වැස්සත් කොදෙව්වෝ සුපිරි අට ට

අයර්ලන්තය සහ බටහිර ඉන්දීය කොදෙව් කණ්ඩායම අතර පැවති තරගය විසදුමක් නොමැතිව අවසන් වුව ද,ලකුණු ලබා ගැනීමේ වේගය මත කොදෙව් කණ්ඩායම සුපිරි අට වටයට ඇතුළත් වීමට සුදුස්සෝ වූහ.ඕස්ට්‍රේලියාව සමග පැවති තරගයේදී මෙවර තරගාවලියේ කණ්ඩායමක් ලද ඉහළම ලකුණු ප්‍රමාණය (196) වාර්තා කිරීමට කොදෙව් ක්‍රීඩකයෝ සමත් වුව ද එම තරගයට ද වර්ෂාවෙන් එල්ල වූ බාධා නිසා ඩක්වර්ත් ලුවිස් න්‍යාය මත ජය තීරණය කිරී‍මේ දී ඕස්ට්‍රේලියාවට ජය හිමි විය.
මේ තත්ත්වය මත ඊයේ අයර්ලන්ත තරගය ජය ගැනීම ජය පරාජයෙන් තොරව අවසන් වීම යන කරුනු දෙක මතම කොදෙව්වන්ට සුපිරි අට වටයට පිවිසිමට අවස්ථාව තිබුණු අතර අයර්ලන්තයට අනිවාර්යයෙන්ම කොදෙව්වන් පරාජය කළ යුතුව තිබිණි.තරගාවලියට පිවිසෙන විටම පෙරළිකාර කණ්ඩායමක් විය හැකි බවට ඉගි සපයා තිබුණු අයර්ලන්ත‍ය,කොදෙව්වන් ඉදිරියේ හොදින් පන්දුවට පහර දුන් අතර පන්දු ඕවර් 19.දී තරගය වර්ෂාව මත අතහැරීමට තීරණය කරන විට ඔවුන් කඩුලු 96 ට ලකුණු 129 ක් ලබා සිටියේය.
අයර්ලන්තය වෙනුවෙන් වැඩිම ලකුණු ලැබූ ක්‍රීඩකයා වූයේ ප්‍රතට ඕබ්‍රයන් පවුලේ නීල් ඕබ්‍රයන් ය.ඔහු ලකුණු 25 ක් ලබන්නට සමත් විය.ප්‍රහාරක පිතිකරු ක්‍රිස් ගේල් ට ඊයේ පිත්ත එසවීමට වර්ෂාව ඉඩ නොදුන්න ද පන්දු යවමින් කොදෙව් කණ්ඩායමේ සාර්ථකම පන්ද් යවන්නා වූවේ ලකුණු 21 ට කඩුලු 2 ක් දවා ගනිමින්ය.තරගයේ සමස්ත ලකුණු විස්තරයට පහත සබදතාවය තෙරපීමෙන් පිවිසිය හැකිය.
www.supirikrida.com

කළු සැප්තැම්බරයට නිහඩ වීමට ඔබාමාත් එකගයි

කළු සැප්තැම්බරය ලෙස හදුන්වන 1972 මියුනිච් ඔලිම්පික් උළෙලේ දී ක්‍රීඩකයන් 11 දෙනෙකු සහ ජර්මන් පොලිස් නිලධාරියෙකු පලස්තීන ප්‍රහාරයෙන් මිය යාමේ සිද්ධිය වෙනුවෙන් සෑම ඔලිම්පික් උළෙලකදීම විනාඩියක නිහඩතාවයක් පැවත්වීම සදහා ලෝක එකගතාවය දිනා ගැනීම සදහා එහිදි මිය ගිය දෙදෙනෙකුගේ බිරින්දෑවරු වන ඇන්කි ස්පීට්සර් සහ ලානා රොමානෝ ගෙන යන ව්‍යාපාරයට ඇමෙරිකානු ජනාධිපති බැරක් ඔබාමා ද සිය එකගතාවය පළ කර ඇත.එය 2016 රියෝද ජැනෙයිරෝ ඔලිම්පික් උළෙලේ සිට සමාරම්භක න්‍යාය පත්‍රයේ අනිවාර්ය අංගයක් කිරීම ඇන්කි ගේ සහ ලානා ගේ අරමුණ වී ඇත.

