආසියානු කණිෂ්ඨ ක්‍රීඩා උළෙල අත්හිටවීම සදහා ආසියානු සම්මේලනයට බලපෑම් කළ සහ අසත්‍ය තොරතුරු සැපයූ හිටපු මලල ක්‍රීඩා පරිපාලන නිලිධාරීන් දෙදෙනාට එරෙහිව පරීක්ෂණයක් පවත්වා දස වසරක් ක්‍රීඩා පරිපාලනයට කොයි ආකාරයකින්වත් සම්බන්ධ වීමට නොහැකි ලෙස තහනමක් පනවන බවත් පැවසීයදැනටමත් වෛද්‍ය මායියා ගුණසේකර ප්‍රමුඛව මේ සදහා පරීක්ෂණ කටයුතු සිදු කරන බවත් ක්‍රීඩා අමාත්‍ය මහින්දානන්ද අලුත්ගමගේ මෙහිදී තව දුරටත් අවධාරණය කළේය.

www.supirikrida.com 

බාකු සහ දෝහා හැලේ

ඔලිම්පික් සහ පැරා ඔලිම්පික් උළෙල 2020 වර්ෂයේ පැවත්වීම සදහා ඉල්ලුම් කර තිබූ නගර අතරින් අසර්බයිජානයේ බාකු සහ කටාර් හී දෝහා යන නගර ඉවත් කිරීමට ජාත්‍යන්තර ඔලිම්පික් කමිටුව තීරණය කිරීමත් සමග එ් සදහා තරග වදින නගර ප්‍රමාණය ජපානයේ ටෝකියෝ,තූර්කියේ ඉස්තාන්බුල් සහ ස්පාඤ්ඤයේ මැඩ්රීඩ් ලෙස තුනක් බවට පත් විය.

මෙසේ 2020 ඔලිම්පික් සහ පැරා ඔලිම්පික් පවත්වන නගර සම්බන්ධයෙන් තීරණය ගැනීම සදහා ජාත්‍යන්තර ඔලිම්පික් කමිටුවේ විධායක සහ තාක්ෂණ ඇගයීම්තා කමිටු තීරණ අනුව දෝහා සහ බාකු නගර වලට අවස්ථාව අහිමිව ගිය බව ජාත්‍යන්තර ඔලිම්පික් කමිටුව සම්බන්ධ මාධ්‍ය වාර්තා ඔස්සේ හෙළිදරව් වෙයි.  

www.supirikrida.com