එම ප්‍රහාරයෙන් 40 වසරක් සපිරෙන මේ වසරේ ඔලිම්පික් තරගාවලියට ද එය ස්මරණය කරමින් විනාඩියක් නිහඩවීම සිදු කරන්නට යෙදුණු අතර එය ජාත්‍යන්තර ඔලිම්පික් කමිටු සභාපතිවරයාම ප්‍රකාශ කරන්නට යෙදිණ.ජගත් කෙළිබිම ඇසුරේ සිදු වූ දැවැන්තම ඛේදවාචකය ලෙස හැදින්වෙන් මියුනිච් සිදුවීම ස්මරණය කර විනාඩියක නිහඩතාවයක් පැවත්වීම සදහා ඇනිකා සහ ලානා ගෙන යන සටනට මේ වන විට ඔබාමා ගේ සහය මෙන්ම කැනඩාව,බ්‍රිතාන්‍යය,ජර්මණිය,ඉතාලිය සහ ඕස්ට්‍රේලියාව වැනි රටවල ද එකගතාවය පළ වී ඇත.

ඡායාරූපයේ දැක්වෙන්නේ අනීකා සහ ලානා විසින් ගෙන එන ලද එම යෝජනාව පිළිබදව ඇනීකා ස්පීට්සර් අදහස් දැක් වූ අවස්ථාවකි.

www.supirikrida.com

දෝනි ගේ පිරිවර ඛෙත්තාරාමයේ දී ලගාන් 2 පෙන්වයි

සුදු අධිරාජ්‍යවාදීන්ට එරෙහි ඉන්දීය සටන සංඛේතවත් කරන චිත්‍රපටයක් ලෙස සැළකෙන ලගාන් චිත්‍රපටියේ දි ඉන්දීය තරුණයන් සුදු ජාතිකයන්ට එරෙහිව ක්‍රිකට් තරගයේදී එල්ල කරන ප්‍රහාරය සිහියට නංවමින්,ලෝක කුසලාන 20 / 20 තරගාවලියේදී ඉන්දියාව එංගලන්තයට එරෙහිව ලකුණු 90 ක් අති විශිෂ්ඨ ජයක් ලැබීය.ස්වීය ස්ථානය පිළිබදව ගැටළුවකට මුහුණ දී සිටි ඉන්දීය ජ්‍යෙෂ්ඨ පන්දු යවන්නා වන හර්බජාන් සිය තම හැකියාව මොනවට ප්‍රදර්ශනය කරමින් ලකුණු 12 ට කඩුලු 4 ක් ලබා මෙම ජයග්‍රහණයේ කසකරුවා බවට පත් විය.
කාසියේ වාසිය ලැබූ එංගලන්තය, ආර් ප්‍රේමදාස තණතීරුව පළමුව ලකුණු ලබා ගැනීම සදහා ඉන්දියාවට බාර කළ අතර එහිදී ගෞතම් ගාම්බිර් (45) සහ රෝහිත් ෂර්මා (55) සහ සුපුරුදු පරිදි විරාට් කෝලි (40) එක්ව ඉන්දීය ඉණිම කඩුලු 4 ට ලකුණු 170 ක් දක්වා ඔසවා තැබීමට සමත් වූහ.මෙම අභියෝගයට මුහුණ දීමට පැමිණි එංගලන්ත කණ්ඩායමේ ඇලෙක්ස් හෝල් ලකුණු නොලබා දැවී ගියද සටන අත් නොහරින බවක් ක්‍රේග් කිස්වේටර් විසින් පෙන්නුම් කළද දග පන්දු යවන්නන් හදුන්වා දීමත් සමග සියල්ල වෙනස් විය.විශේෂයෙන් හර්බජාන් සිං ද පියසු චව්ලා ද (13 / 2) එක්ව එංගලන්ත ඉණිම ලකුණු 80 ට සීමා කළේ මේ දක්වා මෙම තරගාවලිය තුළ වාර්තා වූ ඉහළම ජයග්‍රහණය සනිටුහන් කරමින් ය.
තරගයේ සමස්ත ලකුණු විස්තරයට මෙම සබදතාවයෙන් පිවිසිය හැකිය.
http://www.espncricinfo.com/icc-world-twenty20-2012/engine/current/match/533281.html
මේ අතර ඊයේ පකිස්තානය සහ නවසීලන්තය අතර පල්ලේකැලේදී පැවති තරගය තියුණු මුහුණුවරක් ගත්ත ද අවසානයේ ලකුණු 13 ක ජයක් පකිස්තානයට ලබා දී තරගාවලියේ අපරාජිත තත්ත්වය අහිමි කර ගන්නට නවසීලන්තයට සිදු විය.නසීර් ජම්ෂේඩ් (56) මෙන්ම මොහොමඩ් හෆීස් (43) ද සියළුම පකිස්තානු පිතිකරුවන් සිය ලකුණු ලබා ගැනීමේ දළ වේගය 100% එපිටින් තබා ගැනීමත් නිසා පකිස්තානයට සිය පන්දු ඕවර 20 කඩුලු 6 ට ලකුණු 177 ක් ලෙස අවසන් කරන්නට හැකි විය.
එයට පිලිතුරු ලබා දීමට පැමිණි නවසිලන්තය හොද සූදානමක් පෙන් වුවද 20 / 20 පිතිකරණයේ වාර්තාගත ඉණිම දියත් කළ බ්‍රෙන්ඩන් මැකලම් අවාසනාවන්ත ලෙස දැවී යාමත් සහීඩ් අජ්මාල් උපක්‍රමශීලීව පන්දු යවමින් තමන්ගෙන් ලබා ගන්නා ලකුණු වල හිලව්වට කඩුලු බිද දමමින් ලකුණු 30 ට කඩුලු 4 ක් බිද දැමීමත් නිසා නවසිලන්ත ඉණිම ලකුණු 164 දී නතර විය.
තරගයේ සමස්ත ලකුණු විස්තරයට ‍පහත සබදතාවය තෙරපීමෙන් ප්‍රවේශවීමට හැකියාව ඇත.
http://www.espncricinfo.com/icc-world-twenty20-2012/engine/match/533280.html

www.supirikrida.com

ශ්‍රී ලංකාවට පළිහ සූරතාවය

චීනයේ ක්‍රියාත්මක වූ සත් සාමාජික ෂැංහායි ආසියානු රග්බි තරගාවලියේ පළිහ සූරතාවය දිනා ගැනීමට ශ්‍රී ලංකාව සමත් වුණා.සමස්ත තරගාවලියේ පස්වන තැන සමග ශ්‍රී ලංකාව පළිහ සූරතාවය දිනා ගත්තේ තායිලන්තයට එරෙහිව ලකුණු 22 - 7 ක් ලෙස ජය ගනිමින්.මෙම තරගාවලිය තුළ දී ශ්‍රී ලංකා සමස්ත සූරතාවය දිනූ හොංකොං කණ්ඩායමට එරෙහිව ලකුණු 7 - 36 ක් ලෙස සහ සිව්වන ස්ථානයට පත් කොරියාව ඉදිරියේ 12 - 17 ක් ලෙස පමණක් පරාජය වූවා.සිංගප්පූරුව ලකුණු 41 - 0 ලෙස ද,එක්සත් අරාබි  එමීර් රාජ්‍යය ලකුණු 43 - 0 ක් ලෙස ද පරාජය කරමින් ශ්‍රී ලංකාව පළිහ සූරතාවයේ අවසාන තරගයට සුදුසුකම් ලැබුවා.
තරගාවලියේ සමසත සූරතාවය සදහා හොංකොං කණ්ඩායම සමග තරග වැදුණේ චීන කණ්ඩායම යි.එහිදී චීනයට හොංකොං කණ්ඩායම ලකුණු 42 ක් ලබන විට රැස් කිරීමට හැකි වූයේ ලකුණු 10 ක් පමණයි.තරගාවලියේ පළග සූරතාවය සදහා පැවති අවසාන තරගයේදී මැලේසියාව සිංගප්පූරැව පරාජයට පත් කළ අතර එහි ලකුණු තත්ත්වය වාර්තා වූයේ 19 - 14 ක් ලෙස යි.
තරගාවලිය ආශ්‍රිතව ක්‍රියාත්මක වූ කාන්තා සත් සාමාජික තරගාවලියේ සූරතාවය සත් කාරක චීනය විසින් හිමි කරගත්තේ පිරිමි තරගයේදී සිය රටට පරාජය අත් කළ හොංකොං කණ්ඩායම ලකුණු 31 -0 ලෙස පරාජය කරමින්.
www.supirikrida.com

කෝට්ටේ දැල්පන්දු ඇකඩමියෙන් සත් වසර සමරා සත් කොන් තරගාවලියක්

හිටපු ජාතික දැල් පන්දු පුහුණුකාරිණී තිලකා ජිනදාස ගේ මග පෙන්වීම ඇතිව ඇරඹි කෝට්ටේ දැල්පන්දු ඇකඩමියට සත් වසරක් පිරීම නිමිත්තෙන් අවුරුදු 15 න් පහළ සහ ඉහළ ලෙස කාණ්ඩ දෙකක් යටතේ කණ්ඩායම් හතක සහභාගීත්වයෙන් තරගාවලියක් පැවත්වීමට නියමිත බව තරගාවලියේ මෙහෙයුම් කටයුතු භාර නිලධාරිණිය වන ශ්‍යාමා කුරේ සුපිරි ක්‍රීඩා වෙත පැවසීය.මේ වන විට බෘනායි ජාතික දැල් පන්දු පුහුණුකාරිය සහ පුහුණු අධ්‍යක්ෂවරිය ද වන තිලකා ශ්‍රී ලංකාවේ නොමැති වුව ද ඇයගේ පූර්ණ ආශිර්වාදය සහ දායකත්වය මෙම තරගාවලියට ලැබෙන බව ද,ශ්‍යාමා තව දුරටත් අවධාරණය කළාය.
සිය ඇකඩමියට සම්බන්ධ පුහුණුකරුවන් පුහුණු කටයුතු කරන පාසල් මෙන්ම සිය ඇකඩමියේ පාසල් වයසේ පුහුණුව ලබන සිසුවියන් ගේ දායකත්වයෙන් සකස් කර ගන්නා කණ්ඩායම් දෙකක් ද මෙම තරගාවලියේදි ක්‍රීඩා කරනු ඇති බව ඇය තව දුරටත් අනාවරණය කළාය.ඇකඩමිය කේන්ද්‍රීයව පවතින අංගම්පිටිය ක්‍රීඩා පිටියේ දී මෙම තරගාවලිය පැවත්වෙන බව පැවසූ ඇය,එම තරගාවලිය නොවැම්බර් 03 දා පැවත්වීමට නියමිත බව ද පැවසුවාය.
ජාතික මට්ටමේ ක්‍රීඩිකාවන් විශාල ප්‍රමාණයකට මාර්ගෝපදේශකත්වය සැපයූ සහ ඔවුන්ගේ හැකියාවන් ඔප මට්ටම් කිරීමට දායක වූ කෝට්ටේ දැල්පන්දු ඇකඩමිය හරහා පෙරට පැමිණි විශාල ක්‍රීඩිකාවන් පිරිසක් මෙම තරගාවලියට ආශිර්වාදය කිරීමට එක් වනු ඇති බව ද ශ්‍යාමා පවසන්නීය.
www.supirikrida.com

දකුණු අප්‍රිකාවෙන් 20 / 20 ක්‍රිකට් පාඩමක්

ශ්‍රී ලංකාව සහ දකුණු අප්‍රිකාව අතර පැවති 20/20 ලෝක කුසලාන තරගය වර්ෂාව නිසා පන්දු ඕවර් හතකට සීමා වුනු අතර එයින් ලකුණු 32 ක් ජයක් ලැබූ දකුණු අප්‍රිකාව 20 / 20 තරග සම්බන්ධයෙන් නව පාඩමක් ක්‍රිකට් ලෝකයට උගන්නන්නට සමත් විය.20 /20 තරග වලදී දිගු පහරවලින් ලකුණු 6 සහ 4 ලබා ගැනීමේ සංස්කෘතිය අභියෝගයට ලක් කරමින් පහර දුන් දකුණු අප්‍රිකාව (6 x 5) ,(4 x  3) පන්දු 8 ක් පමණක් එසේ සීමාවෙන් පිටතට එල්ල කළ අතර ඉතිරි පන්දු 34 තුළ කෙටි ලකුණු වලින් ලකුණු 40 ක් ලබා ගත්තේය.විශේෂයෙන් හම්බන්තොට මහින්ද රාජපක්ෂ ක්‍රීඩාංගණයේ විශාලත්වය ප්‍රයෝජනයට ගත් දකුණු අප්‍රිකා පිතිකරුවෝ එක ලකුණ ලකුණු 2 බවට පත් කර ගනිමින් කඩුලු අතර දිව ගිය ආකාරය විශ්මිත විය.වේගය මෙන්ම ජවසම්පන්න බව අතින් ද තමන් 20 / 20 තරග සදහා සැපිරු සුදුසුකම් සහිත බව පෙන්නුම් කළ ඔවුන් සිය පන්දු ඕවර් 7 නිමාවට පත් කළේ ලකුණු 78 ක් ලබා ගනිමින්ය.මහේල පන්දු ඕවර් දෙකේ පන්දු යවන්නන් දෙදෙනා කවුරුන් ද යන්න තෝරා ගැනීමේදී යම් අපහසුවකට මුහුණ දුන් බව පෙණුනු අතර දිනය ගැන නොසිතා ඔහුට අවසානයේ  නම ඇති ලිසිත් මාලිංග සහ රංගන හේරත් තෝරා ගැනීමට සිදුවිය.එය එතරම් ප්‍රයෝජනයක් සහිත ක්‍රියාවක් නොවිණ.
පිළිතුරු ඉණිමට පිවිසි ශ්‍රී ලංකාව දැවැන්ත ඉලක්කය හේතුවෙන් යම් තැති ගැන්මකට ලක් වී සිටි බවක් පැහැදිළි කළ අතර එහි ප්‍රතිපලයක් ලෙස තිලකරත්න ඩිල්ෂාන් ගේ කඩුල්ල දුවද්දී දැවී යාමක් ලෙස දකුණු අප්‍රිකාවට පූජා කරද්දී ලකුණු පූවරුව ලකුණු 4 ක් පමණක් විය.ඩිල්ෂාන් ට ලකුණු ලබා ගැනීම සදහා  එක් පන්දුවකට හෝ මුහුණ දීමටවත් අවකාශ නොලැබිණ.අනතුරුව මහේල ද දකුණු අප්‍රිකාව විසින් දවා ගන්නා කඩුලු පෝලිමට එක් වීමෙන් පීඩනය දෙගුණ තෙගුණ වූ අතර නවක ඩිල්ෂාන් මුණවීර එම පීඩනය ඉදිරියේ ලකුණු ලැබීමට උත්සාහ ගන්නෙකු පමණක් වූ අතර ඔහු ලකුණු 13 ක් සහ සංගක්කාර ලකුණු 13 ක් ලබමින් ශ්‍රී ලංකා ඉණිමේ වැඩිම ලකුණුලාභීන් වූහ.කඩුලු අතර දිවීමෙන් ලකුණු ලබා ගැනීමේ පාඩම උගත් බවක් පෙනෙන්නට නොතිබි අතර ඇතැම් විට අප ක්‍රීඩක සිරුරු ඒ තරමට ජවය සහ වේගය සහිත සිරුරු නොවිමද ප්‍රායෝගිකව එයට හේතු වන්නට ඇත.
පන්දු ඕවර් 7 තුළ ශ්‍රී ලංකාව කඩුලු 5 ට ලබා ගත් ලකුණු 46 තුළ 4 පහර 4 ක් පමණක් සටහන් වූ අතර ඉතිරි පන්දු 38 ක් තුළ ඔවුන් ලබා ගෙන ඇත්තේ ලකුණු 30 ක් පමණකි.මේ වෙනස දකුණු අප්‍රිකාව සහ ශ්‍රී ලංකාව අතර ජය පරාජය තීරණය කළ විශාල සාධකයක් වූ අතර එය මෙම තරගාවලියේ ඉදිරි තරග වලදී ශ්‍රී ලංකාවට පමණක් නොව දකුණු අප්‍රිකාව සමග තරග වදින සෙසු කණ්ඩායම් වලට ද විශාල අභියෝගයක් වනවාට සැක නැත.පන්දු 13 කින් ( 6 x  2 සහ 4 x  1 ) ලකුණු 30 ක් ලැබු ඩිවිලියර්ස් තරගයේ වීරයා වූ අතර ඔහු පන්දු 3 කින් ලකුණු 16 ක් ලබා ගන්නා අතරේ පන්දු 10 දී ලකුණු 14 ක් ලබා ගත්තේ කඩුලු අතර වේගවත් ධාවනයට ඇති සිය හැකියාව උපරිමයෙන් ප්‍රදර්ශනය කරමින්ය.
තරගයේ සමස්ත ලකුණු විස්තරයට පහත සබදතාවය තෙරපීමෙන් පිවිසිය හැකිය.
http://www.espncricinfo.com/icc-world-twenty20-2012/engine/match/533278.html

www.supirikrida.com

වොට්සන්ට යළිත් තරගයේ වීරයා සම්මානය

ඕස්ට්‍රේලියානු තුන් ඉරියව් ක්‍රීඩක ෂේන් වොට්සන් ගේ තුන් ඉරියව් දක්ෂතා පිහිටෙන් ලකුණු 192 ක දැවැන්ත ඉලක්කයක් හඹා ගිය ඕස්ට්‍රේලියාවට ඩක්වර්ත් ලුවිස් න්‍යාය යටතේ බටහිර ඉන්දීය කොදෙව් පිළට එරෙහිව ලකුණු 17 ක ජයක් ලබන්නට හැකි  විය.පළමුව පන්දුවට පහර දුන් බටහිර ඉන්දීය කොදෙව් ඉණිම අර්ධ ශතක වලින් ශක්තිමත් කළ ක්‍රිස් ගේල් (53) සහ මාලන් සැමුවෙල් (50) ගේ දක්ෂතා සමග ලකුණු 191 ක් දක්වා ඉදිරියට ගියේ ඕස්ට්‍රේලියාව දැඩි අපහසුවට ලක් කරමින්ය.මිචෙල් ස්ට්‍රැක් ලකුණු 35 ට කඩුලු 3 ක් සහ ෂේන් වොට්සන් ලකුණු 29 ට කඩුලු 2 ක් ලබා ගැනීමට සමත් විය.
පිලිතුරු ඉණිමට පිවිසි ඕස්ට්‍රේලියාවට දැවැන්ත ලකුණු ඉලක්කය මෙන්ම ඒ වන විට ආර් ප්‍රේමදාස ක්‍රීඩාංගණයට ඉහළින්  මුදුන්ව තිබුණු,කළු වළා වලින් පැවසුණු වැහි ළග එන බවට කළ නිවේදනයත් සමග ඩක්වර්ත් ලුවිස් න්‍යාය යටතේ ජය ලබා ගැනීමට හැකි ආකාරයේ වේගයක් රදවා ගත යුතුව තිබිණි.මේ අභියෝගයට මුල සිටම තමන් සූදානම් බව පෙන්වූ ආරම්භක පිතිකරුවන් වූ ඩේවිඩ් වර්නර් (28) සහ ෂේන් වොට්සන් (නොදැවී 41) ආරම්භක කඩුල්ලට ලකුණු 30 ක් එකතු කළේ පන්දු ඕවර් 2.1 තුළදී ය.පසුව පැමිණි මයික් හසී පන්දු 19 කින් ලකුණු 28 ක් ලබා නොදැවී සිටියදී වර්ෂාව නිසා තරගයේ තීරණය ඩක්වර්ත් ලුවිස් න්‍යායට යටත් කළ අතර ඒ වන විට ඕස්ට්‍රේලියාව පන්දු ඕවර් 9.1 දි ලබා සිටි  ලකුණු 100 ලකුණු 17 ක ජයග්‍රහණයක් ලබා ගැනීමට තරම් ප්‍රමාණවත් විය.
තරගයේ සමස්ත ලකුණු විස්තරයට මෙම සබදතාවය තෙරපීමෙන් පිවිසිය හැකිය.
http://www.espncricinfo.com/icc-world-twenty20-2012/engine/match/533279.html

www.supirikrida.com